粥粉麵飯 (已結業)

【中西區】【粥粉麵飯】疫情之後，堅尼地城嘅美食愈來愈多，我同春哥嚟到附近做嘢，見到佢哋好有氣勢嘅門面，就被佢吸引咗入去。去到發現佢哋原來唔止淨係食粥粉麵飯，仲有打邊爐、飲酒等等可以試，幾全面。我哋先試 $88 嘅「揚州炒飯」，啲飯炒到一粒粒，又幾好食喎。估唔到佢哋仲有點心食，好鍾意食點心嘅我試咗三款，分別係 $32 嘅「蟹子燒賣」、$36 嘅「蝦餃」同埋 $28 嘅「鮮竹卷」，以點心嚟講佢哋嘅質素一啲都唔差，拍得住某啲酒樓呀。之後試咗碟 $108 嘅「荔枝咕嚕肉」向女同事致敬，又幾好食，仲有荔枝肉。嘢飲方面，佢哋都幾多選擇，除咗有茶餐廳飲品之外，仲有啤酒、紅白酒，但係我就試 $19 嘅凍「蜂蜜生薑茶」，又幾好飲，薑味好足，薑味控一定中意。春哥就試 $19 嘅凍「蜂蜜柚子茶」少冰，佢都話唔錯。咁樣食法，埋單價加埋一先 $363，係抵食嘅。。。（地址：西環堅尼地城卑路乍街163號聚賢逸居地舖及1樓）