泉章居 (已結業)

家人預慶中秋，有長輩在場，退休人仕不願多花費，午餐小局由他建議，選了泉章居，因為午市套餐（下午5點半前）相比同樣的晚市套餐價錢更實惠。周六中午不滿座，亦有點心供應。也許大部分人口味，中午喜歡點心多於餸菜，自然不會想到泉章居。中午8人套餐$498 已包茶芥丶加一及服務費，切記不要加餸及點心，否則加番啲其他費用就無咁超值喇！長輩上次中招！8人餐可選6款小菜，包括鹽焗雞或霸皇雞，既是招牌，亦是最貴菜式，精明消費者懂得選擇；另外該點條魚，紅鮪應該貴過鯇魚；其他小菜價錢相若，可以任選。招牌鹽焗雞，加了大量薑蔥就是霸皇雞，份量十足，有鹽味但不算香，雞肉算滑，雞胸比較嚡口，不過不失。清蒸紅鮪，無過火，調味適中。東江釀豆腐，客家名菜，味道不錯。鎮冮骨，酸甜平衡，醃得入味。番薯苗，菜嫩汁豐。花膠海蔘煲，聽來名貴，但當然並非用上乘材料，但炆得腍亦入味。白飯6碗，$11/碗，賣單$564，6人局，$100有找，又真是超值！香港地，懂得找，可以接受的平靚正！