人大咗，成日都會諗返起以前嘅事，想返返去過去美好嘅時光。最近有人介紹小編去襟江酒家 @kamkongrestaurant，話嗰度充滿懷舊色彩，本身諗住係嗰啲擺下懷舊裝飾嘅餐廳。🙂↕️原來佢堅係香港百年老字號，始於1909年。旺角呢間就係延續咗呢個百年品牌，堅持傳統推車仔整手工點心，夜晚就有特色懷舊菜套餐。🫶🏻🫶🏻
茶位（$16pp)
忘不了滋味二人套餐（$588）
手工點心🥟🥟
套餐可以揀一款點心，視乎當晚點心車有咩供應，我哋就揀咗襟江蝦餃，大大粒好飽滿，滿滿蝦肉，皮唔會過厚。推薦大家要試吓佢哋嘅辣油，係舒服嘅辣，仲有少少海鮮味。
懷舊金錢雞 伴 燒味三小品（蜜汁叉燒、燒腩仔、海蜇燻蹄）🐖
燒味師傅係老細特邀大圍小館嘅師傅坐鎮，蜜汁叉燒大大嚿都唔會韌，燒肉脆皮，仲有懷舊金錢雞。好細個喺元朗金記燒臘食過一次，其他地方好難搵到，集瘦肉、冰肉、雞肝於一身，口感味道都非常豐富。
蝦籽柚皮🍊🍊
另外可以喺十幾款小菜入面揀一樣，小編就揀咗呢個功夫菜蝦子油皮。呢款菜式喺出面越嚟越少見，皆因佢製作程序複雜，要經過多次汆水先可以去除柚皮苦澀味。呢間嘅柚皮冇乜苦澀味之餘，仲非常軟腍，而且上湯、蠔油扣得非常入味。
清蒸忘不了🐟🐟
呢個餐嘅主角係呢條忘不了魚，之前喺馬六甲一帶非常之紅。魚肉嫩滑，帶微微果香，調味仲帶少少酒香。佢嘅魚鱗亦都可以食用，口感韌韌地，都幾有趣！不過河魚始終比較多骨，大家要小心享用啦。
太極鴛鴦炒飯（+$108）🖤🤍
呢個係彌補小編細個嘅遺憾，細個成日想食鴛鴦炒飯，但屋企人往往會嫌佢多汁（太甜）、冇鑊氣而婉拒。小編而家終於食飯自由，可以叫自己鍾意嘅餸菜。太極係指茄汁雞絲同白汁蝦仁，兩款汁各有各性格，由相得益彰。最令我意外嘅係，雖然佢咁多汁，但仍冇影響到飯底嘅鑊氣，私心推介！
甜品：民豐糯米糍🍡🍡
估唔到呢度有荃灣嘅名物食！佢哋嘅糯米糍出名大粒飽滿，仲有開心果同芝麻兩款口味，夠晒誠意啦啩？
(需加一服務費）
襟江酒家 (旺角)
旺角登打士街56號家樂坊8樓801號舖
#襟江酒家 #旺角美食 #忘不了 #香港美食 #百年老店 #港式酒樓 #粵菜 #hkfoodies #講玩講食 #探店 #香港必食 #香港美食 #食評 #香港食評 #香港生活 #小紅書 #hkig #hkfood #hkfoodie #hkeat #mongkok #mongkokfood #nostalgia #traditional #酒樓 #茶樓 #百年老店 #懷舊 #懷舊香港 #那些年
