樂天冰室 (萬迪廣場)

營業中

休息中

【黃大仙區】【樂天冰室】買咗一位我好欣賞嘅女僕嘅生日 live show 嘅門票，可惜因工作繁忙實在已經冇能力再行開，於是草草咁放低我嘅祝福就走咗。都幾唔開心，一直都好唔想過一啲被工作綁住嘅生活，奈何就係貧窮限制咗我嘅放蕩，只能認命。咁嘢都係要食嘅，經過新蒲崗一間幾新淨嘅新派冰室，就入去充吓飢。叫咗個常餐，價錢係 $52 嘅。主食係「瑞士汁雞翼撈麵」，可能嗰陣有啲餓，覺得又幾好食，唔會太鹹，個麵又唔韌，雞翼仲幾肥美、幾大隻，唔錯喎。個配菜係「嫩滑炒蛋」、「火腿」同「牛角包」，炒蛋都幾香，火腿正常，牛角包都唔錯。餐飲我飲「熱奶茶」，嚟呢啲餐廳就係要睇佢杯茶，佢呢杯個茶底偏澀，如果本身係睇茶味重啲嘅朋友，可能會啱飲呢杯都唔定。跟住叫多份「優閒下午茶餐」，要咗 $30 嘅「出爐酥皮蛋撻」兩件，啲蛋撻夠熱已經贏咗一半，蛋香就算唔算濃都可以話係好食嘅。嘢飲我就加 $3 飲「凍奶茶」，有凍有熱先好玩，都唔錯嘅。埋單 $85，我覺得係可以嘅價錢。。。（地址：新蒲崗大有街3號萬迪廣場地下A號舖）#1amfoodie #foodie #hkfoodie #thatfoodiething #hkfood