榮記粉麵

營業中

休息中

依加好多所謂富貴「車仔麵」，又花膠又鮑魚，配埋咩讚歧烏冬，但對筆者嚟講呢啲純粹拎車仔麵嚟做噱頭。就算已經冇哂鐵皮車仔檔，都應該要夠平民地痞，簡簡單單，廚師三兩下夾好餸搞掂，快靚正，先係車仔麵精粹。榮記食過幾次，唔係話驚天大好味，但冇食一排總有啲掛住。 例牌必點雞翼尖，淋身入味，愈食愈香口，豬紅滑溜唔腥，不過魷魚鬚就冇咩味，似用清水白烚咗好耐嗰種。湯底濃郁，襯米粉索哂湯汁應該好正，但我就永遠獨沽一味叫油麵，彈牙夠蛋香，非常唔錯。坐就唔係坐得特別舒服，不過正值疫情，食客之間空間都頗為足夠，加上店員態度有禮，距離感適中，一個人斯斯然嘆個麵都唔會焗促！