英王麵包店

營業中

休息中

因家住美孚，所以，都不時經過呢一家港鐵內嘅「A-1 Bakery」，雖然，小弟就唔喺咁經常幫襯，但食過佢哋啲歐陸包及蛋糕，都有一手，質素唔錯。今次又路經，睇見鋪前擺放一啲烘焙產品，口痕痕就賣一個返去當下午茶。雖然大大張宣傳照，有3款烘焙產品，包括最新出嘅沖繩紅芋批，以及青森蘋果批及焦糖芝士蛋糕，不過，最想試，又知老婆會好啱食嘅沖繩紅芋批，喺無貨，問過店員，亦話時有時無，返貨唔穩定，就算有都喺嚟好少量！咁就唯有試試青森蘋果批。青森蘋果批 $58拎上手時，咪睇個蘋果批好似細細個咁，其實非常墜手，好有份量，而且，外皮焗得非常金黃靚仔，切開出嚟睇睇，都睇得出有好幾層，面頭嘅酥皮都算脆口，而中間嘅蘋果蓉清甜而帶有玉桂香味，內裡就混入好多微微酸香嘅蘋果肉，味道豐厚；而再下一層睇官網就話喺杏仁餡，不過，可能玉桂同蘋果嘅香味頗突出，所以，個人就唔太覺得有咩杏仁，最底下就仲有一層海錦蛋糕加酥皮底，故此，口感實在，又富層次。我哋試完室溫下食，跟住又試翻焗後食，都喺焗番熱香啲、好食啲！一件青森蘋果批、一杯手沖咖啡，喺依家成日要留晌屋企嘅日子下，都喺一種小確幸！