Simplylife Bakery Cafe

營業中

休息中

【西貢區】【simplylife】夜晚八點幾同美女朋友喺將軍澳想食吓西餐，本身諗住食一間，點知嗰間明明閂十點，但話要清潔唔做生意，證明香港市道真係好。我哋就返返商場，去呢間全名 Simplylife Bakery Cafe 嘅集團嘢，去到嗰陣都成九點，講明要九點九交枱方便收舖，冇問題。先上餐包，正常水準啦。再火速叫嘢食。佢食 $258 嘅「澳洲肉眼扒」，配胡椒汁、香草焗番茄、烤大啡菇、卡真薯條，都幾好。我就食 $248 嘅「加拿大天然豬鞍架」，配芥末籽蜜糖汁、燒青黃瓜、香草燒薯，比我想像中差，塊豬扒來貨麻麻，冇乜豬味。我哋都有加 $38 要埋是日餐湯「蘑菇湯」同本季限定冰茶「芒果冰茶」，前者都可以，後者個味有啲怪，講唔出邊度出咗問題。佢哋有收加一服務費，不過又有八八折，唔知點計，總之埋單價 $570.2，兩個人食西餐嚟講係咁上下，只係性價比唔算好高咁解。。。（地址：將軍澳唐賢街9號PopCorn 1地下G43-45號舖）呢間餐廳我寫過其他分店嘅用餐體驗以及食物，如果想睇，可以打以下 hashtag 搜尋返嗰次嘅用餐體驗記錄：葵青區分店：1am1200#1amfoodie #foodie