鳴門割烹料理 (已結業)

我一向都好鍾意食日本菜，估唔到九龍灣嘅國際交易中心有咁高質素嘅日本料理餐廳😍佢哋嘅壽司吧檯都好靚呀！我最欣賞鳴門割烹料理好用心製作食物，擺盤又好精緻，而且每款食材都好新鮮，介紹返我哋嘅食物先：✈️日本新鮮空運秋刀魚刺身熟嘅就食得多，新鮮刺身真係第一次，肉質爽口魚味重，配合薑蓉同埋醋汁，好開胃呀！🌾豐御膳（一人前）打卡必叫！因為壽司盛盒以圓形既木架配上八件精美嘅壽司🍣每一件都極之新鮮又厚切，分別有拖羅、赤身、活赤背、紋甲魷魚、海膽、三文魚籽、三文魚腩同埋鰻魚，最突出一定係拖羅！入口充滿油脂甘香、海膽都好肥美因為佢哋用嘅係加拿大海膽！套餐仲跟埋三色刺身，牡丹蝦大隻爽甜又彈牙、赤身即係吞拿魚，油甘魚好肥美好鮮味。仲有天婦羅拼盤同埋牛肉稻庭烏冬。估唔到個烏冬都好高質素，烏冬好滑啲牛肉都好靚！跟埋日本柚子雪葩同埋白桃梳打🤩真係好豐富，大胃王都食得飽!🌛夕食～北海道刺身丼晚市定食都有好多款，配有麵豉湯同前菜芥辣八爪魚，上面仲有好多蟹籽😍真係好有誠意！蒸蛋都好好味😋重點係海道刺身丼竟然有齊晒我哋最愛嘅😍拖羅、油甘魚、牡丹蝦、帆立貝、海膽、三文魚籽、三文魚腩🤩全部都大大件厚切而且好新鮮，係食得出嘅鮮甜！