影片
見呢間麵店開張咗冇幾耐，今日lunch time決定過嚟試一試。中午過嚟有空枱，唔使等位。我同朋友分別點了招牌的花膠濃湯雞米線（$78）同埋黃酒雞米線（$72）。首先講吓我嘅黃酒雞米線，一嚟到首先飲啖湯先，因為餐廳標榜自己的雞湯熬製了10個小時，一飲落去，覺得係唔重味精嘅，但係就完全冇黃酒嘅香味，同埋個湯嘅味道太甜，甜唔係鮮甜嘅甜，係好似落咗砂糖或者冰糖嗰種甜，可能係因為湯裏面有好多紅棗同杞子等等。完全掩蓋了雞湯應有嘅鮮甜。我點呢個黃酒雞米線，好期待嘅就係嗰種黃酒嘅香味，但係我可以話呢一個係完全冇酒味，湯頭有啲失望。尤其是係餐廳標榜熬製10個鐘嘅雞湯。分量方面係大嘅，夠飽嘅。然後講吓裏面啲雞，我認為雞肉方面就要睇你好唔好彩，我朋友嗰碗大部份都係雞胸肉，佢就話鞋到不得了，唔想食，我就好彩啲，我嗰碗入邊有啲雞髀肉，所以唔係全部都係鞋嘅肉。但我認為最大問題係啲雞完全冇味，唔止係冇雞味，係連少少調味都冇。我為咗唔好嘥咗啲雞，就問樓面嘅阿姐有冇豉油，我諗點豉油食會好味啲，但阿姐話冇豉油，咁我問佢鹽有啦掛，佢就話鹽都冇，咁我問佢可唔可以問廚房攞啲，佢極不情願地去廚房攞了一碗鹽俾我，我就有禮貌地問佢既然入得廚房問，可唔可以問廚房攞啲豉油俾我啊，因為雞點豉油會比較夾過雞點鹽啊，咁阿姐就面露不悅咁同我講話廚房冇豉油。咁我就即時打咗個特，好懷疑點解一間中式食肆嘅廚房裏面可以冇豉油，呢間又唔係西餐廳，我問阿姐係咪肯定廚房入邊冇豉油，可唔可以幫手問吓，咁佢就轉身，然後過咗幾秒返番轉頭就話俾我聽廚房話冇豉油，碗鹽要就要唔要就冇啦。咁我梗係明知阿姐耍我啦，又或者喺廚房耍我啦，但係我都極度無奈，唯有嘥咗啲冇味道嘅雞囉，呢個又係一個活生生嘅例子點解香港嘅食肆越嚟越差，點解香港消費者會選擇北上消費，就係呢啲劣質嘅服務態度，嚇怕咗香港嘅消費者，尤其我想講嗰碗米線都唔係平呀，都成$72-78一碗㗎。想攞少少豉油點下雞都唔係好過分啫係咪啊？ ！佢竟然話俾你聽個餐廳嘅廚房裏面係冇豉油嘅。講返個米線嘅質地，係比較硬嘅，我本人覺得還可以，因為我食麵同意粉都係喜歡比較硬嘅，但我朋友就覺得實在太硬，好難接受，所以如果怕硬嘅朋友，記住要求煮耐啲軟啲（但唔肯定會唔會又激嬲樓面阿姐或者廚房師傅）。至於朋友叫嗰碗花膠濃湯雞米線，我試咗一啖湯，唔會好似我嗰碗黃酒雞咁甜，但係嗰嚿所謂花膠，其實係一嚿好細嘅魚漂，一啲都唔好食，唔值得比多啲錢去叫。絕對唔推介。總體來講，我覺得食物質素和味道方面有點失望，服務方面係劣質嘅，阿姐完全冇尊重過客人嘅智商同感受，我絕對唔會再返嚟呢間麵店食，亦都絕對唔推介大家試呢間餐廳。畢竟食嘢都係求好食同埋開心，如果又唔好食，又受氣的話就絕對冇下次！
繼續閱讀