裕一品四川雲南米線 (已結業)

舊公司主管不時都會專登過黎灣仔探望小肥，每次更例必請食晏 。由於深知XO仔鍾意試新野，食完又會寫食評，所以地點都係任由細佬去揀，今次選擇「裕一品四川雲南米線」亦是如此。可能「裕一品」新店位於橫行交加里，經常都有車輛阻擋，唔太起眼，舖位又唔算大，所以一點鐘去都唔洗等位 。食完就會知道其實小店唔係冇生意，而係因為廚房同樓面效率實在太高，食客基本上可以十五分鐘內搞掂 ，翻枱翻得好快。小肥一早喺OpenRice度睇咗餐牌，亦揀好食物，阿頭入座後即預先叫好食物，等細佬一到就有得食。食店以$29單售自選米線單拼$5餸配清湯，改轉烏冬只需加$2，以區內食肆黎講真係算好抵食 。 魚皮餃烏冬（$31）：「裕一品」個清湯底呈奶白色，味道清得黎好夠味，而且意外地一啲都唔油膩，食完一啲都唔會口乾，估計不含味精。碗內有三隻魚皮餃，清甜美味，形容為一品級 可話係合情合理，烏冬則屬普通貨式。