唯一雲貴川風味

營業中

休息中

每次黎度荃灣，經過千色匯附近，有間米線總係排長龍，令我一直都想去試。今日終於抽到時間去排隊食。排左大概20多分鐘先有位，六個人坐一張細圓枱，坐得都幾唔舒服。等左12分鐘都未有野食，原來係漏單🙄，叫人跟左跟先有得食。米線份量正常，酸辣湯底味道好一般。米線無口感，唔彈牙無嚼口，明顯唔係即煮，呢種質感唔太討喜。配菜簡左雞翼尖、腐皮。雞翼尖煮得夠哂淋，可惜味道一般般。最失望係腐皮，絕對可以用難食去形容，質感好似食緊爛布渣，好鞋口😖。我食開既腐皮都好滑，接受唔到甘難食。食食下仲中招，好大滴冷氣機水滴濕手臂。米線真係十分普通，完全無驚喜，真係唔明點解可以甘多人去排隊。論環境、服務、食物，全部唔合格，配套差，食又食得唔舒服，性價比超級低。其實如果係好食，我唔介意排隊，但呢間絕無下次。

早前fb一直見到篇文章，介紹全港必食既米線舖，呢間榜上有名!7點黎到，已經要排隊，排既時候會落定單，一早做左功課，腩肉係大家都大推既餸，咁就黎做腩肉+蘿蔔! 等一陣就已經可以入座每桌都有1“桶”熱茶，如有需要，問姐姐拎個杯就可以!雖然排隊既時候已經落單，但入座後都等左10~15分鐘先有米線湯底~ 叫左清湯，湯底有點酸，因為真係好多酸菜，味道見人見智啦，因本人愛麻辣湯底多d...口味不能作準，男朋友大愛蘿蔔~好甜好甜，仲有4舊咁大，正腩肉~本身腩肉有dd 辣味，撈埋個湯底，就會變酸辣湯，腩肉係瘦個款（我至愛），份量係好多，食極都仲有餃~ 男朋友叫左腩肉+餃，餃相對黎講比較普通，（本來想叫大腸 但已賣晒)可能飲左d湯，食完會口渴

多年前食過，今日再去味道已經大不如前。未坐好就已經被呀姐催落單。餐牌上寫三餸$40，佢單上面寫$47，問一問就俾佢大聲呼喝，全程呼呼喝喝，我哋唯有盡快食完走。山長水遠入去食仲要受佢氣！味道方面，辣唔夠辣，酸又唔夠酸，叫左少油但個呀姐可能聽唔到。佢咁惡死又唔敢再叫佢。整體黎講比以前差左好多。唯一好嘅係米線份量夠多同唔洗點排隊。最慘嘅係夜晚有輕微肚瀉。事隔多年再黎，估唔到令人咁失望，呢個價錢絕對有更多更好嘅選擇！

呢幾年米線食肆開到成行成市，出奇地係間間鋪既名都係差唔多，令人摸不著頭腦。今次呢間唯一雲貴川都係一次偶然中幫襯，起初仲誤以為係另一間米線鋪頭。起初見到鋪前排滿長龍都有小小想打退堂鼓，點知排左無耐就入得，原因係我單丁一個人 可以攝位，相比起其他一對對，唯一值得安慰既好處就係唔洗排好耐對。鋪內既裝潢係傳統香港本地8、90年化既風味，而且位置都比較逼夾。我就點左腩肉豬潤酸辣米線。伙計既手腳都好快，未幾 一碗米線已經送至眼前。整碗米線鋪滿配料、蔥花、豆芽。不得不說既係個酸辣湯底好香，濃濃既酸辣油香味滲出，但相對既係湯面鋪滿一層油，呢點對女士或健康人士可能就未必接受得到，但我一個佬就無有怕。豬潤咬落唔會太粉，亦無苦味，只能說合格。腩肉就相對地突出，味道有d香辣而且入味，同整個湯底有加乘既效果。整體味道都唔錯，如果人龍唔太長的話還是會再次幫襯的。

呢間米線都出咗名好食，咁多年來味道一樣，都係咁好食，足料湯底正.今次食豬肚中辣，但係依家啲中辣冇以前咁辣，不過啲辣椒好香！我朋友食炸醬同腩肉，佢讚啲炸醬好有層次係米線中最好食的。埋單一啲都唔貴，30幾蚊一碗麵咁有質素！

今天和家人到了荃灣，順道去一家以往曾經經常光顧的店舖，一如以往，門口已經有一大堆人這在這裏等候入去。內裏的佈置沒有太大的改變，喚起親切回憶。我叫了以往常吃的酸辣+腩肉米線，遞來的時候，我已感受到那碗麵的熱力和份量，濃郁的湯底盛著滿滿的材料， 煙韌的米線配上芽菜和酸菜，味道和以前一樣酸辣度十足，腩肉仍然是那麼入味，湯有一陣厚厚的油，似乎提我飲那些湯後會致肥，不過湯底太惹味，最後我仍然是飲湯，此時臉上滲出了一滴滴的汗珠，所以忍不住叫了罐汽水來。另外我叫了涼拌雙拼(雲耳+皮蛋)，雲耳味麻辣刺激味蕾，而皮蛋是切開了一半，沒有像雲耳那麼辣，有濃濃皮蛋味，是我很喜歡味道。

呢間米線可謂由細食到大， 單身時食佢，拍拖時食佢， 結咗婚帶埋個仔嚟食佢， 到而家離咗婚再食佢…… 真係每況愈下。以前好食到早餐我都要專登嚟買一碗肉炸醬米線，或者專登黎買返屋企食。近呢幾次食，都係超咸同多味精。今次食炸醬豬脷，炸醬係個湯度混埋好多香料渣，唔係好食到炸醬碎，豬脷就ok既。辣度都唔夠， 中辣大概等如譚仔嘅小辣。 其實成個湯我淨係覺得好咸， 除咗辣味亦冇咩其他味度其實店主如果真係想做好飲食…… 真係要花啲心機改善下

一直都聽過話好好食，睇左網上勁多人推介，就趁去荃灣期間到此一排。去到唔算多人，排左幾張枱就到我地。一入去就俾阿姐喝住叫餸，點知有啲餸冇左，要改，阿姐自己撞聾又喝我，話我講得唔清楚。最後叫左酸辣，湯底唔酸，得個辣字，隔壁食客都話唔夠酸，要左碗酸湯，鑒於侍應大姐嘅態度，我唔敢再開聲要酸湯。啲餸又唔夠新鮮，腩肉煮到好老，雞翼一般。見到有人叫飲品要自己拎，但有啲人叫飲品阿姐又拎俾佢。我地之後都同其他侍應落單叫左飲品，仲俾阿姐抽查我地張單，佢可能以為我地擅自去拎飲品掛。環境同態度都麻麻地。

那天中午到了荃灣，正藉風雨交加，到荃灣廣場附近，先找地方食晏，記得附近有間人氣米線店，每次經過，都是大排長龍，所以無機會一試，今次去碰碰機，居然門口只有零落的四五人。進去坐下，聽見爐火熊熊聲不絕，看看餐牌，沒有小菜，相信熊熊爐火是煑米線，而且應該是一碗碗煑，我點了猪脷，腐竹，酸辣，酸辣是當一餸，我嗜食辣，所以要大辣，等了約十分鐘，米線才送來，更加相信是續碗煑，先試一口湯，巳我的水平，這大辣不算辣。再試一下猪脷，猪脷是凍的，即使放在熱湯上，那温度不是室温，是像從雪櫃取出，但味道不錯，腐竹份量不小，但豆味不足且不是滑而是爽。整體來說，是不差，但不是相像有的那份驚喜。

食雲貴川已經有三四十次，記得第一次黎是朋友帶我黎食，不過還是第一次寫食評，今日又出開荃灣逛街，於是又心癢癢想食，大約晚上七時，店鋪外依舊排滿人龍，不過d 人來去匆匆，半小時內就有位，店鋪座位依舊狹窄，我依舊叫最愛既腩肉米線，很愛它的湯底，不吃辣都可以食，米線腩肉份量也多，腩肉少辣，味道剛剛好，不過可惜朋友叫既雞翼賣晒，冇得試下新野，加左枝豆漿，不過最驚係d 汁彈到個袋同衫都係，每次食都整污糟，所以要小心d,最後埋單都係三十幾四十蚊，絕對係平價好食米線之選!!

首先，記住每人要帶1包紙巾先好去食！要不斷抹鼻涕！抹嘴邊嘅湯汁！要係出面自動波排隊！姐姐間唔中就會出來幫你落單，之後就俾張單你，你一坐低，姐姐就會叫你單上嘅number ，好快碗麵就會放喺你面前！我揀左酸辣炸醬腩肉米線！米線係好食嘅！不過略嫌太少，大部分都係芽菜、蔥嘅配料。酸辣都唔係太辣，我平時譚仔三哥食開小辣，哩個辣到應該係10少辣🤣個湯底超級多油，搞到我都唔敢送湯食咁多！哩碗野$45蚊，咁我會覺得譚仔三哥性價比高d，不過佢係小店！支持下！

天氣悶熱胃口真係受到影響搵D酸辣野食下剌激下胃口荃灣區有一間叫雲貴川既店鋪今日就去食下去到門口前面已經有幾個人排隊排左5分鐘左右有人走就可以入去坐低今日我叫既係腩肉炸醬米線,小辣要蔥落ORDER個陣一定要講定要蔥如果唔係就會無而這碗米有蔥係好食好多好多,令到成碗食品升多一個層面腩肉同炸醬都偏向辣的,所以如果唔食得太辣就叫小辣就好夠腩肉同炸醬都淹得好入味,加埋辣就令到成碗野都好夾好夾不過食個陣記住帶定紙巾,因為會流晒鼻水不過這個刺激好正,好爽,因為會食到流晒汗

好耐無黎過呢間歷史悠久既米線鋪。同男朋友識個時仲係讀書時期，第一餐就帶左我黎食米線。一黎排返幾十分鐘是常識吧。等左20分鐘終於入到去啦！姐姐依然用住一貫豪邁既作風落單，今次我都係食返最愛既小窩腩肉豬皮米線。廢話唔多講，小窩腩肉豬皮米線實係首選濃郁既湯底配上入味既米線，仲有浸左係醬汁多時入晒味既腩肉同埋豬皮，選擇小窩係因為有埋肉碎係面入口既層次更豐富。另外可以走酸，個人口味可以自行選擇。溫馨提示：唔食得辣既記得叫唔辣！

今日放假專登入荃灣食唯一雲貴川風味，去到又係要等。生意實在太好啦！咁多年都係一樣。入座後叫左個菜肉雲吞酸辣米線，啲配料同以前一樣咁多，最鐘意食唯一既酸辣，同出面食既好唔同，因為佢啲酸菜先係成碗麵既精綷。不過唔知係唔係宜家既米線款式多左選擇。定係我自己口味變左。感覺都係以前好食啲。衞生方便就都係同以往一樣😅，算啦！都係想食回憶姐。唔知係唔係越黎越多人食既關系，啲伙計好似好想你食完快啲走咁。感覺以前有人情味啲。希望唯一雲貴川風味既老闆可以有改善既空間啦！

講到米線，荃灣雲貴川都可以話係其中一個代表，永遠地排長龍，夜左就乜送都賣晒，所以想食一碗米線都唔容易。腩肉豬腸豬肚酸辣，夜左一定賣晒，碗米線黎到出晒煙，加上又辣，次次都要等佢放涼少少先食到，湯底好好味！係好好味！夠辣，夠酸，係雲南既酸菜，好好味。可惜鋪頭無水吧只有樽裝豆漿賣。