影片
營業時間
今日營業
11:30 - 17:00
星期一至五
11:30 - 20:00
星期六
11:30 - 17:00
星期日
全日休息
以上資料只供參考, 請與餐廳確認詳情
668 瀏覽
講起香港街頭美食，車仔麵絕對係榜首。當然，有香港人會話係牛雜、碗仔翅或者其他，但絕大部份六七十年代非常普遍的推車美食已經絕跡街頭、未能成功入舖；惟獨車仔麵仍然屹立不倒兼入了舖頭，可說是奇葩。上個月，發現近兩三年的人氣車仔麵店【三不館車仔麵】原來在觀塘開了分店，今日就去試試。食過咁多間車仔麵，始終最鍾意都係灣仔【車仔麵之家】及元朗【永年士多】，也是不少香港人心目中的好味道車仔麵。【三不館車仔麵】作為後起之秀，大埔總店開業只有短短五年光景左右，如何突破重圍，吸引媒體及食客目光？首推其特色裝修。觀塘分店秉承其他分店的六七十年代裝修風格，甚至伸延到小店外牆 - 墨綠色門框配搭綠色主調紙皮石鋪切的外牆。這種今時今日被視為老土的顏色配搭及裝修物料，正正是六七十年代涼茶舖、冰室甚至唐樓家居的時尚裝修風格！室內裝潢充滿六七十年代風情。雖然並沒有一件真正屬於那些年的懷舊物件，但每一處地方的裝修用色、採用的字體、牆身的紙皮石及紅色燈罩加燈膽，成長於那些年的香港人一定會心微笑；80、90後一代就沒有那麼大的感覺了。全部都係那些年大排檔的摺檯摺凳，簡陋、地踎，但又有親切感。這兩塊招牌最抵死，用字生鬼又有趣。小店面積細小，但居然有四至五個伙記 ⋯⋯ 皆因枱凳擠迫、客人數量多、流量又快；其實，按照客人 / 夥計比例計算的話，並不算真的很多伙記。基本組合有兩餸麵（$37）及三餸麵（$46），如果每款車仔餸貴過 $10就要補差價。粗略計算一下，即係粉麵及湯底要收 $17 ?! 但如果只係揀凈餸(四款餸起)，湯底又唔需要另外計錢 ⋯⋯ 即係叫凈餸更抵食！有齊傳統推車檔的車仔麵餸款式，亦有近十幾20年才出現的雞翼、腸仔及各種急凍丸類 ⋯⋯ 很懷念那些年差不多全部用新鮮食材炮製的車仔麵餸，更懷念那些年只需要一個 $5大餅已經可以享用三餸車仔麵。車仔麵的清湯底少不了加入味精，但份量唔算多，飲多幾啖也沒有口渴舌頭嚡，甚至品嚐到少許豬骨雞殼的清甜鮮味。今次總共叫了 4款車仔餸，包括豬大腸、蘿蔔、豬紅及冬菇，揀最普通的清湯底（不用另外加錢），共計 $43。豬红（$10）首要條件就是不會一夾就散、變成碎濕濕，這一點做到了。咬落口煙煙韌韌兼且腍滑，又盡吸湯汁，非常入味。正！清甜蘿蔔（$10）上面的辣醬是「小小辣」份量。自家炮製的辣醬夠香夠濃，辣度唔算很高。蘿蔔雖然切得非常大塊，但炆得夠腍。味道清甜，蘿蔔皮又㓟得徹底，沒有渣滓及苦澀味。蠔油冬菇（$10） 夠厚身，炆得很腍，咬落亦爽口，但由於沒有剪走冬菇莖，硬身的冬菇莖影響了口感。味道方面，蠔油味唔夠香，冬菇本身又有一點點餲味（冬菇質素唔夠靚），影響了冬菇的味道。滷水新鮮豬大腸（$13）的內壁殘留了一點點脂肪，增加味道及口感。幼身大腸腸壁較薄，質感較軟腍、容易咀嚼；至於粗身大腸有標誌性的厚牆壁，質感腍滑中又帶點纖維性煙韌，需要較多的咀嚼。兩款大腸都係「有咬口」的質感，但又不是那種難以咀嚼的韌，口感很好。豬大腸的臊味漂得夠徹底，加上濃淡適中的滷水，味道很好。由踏入【三不館】一刻直至食完離開，整個過程大約只需 20分鐘，仍然維持傳統推車檔文化的速食特色。此店的最大特色係裝修風格，夥計服務態度搞笑是另一個優點。至於味道方面，屬於中上水平，勝過不少車仔麵店，但又未去到前列位置。總體而言，仍然值得一試。
繼續閱讀
聽講平時呢度好旺場，咁啱今日12:00經過唔使排隊，就入去試吓。價錢合理，味道正常，但冇話好有驚喜。佢嘅鮮製油麵幾唔錯。其餘嘅餸就OK啦，加錢要嘅牛腩份量唔係太多。總括嚟講都係合格嘅，叫做喺呢一區多個選擇，呢度鋪面唔係太大，竟然有四五個職員，犀利犀利 收銀機應該係老闆娘，都好有禮貌。
繼續閱讀
食過大埔同旺角，味道係有自己俾自己嘅信心保證。平日見佢九排Z形，今日居然零人龍，當然就入去回味下。其本$37兩餸一麵，$46三餸麵。自己叫豬腸、咖喱齋、粟米豚肉餃子配油麵跟麻辣汁，承惠$50大元。豬腸實身，唔係淋款，唔騷，可惜最後疑似食到沙，「實實」聲。咖喱齋大大舊，炆得夠時間。餃子實身，肉厚，鍾意面粟米，香甜。油麵真要試，雖然叫油麵，一啲都唔油，無坊間嗰陣味。整體滿意，但男士應該唔夠飽，建議加底加餸。
繼續閱讀
可能唔少人都聽過呢間🤪大埔嘅馳名車仔麵 bookmark咗佢好耐但一直都嫌遠冇去🤣而家佢喺觀塘開咗分店 就去試試佢🤭.平日lunch hour排晒長龍不得不説佢唔系順序比啲隊入嘅😅我哋兩個人 但有3人枱就後面3個人先咁搞法都等好耐下🥲🔸三餸一麵 $46史努比見佢好多湯底都要加錢 麵又加錢同埋好貴呀加成$8出名啲嘅餸又要加 本身$46都唔系話好平 加加埋埋仲得了🥺最後史努比揀咗啲唔使加錢嘅湯同麵 其中一個配料就揀咗要加錢嘅😌👍🏿米粉(美顏清湯)米粉份量足嘅 一絲絲口感幼滑都唔錯試咗啖湯 清甜嘅😚唔系嗰啲好重口味嘅車仔麵同埋唔似msg👍🏿味道: 7.5/10👌🏿咖喱魷魚 +$5就系佢要加錢!魷魚爽彈有咬口🤪應該用咗水魷佔滿咖喱味好夠味~留意史努比話好夠味唔系好惹味😌原因系佢嘅咖喱汁連史努比都唔系好覺辣 反而系偏甜嘅 而且冇乜咖喱嘅香味🥺後來仲食到一件魷魚唔系好夠爽口😗對佢有啲保留~唔系話唔好食嘅但好普通再揀嘅話唔會加錢食佢~味道: 6.5/10.👌🏿豬紅呢樣系史努比基本上去邊度食車仔麵都會嗌架啦🤣總共有4件 味道正常 夠入味🤭炆到好淋 但史努比略嫌佢太淋啦😂冇咗豬紅食落少少Q彈嘅煙韌咬口感覺上普通冇乜特別~味道: 6/10.👌🏿蘿蔔食車仔麵要知一間舖如何 食佢嘅蘿蔔好緊要🫵🏻所以史努比對蘿蔔都有返咁上下要求🤭今日呢間嘅…質素好唔穩定🥺有3大舊啦 史努比一開頭食嘅時候真系好失望本身佢條白蘿蔔唔錯架 唔系嗰啲空心蘿蔔🤣但炆嘅時間未夠就攞出嚟🥲咬落去系硬嘅…亦冇乜甜味梗系啦都未炆夠就攞出嚟!所以咪冇乜味囉😗最後有一舊系炆得夠淋夠入味架!但得嗰一舊 而且開頭食嘅時候已經留咗個壞印象比史努比補唔返😌味道: 5/10Overall性價比: 7/10🔸兩餸一麵 $37爸爸👨🏻揀咗油麵 古法辣汁其實個湯同清湯分別好似不大只系加咗佢哋自家製辣醬上去~爸爸👨🏻話開頭食嘅時候唔太辣 但有後勁🤣配料就揀咗墨魚丸同+$5嘅懷舊牛腩爸爸👨🏻見到第一時間系話墨魚丸得嗰兩粒嘅😅反而牛腩嘅份量就比足雖然史努比冇試到啦但最後爸爸👨🏻都話普通不過不失😗史努比嗰日着校服所以有嘢飲送🤣但唔鍾意飲嘢所以揀咗可樂比爸爸👨🏻🤭另外枱面上有辣菜脯同辣醬任加辣菜脯切得好碎 就咁食就普通配麵一齊系ok嘅史努比平時唔好辣 但個麵加咗辣醬多咗香味好似好食啲🤣*不設加一服務費*老實講對呢間系失望嘅佢唔系伏亦唔系話唔好食但就真系好普通 系間價錢稍貴又唔系好出色嘅車仔麵😗(史努比冇乜點嗌加錢嗰啲所以先平啲)加上又要排隊 應該唔會再回頭史努比亦都覺得唔似冇乜損失好彩之前冇特登走去大埔食😌但亦有可能大埔總店質素比較好🤔Anyway la史努比就唔會再去架啦🤣服務系正常嘅有個姐姐仲特別熱情🤣爸爸👨🏻跌咗隻筷子佢即刻收走叫我哋攞過第二對😳比人感覺乾淨企理嘅~整體評分：味道: 6.3/10環境: 6.2/10服務: 7.1/10衛生: 7.5/10抵食: 7/10
繼續閱讀
I don’t care cart noodles 係充滿香港情懷的一間車仔面，現又殺入觀塘，係觀塘打工仔嘅朋友，又多一個選擇啦，平時觀lunch hour 每間餐廳門外，都排長龍，車仔面點又少得，車仔面同茶記一樣翻枱速度快。裝修同其他分店一樣都係用摺檯摺凳，充滿着懷舊感，具有特色。今次我叫左河粉，瑞士雞翼，咖哩魷魚。湯底係牛腩汁同古法辣汁，辣度可以自由選擇，雞翼好入味，河粉算偏幼身，但唔係好容易碎。茶記奶茶 正常水準，茶味香濃，口感亦算滑身。
繼續閱讀