椰小盅燉湯專門店 (已結業)

嗯，親身體驗藍田真係個鳥不生蛋嘅不毛之地。當日行一轉，叫做有啲意慾去幫襯嘅餐廳真係外星人單手用三隻手指都數得晒。幾年前因工作關係，頻頻食過好幾次嘅椰小盅意料之外原來藍田有分店，當年記憶點頗深，用原個椰盅載住嘅熱湯，曾温暖我好幾個嚴寒嘅冬日。係，實情係嗰日大熱天時，坐喺斜陽直曬嘅玻璃窗前飲熱湯，用個「嘆」字係有啲勉強，但唔講環境齋講嗰盅湯確係清甜美味，#蟲草花干貝土雞燉鮮鮑，撈底一如記憶咁足料，細細盅更覺乜都有啲，另一款 #竹笙烏雞 就較清淡。值得一提有胃口可以加錢配埋個餐，重點係識叫一定係要食佢個紫薯飯，淡淡哋有陣紫薯香同埋個口感亦比較一般白飯軟糯👄。至於糖水部分係私心追加，食飽飽都想養吓顏。兩款個人本身其待個牛乳花膠多啲，但食過又反而鍾意百合燕燉桃膠，口感豐富比花脹優勝，加上係極度足料！