緻素坊

營業中

休息中

今晚食齋，環境食物服務都唔錯，唯一缺點係嘈咗少少。糖醋松子仙斑：呢個名真係勁，其實就係芋頭魚，芋頭炸得好脆，入面啲芋蓉好香，不過就揸得燶咗少少啦，冇苦味嘅， OK嘅。齋三寶：其實即係齋滷味，佢係整返熱先上枱，唔會凍冰冰，唔錯。椒鹽脆茄：其實就係矮瓜切條再包粉漿再炸，又可以當作中式茄子天婦羅。味道都OK，不過心入面硬係覺得如果好似日式天婦羅切片加粉漿落去咋，個口感可能會好啲。乾炒叉燒河：因為冇晒河粉所以轉咗做炒麵，個面都炒得乾身，唯一缺點就係太少齋叉燒，真係幾經辛苦先搵到一粒半粒。有機淮山浸時蔬：呢個清清地幾好味。甜品嗌咗兩款，分別有椰絲雷沙湯丸同埋金箔棗蓉糕。椰絲雷沙湯丸：感覺麻麻，都係鍾意傳統冇椰絲嘅雷沙湯丸，而家爽爽地有啲奇怪。金箔棗蓉糕：呢個好好食，件棗蓉好煙韌，紅棗味都香，熱辣辣非常好。