正和軒 - 同仁四季

營業中

休息中

是次用openrice訂座，餐廳位置由愉景新城行過去較近，用餐的是套餐，套餐內包括一款主菜（選了堂前火焰醉鵝半隻），另可選A，B，C，D款各選一款菜品（A款小食類選了胡椒煮豬肚、B款湯羹類選了紅燒海皇羹、C款小菜類選了脆皮炸雞半隻、D款飯類選了瑤柱蛋白炒飯），份量十分足大份，四人都夠食，食路性格比十分高，埋單$719／4人（內含堂前火焰碎鵝$598，茶芥［晚茶］$14，另收加一服務費$65.4）。

做完正經嘢就同兩老飲茶，兩老建議話嚟呢間，因為佢哋知我未試過，所以就過嚟飲下午茶。早咗都未有人等位，攞定飛周圍逛逛，跟住一到下午茶時段就出現咗人潮。見到呢個情況都有少少期待。入到去睇點心紙，反而見到佢個午餐套餐都幾吸引，就索性叫咗個午餐再加幾個下午茶點心。因為下午茶點三張紙寫住啲炒粉麵係碗上，相對個價錢就諗住佢會好細碗。點知午餐正價個乾炒牛河碟上出到嚟同側邊下午茶嗰份量相若，所以都係建議食返碗相就化算好多。個河夠乾身，見到啲牛肉係有烘過嘅，有誠意！另外個套餐裏面有灌湯餃個餡都幾足料，好似食緊巨大版嘅雞絲粉皮。唯一少少失望就係個糯米雞一揭開塊葉已經散晒，另外個籠邊仲有之前啲蒸包嘅殘留物，希望酒樓負責人睇到呢篇食評嘅時候要留意吓。牛肉球就削在少少，不過藕餅都幾彈牙。另外留左甜品，燉椰皇清甜，但size就唔太平均。芝麻卷係新鮮蒸出嚟嘅，有芝麻味尚算清甜。除咗個籠扣咗少少印象分之外，整體嚟講都係可以嘅。

話說包咗場做百日宴，咁我就影咗少少精華相片分享吓，有芝士焗加拿大龍蝦伊麵底，每人預咗半邊龍蝦，咁又好過一隻大龍蝦，肉得幾舊咁多人分，凱撒沙律伴百花釀蟹鉗，熱辣辣好好食～而家好多到都無釀蟹鉗食，紅燒花膠海皇燴魚翅、蠔皇玉掌扣原隻鮑魚，呢樣通常去飲宴都有上場，清蒸生猛海虎杉斑，都係蒸到啱啱好，金沙脆皮炸子雞，等等⋯掛住食影唔曬咁多餸添重有一圍枱可以安排齋菜圍，照顧客人唔同嘅需要。真係好好，又靚又多款式，連素粉果都有👍🏻👍🏻店內重係全場無柱、樓底特高、西式舞台、燈光系統投射機、無線咪、擴音系統、好啱包場用，重可以自彈自唱，當一個兩小時的唱作歌手吧！

餐廳面積比較細，所以會比較嘈吵少少，但係裝修OK，吊燈幾靚。-今次同同事一齊叫咗個八人套餐，套餐價錢唔貴，但係都好豐富。個套餐已經有點心，湯小菜，同埋粉麵，啱晒同事們每樣share少少。-🌟咕嚕肉呢個覺得幾好食，外皮炸得有少少脆脆地，個汁好開胃醒神-🌟蝦餃好有特色，一籠入面有兩隻味，有普通蝦餃同埋一隻墨魚汁蝦餃。-🌟粟米羹好大碗，入面有好多粟米粒，可以分到大約10碗-🌟乾炒牛河，乾燒伊麵大大碟，食到我哋都覺得好飽

好多時侯都會入荃灣跟長輩飲茶共聚，正和軒的點心抵食，水準保持而且價錢大眾化。無論蒸的點心或煎炸食物都做得很好，每次飲茶總會叫定兩籠薑汁千層糕，待它涼了質地更煙靱，更好味。今天叫了一客「麻辣燒賣皇」一籠有4件，原本用來分享共吃，但今日麻辣味超重，比平時食開的重手好多，長輩們都接受不到，全部讓給我吃😂。

同事話好耐都冇聚，所以揀咗呢間圍威喂😌之前幫襯過佢嘅點心，見到原來有小菜套餐而我地又多人，所以今次就試小菜套餐。環境企企理理，嘢食味道唔錯，係呢個位置嚟講，性價比都算高。🌱京式烤片皮鴨: 呢個真係要多人食先搞得掂，因為都幾大隻吓。個皮烤得幾脆，去咗油層，所以食落唔會好滯，但鴨肉帶點老，整體嚟講都唔差。🌱上湯澳洲龍蝦伊麵: 一上菜就聞到陣陣牛油香，麵條掛滿芡汁，食落不得之了！龍蝦都大舊而且啖啖肉，呢個值得一食🌱金沙黃金蝦: 好味到連殻都食埋🤣好重蛋黃嘅香氣，平均每隻蝦都可以以蛋黃包裹住，真係做得好好。呢個係小女子今餐最愛嘅一道菜🥰推！🌱銀芽吊片炒麵: 小女子食咗幾次，水準保持到，真係冇得輸。佢做到麵質乾爽，有鑊氣，味道適中，魷魚又炒得爽口，好食！🌱大澳小炒皇: 好啱配搭白飯一齊食，偏咸但豐有鮮味，口感豐富，因為含腰果，雲耳，蝦米等，全部都係爽口嘅材料😌

之前都食過這間食肆的點心，由於疫情關係，所以好耐沒幫襯！今日心血來潮，又想到此再食下！其實這裡的裝潢不是一般酒樓，可能是因為大廳正中，有一些音樂設備，live band, 但可能🤔️只係夜晚先有？因為我早上來，並未曾見到有人唱歌🎤！講番點心水準。蝦餃，兩隻色都好食😋！醃得入味，蝦都大隻，味道不錯！第一次試這個一人套餐，有一碟菜，有湯。有主食（星洲炒米）。個炒米粉味道ok, 只係個米粉如果炒得再乾身一點，應該會更加好食！至於個咖哩牛肚，牛肚好「林」，好好食！咖哩味濃！而且，沒想到，竟然在牛肚底部並不是放白蘿蔔，而是「薯仔」哈哈😄！我初初仲以為是准山。食下食下先發現是薯仔，不過都是好食。整體來講，味道不錯，好食😋！會再光顧！

慶祝母親節好多地方無位 就是但入一間。。咁講返點餐 由於母親節佢地出左好多plan但好類似 我都擔心我理解錯誤所以先比佢睇單及詢問職員再點菜。。。點菜後隔幾分鐘睇下張單有無出錯 點知全部不符 我已經立即向佢地表示我地唔係點呢啲 而佢地既女經理既做法唔係立即去廚房講出錯反而向客人我辯論 話我係點呢個套餐B重點：佢同同事之間溝通出錯 寫單是另一位 落單係佢 佢憑咩一口講我錯？隨後我都問寫單職員我明明講A 佢就話係阿 係A女經理服務態度超差 完全唔識做！！除此佢食物係好味既～

酒樓有live band 的台，都算常見，但地方不大的酒樓都有，可能都是招徠的一種吧！ 這間酒樓，裝修設計以黑色天花為主，所以令酒樓的格調顯得跟傳統酒樓很不同。當然，什麼裝修都不重要，最重要都是食物的質素吧。我和友人點了4個點心。先來「鮑汁雞腳」，其實雞腳好入味，皮都很腍，可是。最大問題是，我哋食到燶味。可能個汁底不小心燶左。因此，個汁有淡淡的焦燶味，因為不算太嚴重，我哋都照食晒。到個叉燒腸粉，個皮真的有點兒厚，不夠簿，以飽肚都講是沒問題，但以腸粉好味度，我會比較偏向「皮簿」的腸粉會更為吸引！腸粉豉油都一般。到椒鹽多春魚，炸粉的外衣都鬆化，都簿身。可是上台的魚，「不熱」。只是魚身有點「微暖」。不知道是否人手不足，所以導致上台慢左？因為我們等位時，負責比排隊飛的小姐，一幫我們寫低籌號之後，便入內收拾台面，收拾完，佢又幫忙入機入電腦落單，轉頭又見佢加水，又話會幫下手做收銀。。。。。。我睇見佢好勁！一個人做咁多角色！最後是甜點，芝麻糕。不算好甜。正常，不過芝麻味便不濃，有啲淡。

朋友介紹呢個商場泊車有優惠，$100個免費一個鐘，$200免費兩個鐘，$300免費三個鐘，最多三個鐘免費。星期六就帶咗屋企人嚟呢一間飲茶，竟然發覺佢嘅小炒幾出色😇嗌咗個二人套餐同埋幾樣點心，二人套餐叫咗個粟米魚肚羹，嚟到好鮮甜，亦都真係有幾個魚肚喺度，足料🤣另外叫咗個涼瓜炒牛肉，呢個小炒十分之出色，牛肉同涼瓜都係靚嘅貨，牛肉份量亦好足夠，好食😛黃花魚稍為失色咗少少，食材上面可以再揀好啲嘅！點心叫咗兩樣，潮州粉果同埋淮山棉花雞，潮州粉果幾好食，但係我覺得佢個皮稍為厚咗少少，薄返啲嘅會更加之好食，棉花雞雞味好濃郁，棉花份量亦好足夠，幾好！環境方面佢都算坐得舒適，而且價錢中等，免費泊車嘅話我覺得都算幾抵🤣🤣

正和軒除了食物和環境很好外，值得讚賞各位員工都很有禮貌、經理細心和貼心，照顧食客每一個環節，媽媽生日又有生日歌播放，超有氣氛！我們都十分滿意！下次一定再來光顧！

星期日家人聚會於「正王軒（同仁四季）」荃灣8咪半一樓，中午時間 當然要拎個籌 稍為等等 😊 這酒樓環境一般啦，地方不算大蝦餃之王 （頂）一籠有3粒大蝦餃，皮有啲厚，蝦肉多都 ok 好食薑汁雞包仔 （小）熱辣辣 三個，皮非常軟熟，我種意喎上湯鮮竹卷 （大）三條，上湯清淡可口，腐皮軟滑 碧肉鮮蝦腸 （特）長長白色碟，賣相漂亮滑滑 晶營腸粉皮，彈牙蝦，嫩綠菜粒淮山棉花雞 （大）啖啖雞肉、爽口棉花😀、冬菇家鄉鹹水角 （中）噢 😀 麻麻哋

今日第一次嚟到位於荃灣嘅正和軒。😆環境:呢間店環境，裝修與出面商場有D不入圍🤫，有D old school.🤪有厠所，但有D臭🤭，仲要廁所隔離係點心部🤢。我地入咗去後門(見到廁所😅)，要去返前門等位，等位快😆服務:一般叫咗好耐先有人應😶‍🌫️野食:不錯👍有水準叉燒包，豉油炒麵ok 🙈等候時間:等咗差不多半小時，趕時間不要去🏃價格:正常，平均$20 一碟點心😋總結:如果不趕時間可以去😝，食物不錯😚，服務有待改善🙃

本來打算中秋食個下午茶，到後填好下單紙後交給了其中一個穿黑色外套的女員工，其中叫咗蠔仔肉碎湯飯同其他一啲點心，之後15分鐘後黎咗個湯飯，見30分鐘後都未有其他點心，就叫咗另一個著紅色制服既員工黎問下，點知話除咗蠔仔湯飯外其他都冇落過單完全冇記錄。咁其實點解又可以落到個湯飯既單？根本就系佢地自己員工冇落過，之後紅色制服員工仲質問我系邊個幫我落單而唔系直接同自己啲員工溝通，好似系我自己冇比到張紙佢地，我屈佢地咁，系客人既錯。佢地自己啲員工就自己坐埋附近一檯開餐，大聲傾計食飯，完全唔理出面其實仲有半場客，聽到我既問題完全冇意欲，過黎問下咩事。成間餐廳啲員工態度都極有問題，可惜我冇睇咗評論先入去食，搞到自己一肚氣

呢位自稱係「老闆」嘅男人唔識帶位🙄勁串，非常冇禮貌😡事源係佢安排入座嘅時候，佢安排左我地坐一個近門口嘅位置，咁我媽咪就想坐入啲，亦都話左唔介意再等下張枱，但「老闆」無視我地🙄同時，「老闆」俾下一位客入左去，坐一張入啲嘅枱。咁我媽咪就同佢理論，「老闆」就唔滿意，唔俾我哋調位，唔俾等下一張枱，仲講咗句：「而家唔做你生意！」仲話再嘈報警😦問清楚佢嘅職位先知係「老闆」，唔怪得可以咁巴閉話唔做人生意仲要報警添😕其實如果佢態度好少少咁講，再安排一張枱俾我哋，我哋係唔會介意再等，大家亦都無需要勞氣。個陣都唔係好多客等緊位，安排下一張俾我哋其實好簡單處理左成件事。其實我哋係周不時嚟幫襯嘅客，真係估唔到呢次有個咁唔開心嘅經歷😔😡仲要俾人串又受氣話唔做我地生意真係激死😤咁巴閉以後唔食囉！荃灣區又唔係得你一間茶樓，嘢食又唔係特別好食，老闆咁串食咗都唔安樂！😡*睇返原來網上好多食評都話呢間野個肥老闆態度好有問題！P.S. 上一次嚟食，叫左碟鹹水角，嚟到明顯睇得出擺咗好耐，已經淋晒。咁梗係同侍應講取消咗佢唔食啦，咁核突點食啫！侍應竟然第一句話：你擺耐左唔食係咁樣㗎啦！吓？！碟野啱啱上枱，竟然屈返我哋轉頭擺耐左碟