尚善

營業中

休息中

新年返工係咁食食食，今日lunch又試新野，去左上環食日本菜。今次去尚膳，位置唔算就腳，但午飯時段都一樣爆，雖然有book位，但都要等，可想而知中上環打工仔，食餐飯都幾困難。 下午有lunch set，所以我地都係主打魚生飯為主，因為有同事早前試過，覺得不錯，大家跟佢揾食。今次一行6人，叫左2個雜錦魚生飯，3個香葱吞拿魚腩飯定食及1個海鮮鍋。 上菜速度算快，落單無幾耐就到。雜錦魚生飯成個set咁上，有沙律、湯、魚仔乾及蒸蛋。 魚生有成10款刺身咁多，而且好新鮮。刺身大大塊，尚算美味，但吞拿魚就有好多筋，美中不足。 吞拿魚腩成個肉餅咁，好厚肉，成層粉紅色的魚蓉鋪係日本飯上，好吸引，味道都夠鮮味 值得一讚係個蒸蛋，好滑，要趁熱食。 個海鮮鍋都足料，大蝦、青口、帶子及一眾蔬菜及豆腐，滿滿的一鍋。同事大讚蝦好鮮甜。 跟餐仲送餐飲及甜品，每人埋單$230，唔算好抵。但值得一試。不過唔就腳的話就唔使特登去試。