嘉豪酒家

營業中

休息中

嘉豪係長沙灣天悅廣場2樓都有分店，一樣有超平任食任飲火煱，仲可以叫蝦同蠔添!長沙灣店仲有一樣好:有自選醬油味料，係其他分店無既!湯底老實講就一般罷了，餸料都ok既。食到肚脹飲到嘔都只係收你幾十蚊個人，仲想點？

上星期來雀局見呢度有自助火煱，幾十蚊又啤酒汽水任飲好似幾抵，所以趁天氣轉暖前又原裝人馬再來吃。跑馬夜人客都不算少，都超過一半，在呢個地點來說算幾難得。有幾款湯底可供選擇，我們要了皮蛋芫茜湯底，都有芫茜味，算係咁，當然淥兩淥再加兩轉滾水就咩味都無；火煱料都有幾十款可以選擇，生料如肥牛、金錢展、各式丸類及魚片雖然不是什麼靚貨色，但都算新鮮；酸梅湯、啤酒、汽水都係任飲，我們當然專攻啤酒，不過飲得啤酒汽水多又唔會食得落咁多野，所以佢條數都打得過；漏單當然有，但不算很嚴重，頭兩轉食物還算到齊，其後就剔十樣來四樣，好在已食得七七八八，所以都無所謂。連湯底茶芥加一，每人大概八十蚊左右，都算幾抵，如果九點半後入座可以再平十蚊。

同幾個朋友來打牌，呢度其實都十幾年歷史，屬街坊酒樓，但平日少過來這一邊所以今次都係第一次幫襯。雀局菜四菜一湯，有飯有果盤有糖水，仲有幾大間的獨立房，有電視睇，所以都幾抵。晚飯要移師去大廳食，菜色是一斑兩吃，清蒸及西芹炒斑球，叉燒一碟及金銀蛋浸莧菜，同埋海鮮羹。斑味道是不錯，清蒸都沒有腥味，幾好，而西芹炒斑球就比清蒸來得遜色；叉燒都唔錯，半肥廋又唔韌，幾好食，可惜冷氣太勁，食到半路已經有層豬油凝結在上面，令人卻步；金銀蛋莧菜同海鮮羹都OK，甜品是南瓜露，都唔錯，亦有粒粒南瓜同南瓜蓉，味道不比甜品專門店的差。埋單468蚊，已包酒水同加一，仲可以打到三點幾，都打得過。