逸月軒

營業中

休息中

逸月軒酒樓喺網上都好多人討論，好壞參半，自己試吓早茶就知道龍與鳳，平日去到酒樓，去到都幾多人等位，生意唔錯喎。去到酒樓都要等咗一陣，不過都好快工作人員安排入座，重有可以選擇唔搭枱，疫情之下，這個安排非常之好。點心叫了蝦餃，排骨飯，燒賣，牛肉腸粉，鮮蝦腐皮卷等等。蝦餃，蝦很新鮮，皮薄餡靚，超級好味。燒賣保持一貫嘅水準，蝦同豬肉嘅比例好適中，好食。排骨飯，排骨就有啲雪味，飯就煮得太爛，咁多點心之中係最差嘅一款。鮮蝦腐皮卷一啲都唔油膩，超班合格。

服務又差 叫極都無人來 價錢又貴又唔好食 同以前食 差好遠 愈來愈差 無下次 質素每況愈下啲黑金包又硬唔好食 … 十分難食 ，唔會再來食，叫加茶 叫極都無人來 拎左水壺 拎左好耐又唔拎返來

侍應及部長態度非常差，我們1:45pm進入，侍應呀姐話未開始下午茶，但我們堅持說唔等下午茶啦，因為太肚餓啦，侍應已經開始黑臉，我們坐低即刻叫左個中午價錢的套餐及點心，食飽後再看看其他枱有D顏色點心纸，問返嗰位黑臉呀姐，只是問吓啫，再次黑臉兼提高聲綫說：你地唔可以食下午茶！無問題！我地咪再叫返正價點心囉，點解要比臉色我睇呢？仲有我地係黎飲茶，但佢竟然比D已凍曬嘅水我地，叫我点冲茶呢。飲餐茶都要受氣，以後都唔再幫襯！

weekend飲茶。。。坐位闊落，都坐得舒服，野食比我想像中貴，可能遲左去，無特價點心（其實都唔知早d會唔會有特價孖寶盛wkakak)點心質素還好，如果差不多價錢，咁我會揀plaza88間五蘢薈。我諗平日應該做扺飲d,見佢平人都多人

老豆下午專登搵我食LUNCH, 見佢咁有誠意坐車過黎荃灣, 當然要迎合佢食廢老最鐘意既飲茶+點心。果然聽到話去飲茶, 馬上變了HAPPY SON, 仲主動拎點心紙點佢最鐘意既野食(點完仲唔問我有冇野加就直接俾左侍應) 不過都冇咩所謂, 最緊要老人家開心。整體點心水準不過不失, 全程叫左5個點心加一碟河粉, 較為失望就係呢個河粉, 班腩有少少梅, 感覺唔太新鮮, 如果改善到既就無咩可挑剔了。用餐環境還可以, 冷氣就唔太足夠, 食到有少少出汗。 同埋枱都擺得有D迫, 基本上可聽到隔離枱既人講野。服務還可以, 雖然都冇咩野要侍應服務。(而家酒樓好多轉用QR CODE 落單, 所以基本上侍應數量都大減。)--好在呢間酒樓係QR CODE 同寫紙仔都可以。

因為疫情解禁放鬆人數可以多約幾人，所以今天相約好友，在荃灣西鐵附近晚飯。 近幾年在荃灣西鐵站一帶開了很多很多食肆，今日就揀了位於荃新天地二期內的逸月軒試一吓。聞說酒樓都只是開了一年多，見到裏面的陳設裝潢都很新淨、明亮、枱櫈擺得比較鬆動坐落令人有一種舒適的感覺。今日叫了兩個孖寶套餐分別是燒雞、聖子、酸甜骨、蒸了一條斑。最快上枱的燒雞半隻，脆脆的外皮賣相，保持應有燒雞的水準，並且還熱辣辣的，雞肉不會太霉有實肉的口感。跟住上的蒜蓉粉絲蒸聖子，聖子算是新鮮並且亦没有蒸得過老，蒜蓉粉絲吸收了聖子的鲜味，比主角聖子來得吸引。要是能蒜蓉多放些，個人感覺味道更濃更好味！和聖子同時上枱的酸甜骨，入口外脆內軟，而且甜酸的比例都恰到好處，不會有過甜或過酸的感覺，而且骨的份量都很足夠。最後上場的是蒸海斑，斑的外表望上去不錯;但入口覺得肉質不夠嫩滑有點老，而且魚肉黐實條骨，想怕應該是蒸得有點過火，魚食落口又覺得夠熟，扣了分。總括今次的晚飯都可算是滿意，下次聚會亦再來嘗吓其他菜式。

服務態度其差不是一般酒樓可以做到，唔講食物質素，個糖水夠膽死話番煲加水，仲話唔覺意俾多左啲豆，真係第一次都會係最後一次。 😿😿😿😿😿😿😿😿😿😿😿😿😿

荃灣荃新天地幾個月前開咗間新酒樓、每次經過都想試終於搵左一日去試個靚早餐🍵我哋一行二人、大約十點鐘去到、見到門口有十零人喺度等緊位、等咗大約20分鐘、終於輪到我哋入座、酒樓嘅裝修環境優雅、裝修走西色路線、脫離中色酒樓一般嘅框框、抵讚👍打開酒樓嘅點心紙、有不同嘅孖寶点心配搭畀你選擇、嚟酒樓當然一定叫蝦餃燒賣必食、見到蝦餃上枱系晶瑩爆滿、食落去非常之彈牙、不錯不錯😋也叫了鳳爪排骨飯、鴨腳扎、燒賣同脆奶卷/鹹水角相拼、依个組合配搭系超級驚喜、係我食過咁多間酒樓係最好食嘅一間、嚟到依間酒樓一定要試😋😍睇見酒樓門口晚飯歺单、每日都有三選一特價優惠、有機會試下佢個晚飯、睇下水準又如何先🤔

今時今日一間由侍應至收銀都服務超差的食店，食物基本野、裝修尚新，不過不失。但服務超差，由入門的知客、開茶的侍應、到最後埋單的收銀，都粗聲粗氣，吃一餐貼錢買難受，冇嘢可以再評論了。

老人家冇安心要填紙仔，突然接到不明來歷電話，吾問都吾知係間野打，吾該打之前通知聲好嘛。入到去第一件事係sell 你糕卷，吾問吾比點心紙，坐左好耐先知道原來可以QR code 落單，酒樓睇落開左冇耐，碗碟卻是崩的，食物吾熱感覺放左好耐，上菜速度普通，樓面姐姐吾太熟悉枱號，食到最後有2樣點心漏單想埋單，結果離奇出現。惟一好是坐環境闊落，入坐快，快有用有人做先得。No next time la

咁大個人未試過飲茶成肚火星期三放假約左屋企人飲下午茶，1:50拎飛，大約2:05入得，叫號個個俾左張有QR code紙我，檯號253定25x唔記得，佢新開之後我第一次嚟，揸住手上張紙🈚️人帶路，係無人帶路，我唔知你地平時係自己搵位定點，第一次飲茶入座無人帶，算，自己搵，行左半場我都未搵到，怪我眼細睇唔到，過程中完全無職員打救，行半場後我搵唔到檯見就近有個女職員，就問見唔到張檯，佢就話張檯俾人坐左，你是但坐哩張啦，係我手上抽走張紙無問我無俾返任何嘢我，是但坐 ⋯⋯咁新開d茶具都新同靚，見檯面又有蠟燭，我平復自己心情想好好飲茶⋯⋯我坐左一陣無人問我飲咩茶，我開始舉手，每次舉手都要30秒-1分鐘不等，有人過來問之後佢幫我點個個蠟燭，點左成分鐘佢話火槍無氣，行去隔離繼續點，隔離ok喔有火，之後佢就無再返來⋯⋯開始準備點嘢食，係門口等個陣睇左一下點心紙，個前台姐姐話唔使寫嘟qr code就得，我係台上見唔到任何qr code，我再次舉手，有個男職員(頭髮蓬鬆、豎起、我覺得有d亂嘅叔叔年紀）走過來，我問點解見唔到qr code，佢明明過左來，但無解答到我，一邊口嗡嗡(我聽到好似xxxxx寫紙）一邊走

逸月軒 荃灣今次係第二次嚟啦！試咗啲唔同新嘅點心，樣樣都有驚喜😍三色百花帶子餃入邊有帶子同埋蝦，大大粒，好好有咬口😋原隻鮮蝦腸呢個真係有驚喜！蝦好大隻好彈牙，腸粉皮亦都好煙韌，配埋一齊簡直超級好食😍鮮蝦菜苗餃呢個鮮蝦餃菜苗餃，入面勁多汁，好鮮甜😋蘿蔔絲酥卷酥皮焗得好香，入面嘅蘿蔔絲砌得好細，好好食，夾埋一齊冇得頂😍

係荃新天地二期睇完戲經過見到，入去試下。因為係平日，等嘅人唔算多，等左三個字左右就有位。入到去見到茶有好多款，連玫瑰花同菊花茶都有😋👍我就叫左茉莉花茶同玫瑰花茶，茶好香好好飲👍蝦餃好食，入面有汁！最中意係菜苗瑤柱餃，每粒入面都有瑤柱！😋😋豬手都好入味👍👍👍環境坐得好！一定會再去😋🥰👍

中秋套餐，7:30 到齊人，上菜速度突然斷咗，問咗好多次，話出咗，好奇怪，明明留單，又唔認，炸蟹鉗問極都冇，最後食埋壽桃包，再追問先有得食，猛火炸，外燶內唔熟，無下次！

睇戲未夠鐘，走去飲個早茶先。睇下早茶張點心紙都有好多款式，超級孖寶每份31.8。叫左兩份就有四款點心，加兩粒蝦蛟，兩個人食飽飽。呢度用透明茶壺裝茶，仲有蠟燭台保溫。.煎釀虎皮椒，四大條，釀滿魚膠，結結實實，口感佳，尖椒不太辣。南乳炆豬手，豬手有三大件，皮厚肉較少，醬汁味濃郁，伴有花生底。鴛鴦燒賣皇，豬肉燒賣及牛肉燒賣各兩粒，兩種都爽口，大大粒幾好味。蜜汁叉燒腸，腸皮唔夠薄，有點稠身，叉燒冇咩味，呢碟係唯一食剩嘅點心。水晶蝦餃，蝦肉都算爽口，但餃皮有點黏，唔夠薄身。