影片
更多
2023-10-14
172 瀏覽
話說Wedding Anniversary 想訂週年飯餐廳，回想都同老婆食過都唔少類型嘅餐廳，平時食開嘅中餐、西餐、日本菜，自助餐又好似無咩新意，咁啱又見到呢間餐廳做緊新開張嘅post，見到佢哋係平時好少見嘅黎巴嫩阿拉伯菜，心諗都可以有啲新嚐試，新以就經由Openrice訂咗檯啦。當日，餐廳位於尖沙咀山林道，交通都算方便，去到門口有一個好搶眼寫咗阿拉伯文嘅藍色招牌，週圍有唔同嘅植物做裝飾，入到去餐廳成個天花都有粉色系嘅彷真植物佈置，配以阿拉伯特色吊燈，牆身就用咗藍黃相間嘅木條加織物橫幅，地面就舖咗啲條狀花紋磚同木地板，整體裝潢簡潔得嚟都有特色。入餐廳一刻，門口已經有個識廣東話嘅員工嚟招呼我哋，confirm 咗booking 之後就入去啦。嗰陣7點零鐘，可能新開張，餐廳內只係坐咗三分一人到。餐廳有分前後兩邊，前面近入口主要係吧檯區，後面係主用餐區，另一邊仲有個VIP房，都滿足到唔同客人嘅需要(後嚟同員工傾計嗰陣得知佢哋係響蘭桂坊嗰邊做咗好多年之後自立門戶，所以都好熟香港人夜生活嘅模式)。我哋揀咗後面用餐區，坐低之後就比咗個menu 我哋。menu非常簡潔，菜式都分開晒類別同講解到菜式入
當日，餐廳位於尖沙咀山林道，交通都算方便，去到門口有一個好搶眼寫咗阿拉伯文嘅藍色招牌，週圍有唔同嘅植物做裝飾，入到去餐廳成個天花都有粉色系嘅彷真植物佈置，配以阿拉伯特色吊燈，牆身就用咗藍黃相間嘅木條加織物橫幅，地面就舖咗啲條狀花紋磚同木地板，整體裝潢簡潔得嚟都有特色。
入餐廳一刻，門口已經有個識廣東話嘅員工嚟招呼我哋，confirm 咗booking 之後就入去啦。嗰陣7點零鐘，可能新開張，餐廳內只係坐咗三分一人到。餐廳有分前後兩邊，前面近入口主要係吧檯區，後面係主用餐區，另一邊仲有個VIP房，都滿足到唔同客人嘅需要(後嚟同員工傾計嗰陣得知佢哋係響蘭桂坊嗰邊做咗好多年之後自立門戶，所以都好熟香港人夜生活嘅模式)。我哋揀咗後面用餐區，坐低之後就比咗個menu 我哋。menu非常簡潔，菜式都分開晒類別同講解到菜式入面用咩材料整，所以都好容易分開同清楚自己叫咗啲咩。
但係因為無特別點做功課，所以就向員工問吓有咩推介，佢都好熱心咁同我哋介紹menu每個category上嘅介菜式同招牌菜式同佢哋煮法。聽完講解之後就問員工我哋係慶祝wedding anniversary會唔會有咩特別service可以安排到(菜/甜品上寫點嗰啲)，佢話無特別呢啲安排，所以有少少失望，但都無特別影響我哋對餐廳嘅期待。
介紹完之後，同老婆商量咗一陣，就叫咗半打生蠔、沙律，冷、熱盤小菜各一同一碟main course。
首先嚟嘅係嚟自法國嘅Fine De Claire生蠔，嚟嘅時候係有連冰盤上，上面加三種唔同醬料同檸檬去點生蠔。平時我哋唔算多食生蠔，呢款生蠔作為西餐常見嘅生蠔品種，新鮮之餘都易入口，配合唔同醬料產生唔同嘅風味，作為開胃頭盤非常合適。
跟住就到沙律，我哋點嘅係薄脆沙律(Fattoush)，佢響沙律配菜之上再加上車厘茄、青瓜，仲有薄荷葉、石榴同中東麵包條，以沙律嚟講層次可以講係十分豐富之餘又富有中東特色，好refreshing。
接住就嚟冷盤小菜(Cold Mezze)鷹嘴豆蓉(Hummus Beiruti)，顧名思義佢就係將鷹嘴豆打成蓉嘅菜式，配以芝麻醬，上面再配以橄欖油、醃菜碎同少少香料拌碟，再加上香噴噴嘅心pita bread同nachos，兩者配合得非常好，豆蓉順滑嘅口感同醃菜嘅清新感覺令味道好豐富，同埋個烤麵包實在太香同個豆蓉好夾，我哋都忍唔住要encore啲麵包多一round。
再嚟就係熱盤(Hot Mezze)下嘅招牌菜 – 烤西班牙八爪魚(Grilled Octopus)啦，佢係將巨型醃八爪魚鬚燒好之後再加鷹嘴豆同香料薯蓉伴碟。仲有用墨魚汁畫碟底，非常吸睛同Igable。八爪魚食落去肉質係緊實之餘又唔韌，又有烤八爪魚嘅香味，咸味又好適中，薯蓉加咗香料之後口感細滑之餘都唔會覺得平淡。
經歷過多輪味覺衝擊之後，我哋最期待嘅main course – 招牌羊腿(Signature Lamb Shank)啦。據餐廳員工介紹，佢係用精選羊膝，加上中東香料醃製下再慢煮12個鐘，配合埋其他配菜泡製而成嘅菜色。羊肉響長時間烹煮下非常軟稔易入口，羊響入口嗰吓，香味響口腔四散而又無騷味，平時好怕食到羊騷味嘅老婆都話係佢食過最好味嘅羊肉之一。
響食完主菜滿足之際，突然傳嚟一陣陣燒烤嘅香味，細望週圍之下得知原來係附近檯點嘅混合烤肉set傳出嚟嘅。雖然有加菜嘅意慾，奈何我哋兩公婆食量有限，今次只好作擺。享受完main course之後，到最後甜品環節，佢係米布甸(Rice Pubbing)(呢個係餐廳嘅開張優惠送嘅)，佢係由米飯加牛奶同香草混合而成嘅甜品，佢口感係好棉滑嘅糯米飯，但係佢嘅米香係更加突出，係今次用餐嘅一個完滿嘅收尾。
總結成個用餐體驗，員工嘅用心同精心製作嘅餐點，令到今次嘅結婚週年慶祝飯好滿意，呢樣令我哋感受到為數唔多餐廳會有嘅hospitality(最少好難得會響呢個價位能夠體驗到)。今次係加上開張優惠折扣，令本身已經高嘅性價比再提高一個層次，呢間餐廳絶對值得encore!
張貼
