大澳餅店

營業中

休息中

大澳漁村景觀靜雅，藍天白雲萬里，水上風光十年依舊，時間如同靜止🎏。而講到大澳名物，大澳餅店嘅沙翁必定榜上有名，每粒沙翁都係新鮮製作，長期大受遊客歡迎，平日14：30同朋友過到去，都有10幾個遊客排緊隊。慶幸佢哋嘅沙翁係keep住製作，等2-3分鐘左右就到我哋有得食，店主阿姨同店員哥哥亦好有禮貌，唔會催趕我哋。🥢沙翁 💰15 (👅：9.0/10)即炸嘅沙翁呈金黃色，形狀圓碌碌咁好飽滿，新鮮熱辣。沙翁表面沾滿幼細砂糖，為微微酥脆嘅外皮增加莎莎嘅口感；而內裏就似棉花糖柔軟綿綿，囗感上保留到少許濕潤度，鬆軟輕盈但唔會過份空氣。每食一啖都感受到濃郁嘅蛋香散發，砂糖入囗後亦會慢慢融化，帶出香甜。其實沙翁可以話係油同糖嘅組合，但我同朋友食完之後都冇好甜膩嘅感覺，感覺再食多一個都冇問題。呢種懷舊嘅滋味同漁村嘅純樸古貌相映成襯，為大澳增添咗唔少特色，令人懷緬。如果你嚟到大澳，真係不妨一試呢到嘅沙翁，體驗下地道嘅風味。