銘興山西刀削麵 (厚福街) (已結業)

【油尖旺區】【銘興山西刀削麵】嚟到尖沙咀厚福街呢邊，都唔知食咩好。可能有人見到呢段嘢就會即刻「上頭」，尖沙咀仲要係中心地段點會搵唔到嘢食呀。都冇講錯嘅，尖沙咀真係好多嘢食，問題係我得一個人，仲要我唔想食外賣，咁選擇又真係少咗。附近一個人啱食嘅嘢我好多都已經寫過，唔想翻炒食返之前食過嘅嘢，而我又冇好好搜集資料，見到乜就揀乜嗰隻。本身有間日本嘢都 okay，但佢個餐牌寫得有少少唔清晰，驚佢係貴嘢，所以之後見到呢間刀削麵就即刻入去。第一次食梗係睇佢嘅「招牌推介」，我就叫 $78 嘅「花雕醉雞刀削麵」，仲加 $10 將個上湯刀削麵轉做「冷拌刀削麵」，估唔到個麵都幾煙靱幾有嚼頭，掂。反而咁樣將個花雕醉雞嘅好感壓咗落去，其實個雞都整得唔錯嘅。餐飲我加 $3 飲「凍檸茶走甜」，都係茶記水準。另外我仲叫咗個風味小食，係 $35 嘅「脆脆春卷」，估唔到都幾多，同埋熱辣辣加脆卜卜，幾好食。呢餐咁樣食法食咗我 $126，就咁睇好似略貴，不過喺尖沙咀就真係冇計啦。。。（地址：尖沙咀厚福街2號地下A號舖）#1amfoodie #foodie #hkfoodie #thatfoodiething #hkfood