三餸車仔麵 $53
餸： 五香牛腩 + 牛肉餅 + 豬腩肉
底： 河粉
汁： 重口味之選（全部汁落晒！）
一上枱就聞到濃濃嘅滷水香味，「全部汁」真係無呃人，撈勻之後每條河粉都掛滿汁，鹹香帶甜，食到最後一啖都唔會淡茂茂。
五香牛腩炆得夠淋，唔會韌，有五香粉同柱侯醬嘅香味，好入味。
牛肉餅有肉汁，咬落去彈牙，配濃汁一流。豬腩肉肥瘦適中，滷得好透，入口即化。河粉滑溜，索汁能力強，重口味人士必點呢個組合！
豬雜麵 $58
底： 油麵
汁： 滷水汁
呢碗簡直係內臟愛好者天堂！豬肚、豬耳、豬脷、豬膶、生腸、大腸、粉腸……真係咩都有，處理得乾淨，無異味。豬肚同豬耳，爽脆有嚼勁，滷水味入到入心。豬膶煮得剛熟，嫩滑唔嚡口。生腸同大腸洗得乾淨，無騷味，大腸仲帶少少脂肪香，正！油麵配滷水汁係經典配搭，掛汁得嚟唔會太鹹，成碗食完超滿足。
新鮮魷魚鬚 $52
魷魚鬚真係「新鮮」兩個字當之無愧，咬落去爽口彈牙，唔會韌到似擦膠。個醬汁係精髓，撈勻芫荽同脆花生，口感同味道都豐富到爆！
涼拌生腸$30
份量超多，生腸切得薄身，醃得入味，口感爽脆到「索索聲」，少少辣，好開胃。作為小食或者前菜都非常適合。
Coke Zero $8
雀巢檸檬茶 $8
1
