新聯豐粉麵家

營業中

休息中

位於深水埗福榮街既呢間粥麵店位置方便，好容易就搵到，佢主打睇落都係做街坊生意，黎得食既都係左鄰右里，比較少街外客特登走入黎食，而店鋪內籠都大，食物既選擇都幾多，但價錢方面亦比同區既粥麵店比較貴小小，而粥方面佢地話係生滾粥，今次就試下佢地既滑牛粥睇睇啦～新鮮牛肉粥（$39），今次我係外賣拎返去食既，印象中好似要加多$1，而粥既熱度十分夠，份量亦都正正常常，牛肉既份量都幾多，食落去亦覺得有少少牛味，唔會話太過雪藏果款，而粥底略嫌未夠綿，但食落都有牛味，以生滾粥黎講都係正常水平，但佢價錢方便稍嫌貴左小小，但質素都正常～

深水埗哩間麵店一向都係好味嘅，食過佢嘅嘅雲吞麵，湯底好香大地魚味又甜，會忍唔住飲多幾啖湯，雲吞又大大粒餡料十足，所以我間中都會嚟食。▫️另外，佢哋店嘅賣嘅小食都好好味㗎！今次我哋買左辣汁魷魚同魚蛋，魚蛋係陳皮魚蛋，又香又彈牙！魷魚🦑好爽脆！▫️最正都係佢哋嘅辣汁呀，甜甜哋，有啲似沙嗲汁，但係煮得好香好惹味，次次經過都會想買嚟食😋😋。不過小食哩個係晌店外擺嘅小棟，7點左右就收棟架喇，想食就要趁早啦！

講真呢間鋪真係由細食到，就算我搬離開深水埗區， 會返去行街嘅時候 有時都會幫襯下，老小店服務態度就梗係唔完美可以改善，但係我又唔覺得太差，而且佢嘅質素確實一直都保持得唔錯，起碼一直啱我口味先， 就算唔係食粉麵整串魚蛋同八爪魚都係必需嘅~ 近來短暫停食澱粉質嘅嘢， 同朋友入到去唯有叫淨食再加碟菜咁啦， 淨雲吞有九粒~粒粒都好圓潤飽滿，耷朋友心口黑栢葉粉， 就老笠兩件黑栢葉嚟食， 新鮮爽口~正; 嚟呢度食油菜我都一定係食芥蘭，呢度應該係我食個最芥蘭嘅芥蘭， 其實我朋友都問過我點解， 喺街食有好多芥蘭都已經係用幼身偏淋嗰隻芥蘭， 但喺我心目中係芥蘭就必須係要係粗碌，咬落要好爽口~卜卜聲，我好傳統咖…講真佢啲嘢唔算貴，但係亦都唔係平價，不過物有所值~

前幾日行過見有生滾粥咪入去試吓囉，第一次食呢間咁既野，咁問左阿姐一兩句就西面扮聽唔明，好啦咁最尾叫左碗生滾粥啦，點知叫完野食之後見到煮麵嗰個喺入面食煙🚬，佢係烏低身吸起身噴，即係對住煮麵嗰一大煲湯噴，同阿姐講就喺度扮聽唔到如果唔係叫左野食一定起身走人囉，以後一定唔會再食囉，好心啦，要食煙既咪行出門口食囉，點解要迫人地食你D二手煙先，仲要對住煮麵個湯底噴，想避都無得避，你有食食煙既自由，我都有我唔食二手煙既自由架

又黎打咭!點咗個水餃牛筋河, 食汁, 多蔥,另外再加碟蠔油介蘭.由於新聯豐冷氣完全唔掂, 所以等秋冬先黎幫襯.先試試湯底, 慶幸仍然未變, 清甜唔肥膩, 再加上蔥花, 滿分.牛筋無以前咁濃味, 但味道仍可接受.鳳城水餃無偷工減料, 仍然係足料大大粒, 內裡原隻彈牙鮮蝦. 一啖食唔哂.今次減分有兩個地方,介蘭唔夠冧.另外, 服務真係扣一半分!上網睇一睇好多食評都話新聯豐服務唔掂, 我今次冷眼旁觀, 首先樓面都係內地大媽模樣, 笑容欠奉, 對我嘅態度雖不至於惡劣 (相信我阿媽生得我樣樣衰衰同凶神惡煞有極大關係!), 但完全 hea 做 hea 回, 心裡面無咗果團火!食完之后經過馬德里冰室, 門口企咗個熱情小妹好落力招呼, 感覺好似從地獄上咗天堂.....

每次想食生滾粥，都會諗起這間店舖，但同樣地也諗起樓面姐姐惡劣的待客態度，感覺真的很委屈，付錢來受氣，還記得第一次光顧的時候，問她粉麵可否雙拼，給她不禮貌地呼喝，之後每一次的態度同樣惡劣，她對待其他客人的態度也同樣的差，奈何老公喜歡食這間店舖的生滾粥，每次都要避開直接同佢接觸！！！墨魚丸真材實料，表面粗糙，咬開裡面有小墨魚味粒，爽口彈牙。魚餃皮很薄，精瑩通透，餡料足，但略咸，可能加了味精。玻璃樽裝忌廉汽水很有懷舊風味，比罐裝好飲！北菇蠔豉魚腩煲仔粥，老公每次光顧，都必定要食生滾粥，價錢略貴，但足料，即叫即做，等待時間大約等5-10分鐘。

上次幫襯新聯豐嘅南乳豬手，質素變得奇差! 食咗成十年嘅水準一野無哂，超失望 (X_X)okay 俾多次機會佢，睇吓重係咪無D長進!所以我今次搵咗個對正出菜位，睇吓豬手重係咪噤差.我自己就叫個牛筋米算數!當然唔叫豬手啦! 中伏一次就飽哂!先講講碗牛筋米粉，我要求多菁，佢地真係俾多D菁無敷衍，米粉同牛筋份量適中無偷工減料，牛筋炆到冧哂又入味，慶幸水準無跌，感恩！唔知係咪D伙記識讀心術, 有個大媽待應, 硬係遮鬼住我, 等我睇唔到出菜!而且又無客叫豬手, 想睇吓質素好壞都矛機會!另外, 新聯豐門口只係用幾塊膠布遮擋, 冷氣當然唔夠啦!睇怕要等到秋冬先黎幫襯嚕…...

返工前諗住買碗麵返去做午餐，行入去同個阿姐講外賣一碗雲吞魚蛋麵唔該。講真粉麵黎講確實唔平，盛惠43元，味道係食完要狂飲水既感覺。都唔緊要。最燥係比錢時，我比左100蚊，收錢個阿姐唔知大叫入面另一個阿姐唱錢，之後唱完錢，又無找錢比我，跟住收我錢個阿姐都無找錢比我，係度執野，之後我只係講左句‘未找錢’之後個阿姐好似食錯藥喝番我轉頭‘唱緊錢咪找比你囉，你睇唔到既咩’，我即刻同佢講其實你唔同我講我真係唔會知架囉。總結，服務0分，味道2分。價格1分。不值一試

在深水埗已多年既新聯豐粉麵家，老實講佢既粉麵我未幫襯過，唔敢俾評價。不過佢既小食我就成日買！！粉麵店出面有架小車，賣八爪魚同魚蛋，個賣相都好吸引架！仲要未行近，離遠已陣聞到好香！！！佢既秘醬辣汁係必試的，食落少少似沙嗲，之後又似咖哩，由甜甜地到慢慢滲出辣味，認真過癮！🤩🤩🤩🤩🤩八爪魚佢寫是鮮八爪魚🐙，咬落都好好口感，加埋醬汁好過癮。魚蛋都有少少陳皮味，咬落唔係彈牙口感，是偏煙刃果款，但配埋個汁就好好食！總括而言，佢個汁真係好得！基本上配八爪魚也好，配魚蛋也好，都可以令個小食好食左！味道去左另一層次！！！

原本想話去劉森記食麵，去到門口又多人排隊又有D名人推介相貼門口，中伏味濃，轉場去新聯豐！我承認，我迷信又八卦！聽D芯芯師傅徒弟講，出年係豬年，己亥年行到手手腳腳嘅官位，即豬手豬腳，所以豬年見意唔好食豬手豬腳喎.....所以豬年前食最后一碟南乳豬手，另外再叫咗碗牛根米同鳳爪河.牛根米保持水準，牛根炆得入味夠冧，掂！鳳爪側明顯炸得唔夠耐，鳳爪皮變得靭咗D同口感硬，唔夠入味，失望！再望吓碟豬手，吓！喂喂喂！攪咩呀！以前嘅南乳汁去哂邊呀！扣起哂？另外，豬手有兩件食到有豬毛，重要豬手炆得唔夠耐，變得爽口！爽口嘅豬手係我極唔中意嘅口感！食咗新聯豐超過十年，第一次噤不滿！我承認，我迷信又八卦，根本唔應該叫豬手...... ~~>_<~~

今次同我家姐試吓呢間深水埗地道餐廳，鋪頭就係黃金電腦城對面嘅轉角位，呢間野就喺深水埗啲出口直行2分鐘就會望到。其實我哋嚟最主要都係為咗食呢度嘅白灼鮮鵝腸！呢個份量相當足夠，而且十分爽口，絕對可以成為呢間鋪頭嘅主食！其次係呢碗京都炸醬麵，呢一款炸醬麵唔係周圍都搵到！我認為呢一款炸醬麵最出色就係佢上面嘅肉碎唔會太乾，而且肉味十足，食嘅時候一啖湯一啖麵再加兩舊肉碎，非常好味👍🏾炸醬麵加鵝腸呢個配搭簡直天衣無縫😎最後係呢碗蝦麵，啲蝦爽口彈牙，而且份量足夠，絕對係抵食👍🏾總括來講，如果你喺深水埗食厭咗啲連鎖店，就應該要黎試一試呢間特色麵店😋

呢間野最出名就係食粥，啲粥夠晒綿，重點係即叫即煮，並唔係嗰啲煮定一大鍋嘅粥，因為個阿叔就企喺門口度煮，啲粥咁綿就梗係煮定既，不過啲餸係收到order先加落，所以豬膶唔會太un,魚片唔會煮過時太熟。另外推介下佢嘅粉面，生面爽口彈牙，冇鹼水味，牛筋腩炆到入晒味！仲有係個雲吞炸醬撈，炸醬有少少辣嘅，豬肉切絲並唔係絞碎，食落更加有口感，而且都幾大份，一個女仔食唔曬。重點推介八爪魚同咖喱魚蛋，爽滑彈牙，通常一到夜晚就會賣晒。

之前係到食過粥，味道都吳錯，又知道有咖喱魚蛋八爪魚，叫左兩串食，個汁都ok！可能呢度生意好好成日坐爆所以其實呢到D人都串串地，可能生意好吳休做，所以果次之後都無再去食過😰(👆👆呢個係之前既）而家再講今次事件，估吳到係門口拮魚蛋個呀姐都甘串😡事緣係上星期大約五六點，因為食飯時間未到，又等人，等時間做乜好，有D肚餓，咪走去唸住買串八爪魚食下，行到去有兩個女仔買更，甘我就企係兩個女仔後面既靠右邊，等佢買完就買，輪到我時，有一個男人行黎買一串魚蛋，但其實到我，甘我就話一串八爪魚，個賣魚蛋女人話你係左邊排，甘好啦，我當自己排錯，行去左邊排，甘個男人買完應該到我，我又再講一串八爪魚，個女人竟然係問右手邊排另一個人要乜，之後我開始把火，我係右邊排，你叫我左邊，去了左邊排，你就問右邊的人買乜，究竟你左右不分，定想點呀，終於我把火話痴缐，以後吳會係你呢到買嘢食！之後好慶甘走左🔥🔥🔥😡😡😡有生意都吳使甘串😡我以為都吳會再黎受氣😡😡😡

呢度嘅咖喱魚蛋真係好好食，每串只係$6元，新鮮八爪魚，由舊時每串$9元加價到現在每串$13元，但八爪魚真係非常新鮮，好食！配埋個咖喱辣汁，會令人食上癮，我每次嚟到都必定會篤番兩串魚蛋，至於八爪魚，我間唔中先至會食一次，因為一串八爪魚就等於兩串魚蛋，所以魚蛋抵食D

深水埗-新聯豐粉麵家：秘製咖哩辣醬八爪魚（hk$13)有無試過食完一樣美食，震撼味蕾，然後記憶就一直把那件美食聯想起當時的欣喜感覺，非常深刻？呢串八爪魚就係我其中一件想起會笑既美食，幾年前有一次堂食食佢，簡直驚為天人。今日經過深水埗，心血來潮想重溫舊味，但果然回憶永遠是最美好的，今日一試，沒有了當年的辣勁和美味震撼，但係依然係一串出色既八爪魚！！秘製咖哩醬濃淡得宜，辣味出眾，八爪魚肉厚，嫩口彈牙，配合起上黎係人間美味，是我深水埗掃街必食之選。