蛇王娟

近幾日打風唔成天氣又由30度落到18度，自然想食嘢暖吓身。今晚2點經過觀塘見到呢間舖未收，即時入去坐低食返碗蛇羹先。呢間舖喺觀塘開咗超過30年，由於重建搬到而家宜安街嘅舖位。餐牌好簡單，淨係賣蛇羹蛇湯同糯米飯今次叫咗個B餐食勻晒三樣嘢舖頭現時由娟姐位公子打理，一入門口已經好熱情咁招呼，見到每張枱面都有檸檬葉，蛋散呢啲蛇羹必備嘅配料，蛋散有少少南乳香味脆卜卜。問咗老闆佢話任食。之後佢𢳂咗一碗滿滿嘅蛇羹，好似𢳂飯咁一個弧形！蛇羹材料豐富，有陳皮香氣，爽脆嘅木耳絲提升咗蛇羹嘅口感。加埋檸檬葉絲同蛋散一齊食，每一啖都非常滋味。蛇湯顏色清澈，唔會好似出邊咁加啲熟地整到黑鼆鼆，有當歸嘅香氣同幾粒杞子點綴。飲兩啖真係成身熱晒。糯米飯蒸到粒粒企身，配備臘腸、炆冬菇絲同花生，食落煙韌，配少少調過味嘅豉油，非常惹味。街坊生意，要留住新知舊雨，除咗食物味道，人情味同樣重要。差唔多食完，老細主動問需唔需要加多碗湯。以前娟姐喺舖主持大局時，都已經會送蛇湯比客飲，估唔到呢個咁窩心嘅傳統到宜家仍然保留。而且現時嘅營業時間到深夜3點，到入冬後仲會收4點！！方便半夜三更天寒地凍想補身嘅食客。…Read More

今日專登去試下蛇王娟，見其他post都話係講“雞肉娟”，唔信且今日真係去試下，味道係ok，但講食正宗的蛇羹就唔係真正百分百蛇羹，加咗唔少雞肉，而臘味飯就唔係炒，色水唔靚，臘腸味一般，可以試下其他家。…Read More

近排天氣涼涼地，想整返碗蛇羹暖下身，呢個時候就諗起觀塘老字號，屹立四十多年嘅蛇王娟🐍坐低唔使諗即刻要個套餐B，有一碗細蛇羹，糯米飯，五蛇湯，雖然睇落好似細細地，但相信我，呢個份量都相當夠食😆蛇羹盆滿缽滿，材料有木耳絲、冬菇絲、雞肉、蛇肉，口感豐富，有種啖啖肉嘅感覺。蛇肉食落個質地同雞肉差唔多，會再韌少少，食落有蛇肉獨有嘅少少腥味，就好似羊肉會有羊騷味咁。檯面有檸檬草、醋、薄脆，食客可以按照自己口味添加。糯米飯細細碗，相當足料食完好飽😆材料有冬菇絲、花生、臘腸片、大量蔥花，加埋甜豉油，冬天嘅comfort food即係非你莫屬！糯米飯口感適中，唔會太濕亦唔會乾爭爭，係臘腸片食落普普通通，有樣嘢估唔到，就係蔥花好新鮮，清新美味👍🏻五蛇湯有濃郁嘅藥材味，有當歸紅棗，滋補美味，飲完成個人暖哂，仲要可以添飲！果然係真材實料益街坊👍🏻…Read More

又到食蛇羹季節，當然要去食個蛇羹補補佢。行過宜安街睇下有咩食，見到一間蛇舖，反正都好耐冇食過嘅蛇羹，就入去整番碗嘆下。我哋點左個蛇大蛇羹set同一碗細蛇羹。個set包一碗大蛇羹、細五蛇湯同細糯米飯。蛇羹好足料，啖啖蛇肉，口感十足。五蛇湯好清並而帶我好鍾意嘅藥材味，唔係驚太燥會想飲多碗。糯米飯有咬口，唔會太濕同咸，啱我個口味。食個熱辣辣嘅蛇羹食到出晒汗，老闆（應該係娟姐個仔？）好貼心咁比把風扇比我吹，呢啲就係小區嘅人情味，現代嘅食肆比較少有。…Read More

今日放工黎左位於觀塘宜安街既蛇王娟食蛇羹，我入去叫左個細蛇羹，記得之前都幫襯過幾次呢間蛇王娟，冬天旺季時都需要排隊等候，今日我放工時間黎就唔洗排隊等係呢到叫蛇羹會贈送蛇湯，蛇湯好香藥材味，飲落肚到十分舒服十分暖胃買蛇羹送埋蛇湯係好抵食而蛇羹都好足料，有滿滿既蛇肉，質感似雞肉但比雞肉更特別既口味呢個蛇羹配上蛇湯真係一個好好既配搭，另外蛇羹亦都可以配上店舖比既配料薄脆脆，個人口味會覺得成個蛇羹更加好食…Read More