麗都餐廳

營業中

休息中

一早去吃早餐，經過佐敦麗都，見剛開張便進去試。由於人多須搭枱，這個情況在香港實屬正常，但麗都的枱太細了，四人枱剛好放下四份早餐密鋪平面。最令本人感到失望的是早餐叫了豬潤麵，結果變成碎潤麵。

由於工作關係，屋企成日都唔會煮飯，基本上每餐都係出街食，今日放工經過，見到有間新餐廳就入來試吓，今次叫咗個中式牛柳，入去坐低左成3分鐘都仲未有人幫我落單，唔知係唔係佢新開張嘅原因，好似唔夠侍應咁，不過佢個收銀見到我想落單，都好快叫咗個侍應過來幫我落單，上菜速度都算很快的，個人比較唔鍾意坐圓枱，因為我好多衫都係牌子，好驚啲侍應喺後邊攞住碟餸行來行去，好彩呢度大部份都係卡位，算係坐得好舒服，中式牛柳，以茶餐廳質素，都算比一般茶餐廳水準高，同埋餐廳裏面望返出去，可以好清楚望到條街，下次揸架車泊喺度都唔洗再怕俾人抄牌，食物價錢仲要咁平，俾個讚你

一開頭見佢啲牛扒都幾抵食所以嗌咗menu最貴嘅牛扒嚟食， 點知仲難食過惠康買嗰啲， 嗰個侍應 衰到冇朋友， 我搵唔到嘢飲嗰版menu 就問下個侍應係邊度 ，佢問我有冇讀書連飲品menu都搵唔到呀。 原本喺廟街嗰陣我都係麗都嘅捧場客，你老闆我保證以後唔會再幫襯呢間餐廳。

多日沒有喝奶茶，今日癮起，便在白加士街找間茶記搵食。本想試美新茶餐廳，但見到openrice的網友食評，評價頗差。實在無謂摶，便又到隔離的麗都，最少我自己幫趁過。今次點了特餐B（$40），有叉燒湯意粉+火腿奄列+厚多士，熱飲叫了茶走。叉燒湯意粉的叉燒賣相不錯，是厚切的，味道不錯。不似有些茶記的叉燒，又乾又瘦色澤又差。要讚的是湯底燙口地熱，極怕吃到溫吞水般的湯水，可惜味道稍淡。意粉的質地亦有彈性，軟硬適中，很多湯意粉都會煮得過軟。厚多士烘得也好，我沒加牛油，吃起來亦香脆。火腿奄列的味道尚可，但是太油了，如果是炒滑蛋就會為這個特餐加分。茶走的味道比奶茶好，多了煉奶的香味，甜度亦剛好，完全滿足了我的茶癮！

在九龍公園做完運動，便去白加士街搵食，我想發掘新的食點。行著行著，見到麗都餐廳在店外掛著橫額，寫著12月14日已開始營業。這才想起，之前的一間，好像是標榜賣順德魚湯的茶記，因曾中伏，所以沒留意店已易手。見到餐牌也不錯，便進去試試。店內的環境不錯，在這區來說，座位算是寬敞舒適，且有兩個舖位的面積，相信只有在繁忙時間，才較擠迫。不過白加士街是條食街，選擇極多，除了澳牛外，其他很少是長龍店。自從開始寫食評，我現在試新店，都會選擇簡單而較少機會中伏的食物，寧願試過好的話，再來大吃！坐了一會等到2:30下午茶時間，便選了$30的法蘭克福腸熱狗，配熱奶茶。熱狗做得認真，用一個接近10吋長的熱狗包，開邊塗上薄薄的牛油焗熱，一整條蘭克福腸用生菜包著，伴著兩片蕃茄。腸沒有煎、炸或焗過，應該只是用水灼熱，用沙律醬以S型加在腸上，沙律醬內有些酸青瓜粒。整個熱狗有蔬菜作配料，味道清新可口，不油不膩。不過因沒有用竹籤來定位，吃起來有點狼狽。奶茶也很好，茶味濃但不澀，淡奶份量剛好，上檯時亦夠熱，不錯。很滿意這次試食，也高興在這區，我的心水開飯食肆又多一間了！