影片
營業時間
今日營業
18:00 - 02:00
星期一至日
18:00 - 02:00
以上資料只供參考, 請與餐廳確認詳情
我同朋友經過外面聞到好香嘅燒烤味，忍唔住就入咗去試食呢間新開串燒店，店內較細，共6張枱，晚上10點後還坐了4枱客，聽到樓上好像仲有一層係可以坐房唱K嘅。店員比咗個籃我哋自己揀食物，揀完再比廚房燒，價錢錶晒喺menu度，如果每款食物加返食物名稱會更好，因為有好多款肉類唔知邊款打邊款，有幾次都要問店員先知係咩嚟。食物味道同店舖裝修都幾有大陸風味，連隔離幾枱客都係大陸同廣州人多，食食下見到啲人喺度食煙，我詢問店員：可唔可以叫佢哋出返去食煙？ 佢話：我哋呢度係可以食煙嘅 我驚訝問：而家室內比食煙㗎？唔係會罰錢㗎咩？ 之後我見店員有同佢哋講返。我哋全程一路食就一路吸住二手煙，快啲食完就快啲走，當我走嘅時候見到另一枱又食緊煙，下次我都係買外賣算
繼續閱讀
今日放工同朋友就腳係長沙灣呢邊食晚飯，天氣涼左啲就想食啲邪惡野😈所以我哋揀咗食串燒～呢間串燒小店係自助形式，自己揀好曬啲串燒放喺個籃度，然後付款，廚師就會開始燒！我地覺得呢度嘅款式都好多，樣樣都好想試下，因為朋友唔係好中意海鮮，所以我地主攻肉類同蔬菜：🔸肉類方面我哋叫咗牛仔骨、牛柳粒、牛舌、牛腱、羊架、雞翼、雞腎、雞軟骨，我就最中意羊架，好juicy，羊脂又唔會太騷～其他都燒得啱啱好，又香又唔會太乾～🔸蔬菜方面就叫咗韭菜、娃娃菜、秋葵、金菇菌，都好正！整體串燒都燒得好好食😍味道適中，唔會太濃味但係又好惹味！另外佢其實仲有啲雞泡魚乾、生蠔、帶子等等，中意食海鮮既又可以試下😎
繼續閱讀
同朋友仔兩個等上堂，梗係去食下野先啦，唔係邊有力上堂，搵左呢間串燒店，可以燒燒下慢慢食。好，睇下有咩好食先。呢度係可以自己岀去揀食材架，鍾意邊隻雞翼邊條茄子都可以自己揀，好野！雪櫃裡面放得整齊衛生。執好就交比店員燒，坐番埋位等食。首先黎左個韭菜、金菇，叫左小辣，韭菜食落冇乜草青味，仲好爽甜。多春魚肥美多春，雞軟骨勁脆。仲有牛舌、豬腩肉，燒過迫左油份岀黎，食落冇咁膩。生蠔、大元貝，用上海量生熟蒜同蔥，我想要碗白飯。蒜蓉茄子呀，係打大佬呀，軟綿綿茄子加上蒜蓉，好好味，食完個口好臭都忍唔到食晒。
繼續閱讀
重口味仔鍾意食濃味串燒孜然串串最啱我🤤長沙灣區向來多餐廳今日就比我發現到呢間自助串燒店唔好誤會 並唔係任食只係老闆會比一個藍大家想食咩就去凍櫃夾簡好後就比老闆計數🧮同烹調大致都係有肉、丸、蔬菜同海鮮類原條茄子🍆同粟米🌽係我最愛茄子我簡咗條最大條嘅重蒜燒完出嚟勁juicy粟米就勁清甜燒娃娃菜就吸收晒啲孜然粉味蒜芯爽脆鮮甜燒雞全翼同雞中翼夠晒邪惡凍櫃拎出嚟時仲見到肥厚嘅雞皮點知燒完出嚟層皮已經脆卜卜冇晒脂肪平時唔食雞皮嘅我都唔想放棄燒牛仔骨一份有三大件食落仲keep到牛味又唔會老燒物點少得墨魚丸同埋腸燒司華力腸勁震撼勁重孜然粉味～腸皮卜卜脆呢度播嘅歌好潮～咁啱天氣涼坐門口位超舒服
繼續閱讀
串吓串吓咁過一晚今日同朋友仔約出嚟食個飯，佢住蘇屋嗰邊，我又想去長沙灣買啲嘢，所以嚟左順寧道食。依間串燒都幾乾淨，完全無大陣燒烤味，走嗰時都無，就係依點已經抵讚！一開始大家出去兩個雪櫃選自己想食嘅嘢，望到乜想食就放入籃，俾佢燒，佢會問你食唔食得辣，食得幾辣！首先係韮菜串（$13），燒到好靚，仲係好翠綠，食落一啲都唔老，唔會有渣的，少少辣，唔會好咸。三文魚頭（$68）可以點吓芥末豉油增添鮮味，幾厚肉吓！燒乳鴿（$62）係原隻上，燒到脆卜卜，用手撕開10分滋味。 老細推介我哋食燒莞茜 ($16) ，感覺有啲似燒韭菜，燒完後仲有滿滿嘅水份喺芫荽內，而且唔會好大陣芫荽味，不是芫荽控的我都接受到。原條粟米 （$28），原條新鮮粟米，搽上一點點牛油和辣椒粉去燒，每粒粟米都食到佢本身嘅甜品。雞泡魚干 （$38），搽上少少蜜糖去燒，少少脆，又香口，係種暖暖地嘅高質零食！燒韮菜 （$13）燒到剛好，好juicy，有時去其他食店會好黏牙。墨魚咀（$25）有8粒咁多，好抵食，食落爽口彈牙， 十分有質感。蒜蓉生蠔 （$35/隻），係即開生蠔嚟，依個調味超正，勁濃嘅新鮮蒜蓉同葱粒同蠔嘅海水融合，簡直是齒頰留香！這店的老闆好熱情，不時跟各台的客人聊天，問意見，建議大家邊樣好食，不時推介，加上誠懇有禮嘅笑容，感好覺很好，唔怪之得聽到旁邊的兩台食客都是第二次第三次來食，大家也感到賓至如歸呢！
繼續閱讀