壹號餐廳

營業中

休息中

之前同一位置茶餐廳成日食，差唔多一個禮拜去5日，貪佢位置夠方便，門口方便泊車，轉手後試過1次，出品麻麻，杯奶茶冇乜茶味只得奶味，今日俾多次機會去食，叫咗個午餐黑椒牛扒煎蛋飯，極度中伏。首先餐湯羅宋湯，一睇顏色已經好似唔對路（第一次去食有飲羅宋湯感覺都OK㗎），淡橙色..一飲擺明溝水溝淡晒，飲咗一啖就擺埋一邊，好啦到個飯嚟到，正常呢個碟頭飯出事機會率應該好低，點知我見嗰兩塊「牛扒」以為我今日生日，應該係比較大塊d的牛肉，都算啦味道好就得啦，點知咬落去「un」到爆，大佬啊..點食啊？最後就用黑椒汁煎蛋撈飯食，塊所謂牛扒咬咗一啖又擺埋一邊，上次奶茶唔得所以今日試檸茶，冇茶味，檸檬唔香。唔會有下次了。

同屋企人試食新開餐廳，門口可以泊車，店內光猛清潔。叫咗個砵仔焗蠔，椒鹽鮮魷同埋幾個小菜。火候十足很有大排檔風味。店內冷氣有些大，不過整體服務及食物水準很高。如果有機會會再試吓其他小菜。

今日入屯門試咗一間新開嘅小店茶餐廳非常之闊落座位舒適冷氣足夠附近仲有足夠嘅車位非常方便！聽講間茶餐廳啱啱開但見到樓面有六七個伙記招呼非常到位👍👍我哋叫咗九個餸菜酥炸生蠔同酥炸白飯魚魷魚非常之鬆脆入味廚師仲加咗啲蛋黃超好味👍啲鮑魚同埋條星斑蒸到啱啱好非常滑😁仲有個炸大腸薄薄脆一定要試😉啫啫通菜煲同埋薑蔥清遠雞都ok🙂整體啲嘢食好好味😋原來仲可以自攜海鮮畀餐廳整😆下次入嚟一定要試下😁呢間茶餐廳簡直係平靚正👍👍👍👍必試

今日去開屯門探朋友，朋友講開附近開咗間新餐廳，就去試下呢間新開嘅餐廳，打開餐牌，一見有雜果冰，即刻好興奮叫返杯，真係好懷念細個嘅時候，而家好多餐廳都冇得飲架喇，我見佢仲有涼粉冰，紅豆冰...….......個例湯夠足料，唔覺有味精。啫啫通菜煲都夠鑊氣。另外都食咗炸大腸，脆卜卜的。清遠雞，有雞味，但廋咗小小。生炒排骨，味道都好好仲有金沙鮮魷，呢個簡直好食到冇得頂我見有鴛鴦炒飯，唔係度度都有，但實在叫咗太多嘢，下次一定會叫。總括嚟講我都好滿意一定會再去

工人姐姐放假，諗住龍輝摺左開返間茶記都試下新屎坑啦。叫左三個小菜，一碗湯加乾炒牛河，加埋都$420.其中一樣小菜係青瓜海蜇手撕鷄例牌（都成$110）,只係諗住有肉食下咁。返到屋企一開盒，只係得青瓜同海蜇，手撕雞就無影無蹤。咁就打落去講啦，收銀好好話10分鐘再落去補返畀我。心諗，有得食就算。落到去 （當然10分鐘後），仲未有，都開似火，又唔係要煮要開爐，點得撈完啦。等多10分鐘，有外賣出，以為係我既，點知唔係，收銀開始幫我追，叫樓面入去跟跟，樓面真係好似入左去呀，不過又好快出返黎。再等10分鐘，我同佢講，我唔要喇，取消張單啦。之後好神奇地個收銀拆開份唔係我既外賣，搵到我盒青瓜海蜇手撕雞喎 。你係我你會點？首先，如果樓面真係有緊張過既，相信一問之下廚房一定有人答已經出左。即係根本做樣，你急你事。第二，我盒外賣又真係出左係另一份外賣到，即樓面執外賣個個又好求其無check單。成見事我只係見到一班無溝通，懶理得你既樓面。全程只有收銀係緊張。最後我都有攞返我盒外賣，樓面哥哥你咁誠懇咁送碗湯畀我？多謝喇，我有叫到。不過返到屋企飲左2啖掉左，咸菜糊椒豬肚湯，以茶記水平講，一d風味都無，咸菜/酸菜用錯

難得可以放假，於是去置樂果邊接老婆食晚餐新開壹號餐廳 裝修風格唔錯門口顯示晚餐廚師推介幾款餸菜要注意係推介，並唔係晚餐優惠眼見樣樣餸都70蚊以上，唔包飯及飲品！雖然是中檔價位的餐廳，但難得同老婆晚餐一次半次冇所謂啦一坐底就叫侍應落單，可能我坐係門口位置！收銀員就直接叫我落單先叫左個咸魚蒸肉餅，因為餐牌標示呢個餸係廚師推介收銀員已經問我係要咸魚嗎？我再三確認，係咸魚蒸肉餅，唔係咸蛋！總共叫左3個餸 椒鹽豬扒 蒜蓉蒸扇貝 及 咸魚蒸肉餅另外加兩碗白飯（每碗10蚊）及兩杯凍奶茶（每杯20蚊）總數316蚊 呢個價錢真係好貴，比其他茶餐廳貴一倍以上希望物有所值啦凍奶茶黎到 碎冰，茶味濃，奶味偏淡，對得住20蚊這價錢椒鹽豬扒 呢個餸78蚊，廚師炒得幾好食炸蒜同紅椒比例平均，豬扒少少咸，非常入味，送飯一流好欣賞呢碟餸菜，唯獨廚師刀工有待改善！蒜蓉蒸扇貝 呢碟價值100蚊既海鮮，兩隻扇貝鮮甜美味，唔會蒸過火，蒜蓉及葱落得十分平均，係一道幾好味既餸菜（我指粉絲）但點解要搵粉絲擺底呢？所有精華及豉油去哂碟底既粉絲度，扇貝既殼又是否洗得光淨呢？ 100蚊黎講唔收貨，扇貝上面完全冇豉油，搞到扇貝上既粉絲完全