係糖街Sugar+「瀧宴日本料理」，絕對係大改觀，
由師傅嚴選世界各地時令食材，將食材保留到原始鮮味，
再加以烹調，將鮮味帶到另一個層次，絕對係一絕。👇🏻
📌瀧 宴 - $1,680/每位
▪️ 季 節 前 菜 -
▪️ 季節刺身二款 -
▫️ 前菜先黎一個「螢光魷魚」，食落口感彈牙，面頭配搭三文魚籽，
帶少少鹹香味，底層有D俗稱京都湯葉既日式腐皮，質感好滑溜；
而刺身就有兩款「鮫蝶魚」同埋「中拖羅」，鮫蝶魚旁邊有一個
火炙過既裙邊，焦香感十足；「中拖羅」入口肥美嫩滑，無比甘香。
▪️ 野 生 大 虎 蝦 -
▪️ 香 煎 銀 鱈 魚 -
▫️ 「野生大虎蝦」師傅將蝦頭、蝦身分開，用檸檬汁將蝦肉更帶出鮮味，
食落肉質紮實飽滿夠彈性，蝦頭輕輕煎香，入口濃郁蝦膏味，正；
「香煎銀鱈魚」賣相非常吸引之餘，魚肉入口啖啖油香，
肉質嫩滑，面頭既魚皮煎到好似薯片咁脆，相當滿足！
▪️ 南 非 鮑 魚 -
▪️ 美 國 頂 級 牛 肉 -
▫️ 輪到主菜環節，呢個「南非鮑魚」食落爽口彈牙，師傅以牛油炒香，
再係面頭灑上三文魚籽，鹹鮮味提升不少；另一款「美國頂級安格斯牛肉」
亦有驚喜，以厚燒既就配上炸蒜片一齊食，薄燒既裡面已包左蔥蒜，
再點上黑椒鹽就更好；旁邊附上落左柚子汁既洋蔥，可以清除味蕾，解一解油膩。
▪️ 鹿兒島櫻花蝦炒飯配炒什菜 -
▪️ 季 節 吸 物 -
▫️ 最後就上埋個「鹿兒島櫻花蝦炒飯配炒什菜」，
飯粒炒得粒粒分明，夠哂乾身，食落脆卜卜，仲食到櫻花蝦香味；
「豆腐鮮魚湯」師傅用左幾款新鮮魚熬煮而成，
配搭准山，豆腐，入口鮮甜無比，滑到不行呀。
▪️ 日 式 雪 糕 -
▫️ 食埋個雪糕就更正啦，我同朋友分別嗌左個「柚子雪芭」、
「黑芝麻雪糕」口味，前者柚子非常清新，後者濃郁芝麻香，唔錯。
