麗苑酒家

營業中

休息中

去完新界西北玩咗一轉，返到嚟已經買唔切餸。唔主要情況下，老竇提議再嚟呢度食晚飯。今次完全成功避開咗節日前後嘅套餐要求。試咗去食炸子雞，個皮係做得幾好嘅夠脆隻雞都滑，但係個底味就有啲偏淡。個酸菜魚啲魚片份量都幾足都夠滑。可惜嗰湯頭唔夠辣，酸度就剛剛好。元貝都尚算鮮甜，都清洗得幾乾淨。因為唔係好多地方有無錫骨食，見到佢個餐牌有就叫嚟試吓。呢個反而酸到有啲罅喉，個味完全Over咗。食完晚飯，見佢好似啲舊式酒樓有糖水比客人。但係佢送完俾一檯熟客（成晚有講有笑）之後就冇晒。呢方面係明嘅，但係另外幾檯就奉上糕點，而俾我哋嗰啲上邊有一點黑色嘢，老媽子見到就同佢講，侍應拎去掉咗佢，但係又冇話再俾碟新我哋。後來個侍應見我哋等咗好耐，佢先出聲同我地講頭先嗰碟已經係最後一碟。事實真係唔怕講，送晒唔緊要，但係最基本都要同個客交代一下。上述用餐服務體驗為個人之食後感。其實喺屋村嘅酒樓，客源相當重要，唔係單單靠一兩檯熟客就可以維持到夜市，希望酒樓負責人見到此食評可以有所改善。

1月22日返屋企途中見到佢喺出面有張海報，話有一蚊炸子雞，就諗住星期五放工同屋企人去食。因為放工遲返，屋企人就先去搵位。點知屋企人坐落，先知道佢暫停一蚊炸子雞又已經轉左賀年餐單。食飯嗰日只係1月24日，張海報當晚仲喺度。最後都焗選咗三個餸，落嘅時候，侍應call去燒味部係話有半隻燒鵝，點知入完單就話冇要等45分鐘。嗰一刻真係想即刻走，但係費事啲老人家走來走去，所以就焗食。XO醬炒雙蚌，紅色嗰個睇得出象拔蚌仔，白色嗰個冇味唔知咩蚌，成個餸好彩有少少XO醬調味。小炒王啲料都當，不過都係冇味。隻燒鵝最後等咗1個鐘頭15分鐘。本身夠45分鐘嘅時候佢就俾咗一隻遠嘅張大枱，跟住再等咗半個鐘先斬咗半隻比另一張遠處嘅中枱，最後嗰半隻先去到我張枱。佢淋得太多汁真係淨食到汁嘅鹹味，食唔到隻鵝肉味。太鹹所以屋企人叫啤酒，但係牆上面海報嘅價錢又唔係而家做緊嘅價錢。明白過年未必有相關嘅推廣，但係最好寫明或者換咗啲海報佢，唔好令消費者有所誤會。此食評為事次用餐個人之體驗，希望酒樓管理層可以了解新店的營運問題。