轉角‧見

營業中

休息中

26/7號，天氣極悶熱、悶焗，太太推薦食呢間叫轉角見嘅餐廳，去到門口望入去已經停一停，啲檯又亂、餐廳感覺唔似係一間俾人舒服嘅休閑小店，反而似係一間九十年代茶餐廳。唯一好處係無乜人，坐邊都得。拎起餐牌，唔⋯⋯有層油𣺉𣺉嘅感覺。點咗卡邦尼意粉，太多醬，食落口好油膩。用嘅意粉係扁意粉，軟硬適中，只係扁身唔係我預期。跟餐正價叫咗杯熱柚子蜜，個size配唔上佢三十幾蚊嘅身價。好！主菜嚟了！傳統經典漢堡配薯條份餐一到，試下薯條，硬、非常硬！唔係脆身，係硬，用叉拮入去，要用力先拮得入。慶幸薯條入面係仲有薯仔，唔係空心。個漢堡，塊肉乾到裂，用刀一切，啲肉扒變咗肉碎，打開塊包，入面係完全唔完整嘅一塊肉扒，乾到好似啲湖乾旱咁。塊包係好食嘅、蕃茄、炒洋蔥嗰啲都正常。塊肉真係仲衰過M字漢堡店。跟餐黑牛，可樂似糖水，唔似係可樂。