Brick by Brick (已結業)

馬來西亞朋友一別已經兩年。今次返港指明要食位於中環蘇豪區嘅Brick by brick，話鍾意佢哋對食物嘅用心，叻沙同肉骨茶尤其好味，仲有滿滿嘅人情味。餐廳宜家做緊人氣招牌二人晚市套餐，小食連兩款主食同兩杯飲品都只係四佰幾。泰式酸辣無骨鳳爪，入口有脆口嘅軟骨、味道先辣後酸甜。紅蘿蔔絲、生菜同蕃茄仔，爽口清新，將辣度中和，十分醒胃。招牌火熱砂煲香濃肉骨茶完全無添加無味精，豆卜、同菇都吸滿淡淡藥材味嘅湯底，份外滋味；一定排夠琳又入味，點埋蒜泥同特製醬汁，令味道更有層次。仲可以將油炸鬼浸入湯一齊食，送飯一流！秘製嘅馬來西亞咖喱叻沙湯麵同樣好味。今次叫咗鱻魚三寶，個魚腐真係冇得彈。咖喱叻沙湯底濃厚、微辣帶椰香味。配料仲有半隻雞蛋爽口芽菜同豆卜，真材實料，食得出製作嘅用心。飲品同樣有不少養生之選，推介蘋果醋椰果特飲同桔仔話梅梳打，特別適合怕辣嘅朋友。好開心仲可以食到廚師嘅巧手馬來西亞菜；同見到和譪親切嘅老闆娘繼續用心招待每一位客人。希望呢份濃濃嘅人情味得以延續！大家記得多多支持！