荷葉冰室

營業中

休息中

今次再到荷葉試佢嘅晚餐，今次點咗 兩個煲，一個常餐同一個炸豆腐(忘記影相)，兩個煲分別係梅菜扣肉煲($85)，魚香茄子煲($72)，常餐係炸髀配”芝士”麵。兩個煲係套餐有飯有湯凍飲+$6先講梅菜扣肉 肥瘦比例係一半半，肉唔嚡唔乾，肥肉入口即溶，汁偏濃，撈飯一流，如果空口食就咸咗DD，梅菜同少少菜心仔墊底，吸晒味唔錯。魚香茄子 ，茄子切得比較大件，咸魚感覺上可以再多啲(👅我偏好濃味)。都係一個唔錯嘅撈飯選擇。常餐：叫咗炸雞脾配芝士麵 ，炸髀即炸一讚，芝士麵一般啦。整體來講晚餐唔錯，可以再encore戴返頭盔先，我覺得好唔好食≠你覺得好唔好食，好唔好食因人而異。

今日有啲事做晏咗食嘢，去咗一條叫欣安嘅村屋村內商場嘅荷葉冰室，我同我老婆分別叫咗兩個下午茶 每份$49 凍飲+$3我哋分別叫咗一個蕃茄焗豬扒飯、一個炒鮮蝦銀針粉，鮮茄焗豬扒飯，份量足唔會因為下午茶嗰分量少，估計都有碗半飯，個焗茄汁唔會有死咸情況出現，但係個豬扒稍為遜色，唔係因為唔好食，係因為佢斬咗件，講味道唔錯。跟住炒鮮蝦銀針粉，料頭足，調味不錯，銀針粉唔會有太油膩嘅情況。整體嚟講兩個下午茶都係抵食好味，依間茶餐廳一定會再encore，下次試吓佢個晚餐戴返頭盔先，我覺得好唔好食≠你覺得好唔好食，好唔好食因人而異。

上次唔好嘅經歷，絕對冇打亂咗我對呢間舖頭嘅信心，今次再一次俾我一個特別嘅驚喜。行完街返去馬鞍山專登早幾個站落車就係想食多次佢個下午茶。可能成日都冇食過嘢，所以今次嗌得豐富啲。個沙嗲牛肉轉左河粉，另外加咗$5要吉列豬扒。最驚喜嘅係我發現佢個落單app熱飲裏便竟然有檸啡，以前讀書嘅時候喺大排檔成日飲，估唔到佢竟然將檸啡納入常規嘅熱飲裏面。佢杯啡一啲都唔孤寒，俾咗勁多片檸檬。同埋個沙嗲牛肉河粉，啲河粉超大碗，剛好成日咩都冇食，呢個份量直頭爆都可以唔使食晚飯。個吉列豬扒就有少少失望，失望在於搏咗少少，但係處理得幾好好在外邊炸得夠脆，裏便肉汁仲係好飽滿。今次切切實實相當滿足。

其實好忐忑點樣出呢篇食評，其實都好想佢負責人去了解可以改進嘅地方，事實就係需要講出嚟，希望可以做得更好。整體食物其實係好食，樓面餐具亦都好齊全，唯獨是廚房唔知有冇帶衛生帽工作。本來初五新年好開心咁食緊個好有質素嘅沙嗲牛肉，突然間見到裏便有條中長度毛髮。肯定唔係我嘅，因為我帶咗帽同埋我啲頭髮冇咁長。跟住示意俾侍應，侍應即刻唔好意思，跟住問我想轉邊款麵。我就係想食沙嗲牛肉先至食茶餐廳，咁所以我就轉左沙嗲牛肉麵。係佢換緊碗麵俾我嘅時候，自我安慰一下嗰條係頭髮，飲返番奶茶定一定神，我叫咗少奶，茶味夠濃。好彩隻炸髀整得出色挽回唔少分數，隻雞髀個底味做得唔錯，另外唔知係佢細心定係炸甩咗條骨上脾位嗰嚿骨係冇咗嘅同埋髀肉都幾厚身。如果唔係嗰條毛，餐下午茶真係好得，甚至可以攞好評。

同屋企人去完街已經好夜買唔到餸，升起附近開咗間茶餐廳。屋企人又攰攰地索性簡簡單單食個茶記就算。估唔到佢啲小炒又幾吸引，研究過後三個人都係叫個二人餐再加個小菜比較划算。整體上份量係足，食物味道就有改善嘅空間，譬如隻沙薑雞就鹹左少少。酸菜魚啲魚片係幾滑唔錯，但係個陽酸度就唔夠係淡咗少少，浪費左d豆卜。飲完個例水無口乾係小讚，不過個紅豆冰就怪怪地，白色嗰啲好似係花奶又有少少唔似，總之同平時飲嘅紅豆冰有少少出入。另外，幾鍾意佢個西蘭花花枝炒蝦球，啲蝦肉勁爽有冇蝦腸，唔知係咪來貨已經整好咗，不過冇蝦腸呢方面又真係細心嘅。個鐵板茶樹菇牛柳粒，都好足料，味道都濃郁，用鐵板上，但係焦香味就唔係好足。整體味道嚟講，茶餐廳都算係中上，份量直頭足到捧住個肚出門口。之後再凍啲要試埋去啲雞煲。

楊州炒飯🍚$60，餐廳係套餐為主，所以如果散叫嘅話時間會比較慢少少，我呢個炒飯都等咗起碼10分鐘，不過上碟嘅時候熱辣辣出緊煙，睇得出係即叫即做，真係唔話得，楊州炒飯有叉燒，火腿生菜，大蝦，蟹柳，成個口感同埋配搭都做得唔錯，而且非常大碟，我都差啲食唔晒，質素嚟講，我覺得都幾好，茶餐廳水準係中上羅宋湯🥘，由於星期六日係冇普通嘅湯，所以我另外加咗$6，飲咗一碗羅宋湯，我覺得都幾正常，而且份量都好好，有蘿蔔薯仔同蕃茄嘅口感，整體嚟講不過不失！

新開一排，有時間就嚟食，食物質素尤其係豬扒真係好有水準，炒嘢亦幾好，係偏多油。但應該唔會再去，今日一如既往嚟食早餐，但佢地有d卡位嘅裝修係好有問題，就係張檯設計得好窄，而個檯腳嘅邊緣好尖銳，一坐即刻撞親都真係幾痛，咁呢個我自己當然有責任。但我轉檯嘅時候(未落單)，個短頭髮嘅中年waitress，佢問我咩事，我就同佢講返呢個情況，佢竟然一臉不屑咁樣話佢從來未試過，話佢地餐廳嘅檯無問題。咁本人身高的確唔矮，但隔離檯個細粒女士即刻都話佢都曾經撞過，呢到的確係偏窄。咁我好無mood啦，費事同個waitress嘈；食完早餐去counter，咁啱又係呢個waitress幫我埋單，我反應多次我嘅意見，佢竟然又擺返嗰個嘴臉，我真係把幾火。大佬間餐廳又唔係佢嘅，我作為顧客撞到，死都話係我嘅問題，OK咁我咪以後唔嚟食，坦白講都幫襯得唔少錢，但一間好餐廳往往都係俾啲唔care員工搞到顧客流失，反正佢都打份工。嚟曬大譜

屋企樓下終於有飯堂，今日朋友嚟我屋企，但都唔想煮，決定帶佢嚟試吓呢間新嘅冰室🤣🐥 傷心口水雞飯有驚喜！味道確實係麻酸帶辣，辣係BB辣雞皮好滑，雞肉肉質鮮嫩，份量都幾好我同朋友食完都唔傷心，仲好開心🤣好味又抵食🐮 牛肝菌牛柳粒飯一上枱好大碟，見到個份量覺得好滿意牛柳粒鑊氣十足，牛肝菌同埋西芹都掛晒滿滿嘅牛肝菌汁送飯一流，迅速食咗半碗飯🤤新開嘅冰室嚟講水準算係唔錯上菜速度驚人，快之餘仲要熱辣辣環境新淨，衛生唔錯唔想煮嘅話，我會首選落嚟呢度開飯🤤