四寶食堂 (已搬遷) 新店位置

一直都好少嚟炮台山，咁啱黎開附近嘅景點參觀，順便就諗住喺呢頭食埋晚餐，見到友邦廣場地下有幾間裝修唔錯嘅餐廳，最後見到四寶食堂嘅選擇都幾多，所以就試一試啦。雖然係冰室，但係裝修好有格局，風格上應該係走新派路線，菜式方面亦都係港式混合埋中西元素，幾特別。《黑松露手撕雞拌麵》$78出奇地好食！黑松露嘅味道好出，落得幾重手，食起嚟十分香，而且麵條好彈牙，手撕雞嘅份量都好多。《蜜汁叉燒滑蛋蓋飯》$62好出色，滑蛋嘅紋路清晰，色澤金黃，蛋汁好多，食起嚟蛋味夠濃，入口好嫩滑，而叉燒大大塊，份量好足，食起嚟又唔會好鞋，難怪係招牌之一👍🏻如果飯既醬油可以多少少會好更好。《沙拉豬扒》$78豬扒輕輕炸過，表面沾滿酸甜汁，配埋沙律醬真係好好食，而且豬扒肉質好鬆軟，不錯👍🏻《XO醬萵筍炒牛肉》$72份量好足！無論係萵筍同牛肉嘅份量都好多，萵筍雖然唔係切成片狀，但係都煮得啱啱好，口感好爽脆👍🏻牛肉都好軟稔入味！ 總括嚟講，呢間新派冰室份量、味道方面都好唔錯，價錢又唔貴，性價比好高，下次一定會再嚟。