餐牌電子化，餐廳環境裝飾好清新，好少女風！店舖既一半位置係餐廳，一半係eGG眼鏡店，地方充裕。點餐過後無聊可以行過去睇下眼鏡，一個鐘頭左右拎得，食完野就可以有新眼鏡帶🤓
前菜方面叫左個芝士汁焗單骨雞翼
雞翼係用焗既形式製造，所以無油炸禁熱氣，但又做到炸出黎既香口感，而且内裏的雞肉嫩滑，做到外脆內嫩效果。芝士醬汁味香濃，同男友食唔停口，加上沙律菜作拌菜，令膩感大大減低。
主菜同男友每人擇一個
我叫左個溫泉蛋卡邦尼意粉，價錢便宜，但份量係同出面百幾蚊一碟既size 一樣，配料仲要係好豐富，温泉蛋滑嘟嘟，好流心，芝士同忌廉汁嘅比例適中，配料有煙肉蘑菇
而且有一大匙既黑松露，非常滋味，忌廉汁食落唔會膩👍🏻👍🏻
韓式咖哩蜜糖豬仔骨，又係勁勁勁抵食既主菜 😋 咖哩味道唔算太濃，配上蜜糖汁，淡淡既微香令豬仔骨更惹味！豬仔骨切開後有6枝，肉質唔鞋口，都幾多肉食，已禁平既價錢食到禁高質素同禁大碟既豬仔骨，真係唔錯！仲要配上新鮮沙律同薯蓉！薯蓉好creamy👍🏻👍🏻👍🏻
食完其實都有8成飽，但眼見餐牌禁多甜品選擇，唔食又好似對唔住自己😂有選擇困難既我最後決定每人一個甜品！！
法式梳乎蛋多士，未食過所以試下，但估唔到禁好食！多士炸到外脆，但入面係好似燉蛋禁香禁嫩滑，蛋味及牛油味香濃，食落似面包布甸既味，加埋個雪糕食，簡直 perfect !仲要有d生果伴碟，即刻減低罪惡感
朱古力愛好者絕不能錯過心太軟，呢到既心太軟朱古力味好香濃，裏面流心朱古力熱辣辣，配上凍冰冰既雪糕同粒粒芒果，仲要心太軟size都幾大個，正！
鐡觀音既微苦配上淡淡既玫瑰香，飯後飲用消脂一流。
呢度環境好，食物質素高，最重要服務質素都極高（食完意粉同雞翼後店員見碟污糟得登走過黎幫我地換新先再上豬仔骨👍🏻），價錢仲要勁平 （食禁多野只係$430左右），真係大推！
