大戶屋

營業中

休息中

香港食日本菜，無論幾貴都唔係日本料，俾人劏多過食，情況就好似係外國唐人街食中菜，倒不如直接飛日本食好過，起碼真金白銀買真材實料。但係香港日本條癮你頂得幾耐呢？次次刺生魚生飯壽司滿丼等等又如何，食到悶。黎到大戶屋，佢帶到俾你咩呢，真係日本既家常便飯感覺，CP值非常高，食到你飽飽之餘，日本簡單料理就係咁直接。吉列既食物，金黃鬆脆，呢個價錢咁既質素，無浪費我既時間。定食，伴菜足夠，又漬物又沙律又味噌湯，仲有一個茶碗蒸。你講，你地出面食，會得到咩？一碗沖粉味噌湯，你話你地食日本菜？

平安夜，沒有去食火鷄，反而去了食日本家庭料理😬😬見到餐牌上的串燒非常養眼，令人心郁郁非食不可，於是點了拼盤B味道一般，肉汁少和燒烤味並不濃郁這個燒生薑牛俐定食份量十足，大大碗飯，只可惜收水未足，入口有糊仔感覺，另外牛舌夠厚度，彈性十足之餘有點 un ，可以話同牙較角力一番🤣🤣當然是我Sure Win焼三文魚頭非常油膩，食完隻碟臘臘令😅味道尚算ok雖然食物味道一般，但份量十足，加上環境優雅，這餐Christmas eve dinner 也算滿足了😉😆

記得好耐之前，朋友帶我去尖沙咀帝國大廈的大戶屋分店食飯，當時我叫了一個炸豬扒飯定食，餐廳內的佈置和食物的質素令我十分滿意， 自此之後我就成為佢的擁躉。後來尖沙咀分店結業後，很久已沒有光顧這家分店，由於荃灣天地有免費泊車優惠的原因， 所以我和太太夜晚不知道食什麼的時候就會自自然然想起到大戶屋。我們兩個每次也叫相同的食物，我一定會叫炸豬扒飯定食，而她就會叫銀鱈魚定食。首先講豬扒定食，今次塊豬扒炸都林晒，沒有以前脆身感覺，整體來說今次有點兒失望，但他送食物上來整體的presentation令我十分滿意。由於我沒有食到銀雪魚所以不可以作出任何評論，但我太太說很好食，而且仲有湯，配菜同埋蒸蛋，食完之後應該會飽到上心口。今次想講下他們的服務，由於今次我們三個人去食飯，當中有一人之前已經食咗少少野，所以他只計劃叫一點小食和額外多叫一碗白飯，當我們下單時，服務員建議我們可以把免費添加的一碗白飯先行送上，這樣我們就不必要額外花錢再叫一碗白飯，講真一碗白飯只係 $15 ，但店員這個動作令我留下深刻的印象，如果有機會一定要表揚一下。

聖誕🎄月飯局特別多, 荃灣返工嘅朋友指定去大户屋lunch, 鐘意坐得舒服, service好日式. 我12點左右唸住睇下有無窗口位但已滿了. Menu實在太多選擇, 又想食蕎麥冷麵, 又想食鍋, 最終揀左個咩都有齊嘅定食.蘿蔔蓉煮雞扒鍋定食🍱 (HKD99)有珍珠飯🍚, 麵鼓湯, 茶碗蒸, 醃菜一個大木盤一次過上哂嘅定食, 放正中間最大鍋係主菜蘿蔔蓉煮雞扒鍋, 蘿蔔蓉多到好似成為左個湯底, 入哂味, 切件雞扒6件份量的確唔小, 旁邊放滿配菜, 別以為每樣一小掫好像不太夠吃, 旁邊還有一大碗粒粒漲卜卜嘅珍珠飯呢！平時較少食浸湯嘅雞扒, 原來好好味. 雞肉都一樣嫩滑而且更juicy. 而將蘿蔔蓉湯底送飯食哂係零Guilty感的, 本身已經係蔬菜類亦無味精. 半飽狀態下吃茶碗蒸, 揭開蓋後仲係熱騰騰的, 蛋好滑不在話下, 還嚐到香濃高湯味道. 最後原來有餐茶, 叫左杯咖啡, 好飲☕️話咁快朋友又夠鐘下半場了. 我已經唸好下次再黎食咩了

一個人突然好想食有蛋有肉既嘢又唔想煮 懶得洗諗諗下 不如去大戶屋食啦嚟返個與豬扒小姐的約會呀嘛!又想要有啲吉列又有蛋既 一於就叫吉列熟成豬扒玉子鍋啦🍱💲97一上碟真係香氣撲鼻 豬扒一啲都唔鞋口雖然已經浸住啲汁 但都食到啲吉列"皮"而佢炸得幾好 唔會好厚粉 隻蛋好食 可能先入為主日本蛋真係唔同啲😂而且佢地個飯係會用日本米 帶啲甜味可以中和返個汁 因為個汁其實有啲咸!好食度:😋😋😋😋雖然呢個價錢食個晏有啲貴 但整體嚟講以呢間嘢既質素環境同服務都係值既

荃灣都有唔少商場，內邊都有唔少看似唔錯既餐廳，第一次食呢間不過好失望。點了這個牛扒set。麵豉湯，好淡無味，唔好飲，出面都係比較多呢種無味既麵豉湯。牛扒，口感好差，好難咬，真係幾失望。即使有一邊望落去好似都生生地以為口感會好D，但係都係口感差,都係有點難爵。蛋，就幾滑，呢個ok既。不過呢個餐最重要既牛扒真係完全唔得，所以係好失望。。。薯容都可以既，唔錯。總結呢個set最重要既牛扒完全唔好味，口感差。。。其他配菜無特別好味，呢餐完全唔值。。。

平日經過都見好多人排隊，自從裝修左之後一直都想去試下。 排隊大約等左10分鐘左右，員工十分有禮貌。食物黎講，三文魚嘅定食真係無得彈，只係會有少少「漏」，加埋個串燒就未必食得哂。特別推薦燒五花腩串燒，真係好好味！

同好友三人行約在荃灣相聚又唔知食咩好，好友就提議去尼間朋友食過覺得幾好既大戶屋。我地點左鯖魚定食、迷你炸雞同迷你黑醋野菜。鯖魚定食($98)鯖魚適合食得清淡既朋友。定食有麵豉湯、蘿蔔蓉、茶碗蒸蛋、昆布同漬物。加$10可以加多碗其他款既飯：五穀飯、准山蓉飯、鮮雞蛋伴飯、海藻飯、小魚飯。白飯並唔係熱辣辣，係暖暖地，白飯粒粒分明，再拌埋鮮雞蛋同豉油，好味。(個人口味: 3.2/5)迷你炸雞($33)炸雞有4件，另外叫侍應再拎左沙律醬。炸雞係走清淡路線，麻麻。(個人口味: 2.8/5)迷你黑醋野菜($28)碗底有好多椰菜絲，幾開胃。整體而言，環境坐得幾舒服，唔會好嘈，都適合同朋友聚會傾下計。唯味道一般但價錢偏貴(前菜對我而言唔係必須)，如果純粹為食飯，應該唔會有下次。我地點左個甜品，仲特別同侍應講係即上，但食完都仲未上甜品，最後check返話我地無落單。之後又聽到隔離枱叫左甜品都係漏左單。

以前成日去食晚餐，搬屋後少去左，今次經過此地，就再食一下燒花魚餐，飯物水準依靠，沒有退步，多叫了一個薯仔沙律，幾好味，食下食下，食哂成個，所以當套餐上菜時已飽了一半。主菜的花魚燒得香，又夠味，配菜依舊有屋企feel. 套餐加杯野飲，食完。。。。飲完飽到102%服務就略為失色，食物上菜，上茶，速度有點慢。。。

一行四人嚟到搵嘢食，時間係4pm左右，唔上唔落，睇下有冇餐廳有tea見到呢間餐廳有tea menu放出嚟，點知打算入去嘅時候店員先話紅日冇tea (內心OS：冇tea做咩仲要放個tea menu出嚟俾人睇然後我哋都照入算啦，但係啲店員好似唔想招呼我哋咁叫咗4個set，分別有鯖魚定食(有配菜同蘿蔔蓉)燒鹽麴熟成五花腩定食吉列雞排飯配冷蕎麥麵同埋招牌定食，有啲set有沙律，有啲有茶碗蒸我叫嘅呢個招牌定食有煎蛋，薯餅同炸雞，味道都好普通，唔係特別impressed，唔知點解佢叫招牌...友人叫嘅五花豬腩肉仲特別總結：價錢偏貴，每人過百埋單雖然嘢食份量都幾多好飽，但係味道一般，性價比唔高

上網見到荃灣有個地方可以欣賞汀九橋既日落慕名而來周圍行下等夠鐘去睇點知！原來係睇唔到既🙁🙁🙁比啲樓遮住左只係見到西斜既景色😅🤷🏿‍♂️睇完西斜美景之後去覓食7:30 星期六既荃灣頂周圍都勁多人Ummmm 行下行下見到大戶屋龍尾都唔太遠決定等一等佢等左大概25分鐘👌叫左一份套餐 加一set 串燒2個人share 都夠哂飽灸燒牛舌配冷蕎麥麵餐（$148）算好抵食呀呢個又有一大碗飯又有一盤蕎麥麵！ 一次過滿足2個願望牛舌燒得好好食唔太硬又唔會乾口感岩岩好👌👌蕎麥麵就煮得太腍夾到尾時有啲好碎不過個冷麵汁真係好味👍🏻👍🏻日式蒸蛋就好水落太多清湯無左蛋味😌雜錦串燒B（$160）燒得麻麻地五花腩同牛肉串好食但其餘果4款雞都係普普通通無特別唔係特別鍾意食串燒既可以唔叫呢個Overall 都係幾好唔錯既餐廳環境好好夠新又夠乾淨，日式design 令人一入到去已經感覺良好Menu 又多款好多野揀服務都ok gei 食物味道中規中矩算係穩陣之選

一直都是大戶屋的粉絲，荃灣這分店也經常光顧～位於荃新天地這分店很大，兩人被安排在四人的位子，很闊落及舒服呢～點了以下兩款定食：燒生薑醬油牛脷定食 - 食物來到時聽到「shi shi 」聲，原來牛脷下面有塊小鐵板，很特別啊～而且絕對夠熱～牛脷夠厚身但不會過”un”，個人覺得不用點醬也夠味～伴碟還有炒野菜，可以解油膩感～好味～燒鹽麴熟成五花腩定食 - 五花腩份量很多，肉和肥肉相間，雖然很邪惡，但偶爾一兩次沒所謂啦～好味就足夠～大戶屋水準一直都保持到，而且價錢公道，絕對會再encore~

唔經唔覺又係呢區工作咗一排，都會發現呢度真係有好多嘢食，由街邊食到商場有時食落都會有驚喜，今次就去咗荃新天地呢間食午餐呢度係主打食日式定食套餐，款式都有好多，而我叫咗燒鹽麴牛肉盒子飯套餐，包括前菜，麵豉湯，日式蒸蛋等等一陣間由店員送到枱上，買相不錯，牛肉份量足料，配料仲有蔬菜，先來食前菜清新又開胃，輪到蒸蛋入口香滑蛋味濃，再來係燒鹽麴牛肉，牛肉咬落肉質細嫩，肉與肉之間又食到香濃嘅油脂，口感十足，一啖肉一啖飯已經食得好飽滿最後飲番碗麵豉湯又食完一餐日式定食

係荃灣返工日日係公司食出黎食先知原來咁貴食個飯都過一百好肉赤呀見呢間野好似都好耐之前已經有想試下佢啦其實都好普通但無得簡之下就食咗我簡咗好普通既火灸三文魚都要成113😿但朋友果個有驚喜唔錯既黑醋雞花111，仲平我3蚊其他野食應該唔差，只係價錢比夠貴

其實係荃灣荃新天地呢度真係有幾多食肆集中係呢度夠晒方便之餘，又可以食到不同口味嘅美食，是日晚又到咗呢度開飯至於食乜係日式定食套餐，就去咗呢間位於荃新天地一期日式料理店品嚐呢間主打提供日式定食套餐，而且口味款式都有好多不同配搭，我睇完一輪餐牌後，就點咗呢個定食套餐，鐘意佢有兩種口味之餘，仲係啖啖肉啱晒我呢類人士享用，套餐名係燒鹽麴熟成五花腩拼牛肉定食，已包括飯，湯，燉蛋同前菜，除咗點白飯外仲可以加錢食其他不同口味特色飯，而我就點咗小魚飯等咗一陣終於見到定食套餐出來，已見買相不錯份量又足料未食已聞到濃濃肉味，趁佢仲係熱辣辣就先品嚐一下佢D肉，先來係五花腩，面層已燒至金黃色有光澤，肉與肉之間又有肥美香濃嘅脂肪，先食一啖肉質香嫩多汁，再加上已有鹽係表層燒過更加提升肉嘅味道到另一款牛肉，份量亦不小，肉質方面亦非常嫩滑味道十足，雖然好味但都唔可以就咁食要配埋小魚飯一齊食咁先完美當然唔少得飲番碗濃郁嘅麵豉湯同埋沙律，最後食番杯香滑燉蛋，已滿足晒所有食慾，是日晚又品嚐咗一餐日式定食