鵝頸橋隔籬嘅港式火鍋「十下火鍋」，甫入店好似穿越返去香港80-90年代，以懷舊裝飾、一枱一櫈打造大排檔主題，同場大播90後熟悉嘅廣東歌真係好有feel啊。最近火鍋店引爆人氣，甚至連最強星二代—木村光希、木村心美都嚟捧場！今次仲有靚媽工藤靜香同行，一齊試吓地道港式風味。
呢度唔只賣情懷，湯底、配料都好講究。全店6款湯底均無味精，每日於老湯底加新鮮豬骨熬4至5個鐘，夠晒入味濃郁，打邊爐前一定要飲啖熱湯暖吓胃先。
【零味精經典湯底】
火瞳花膠魚肚雞湯
香港人最經典嘅老火湯，不得不提花膠雞湯!! 呢個味真係由細飲到大，大個咗用呢個熟悉味道打邊爐又係另一番風味。
「十下火鍋」以花膠雞湯作基調，再加雞骨、帶骨金華火腿更富肉味鹹香，同時略帶藥膳味。配料當然有女士養顏嘅花膠、魚肚，飲第一啖湯已經發覺湯身好濃厚，係滿滿膠質感覺。
蟹肉瑤柱冬瓜湯
如果你打邊爐鍾意食海鮮，可以揀呢個蟹肉瑤柱冬瓜湯底，清清甜甜真係好夾海鮮!! 湯底用咗杞子、鮮蟹肉、乾瑤柱、金華火腿熬煮，等到個湯滾起時，店員會幫手切開冬瓜，綿密冬瓜肉吸滿精華，留到中後段食好正。
蟹肉瑤柱冬瓜湯Perfect Match | 海鮮拼盤
太多海鮮唔知點揀，可以直接嗌個海鮮拼盤，有扇貝、蟶子、鮑魚、翡翠螺、魷魚、鮮蜆。全部即日買新鮮貨，店家會依當日訂座人數預貨，保證日日新鮮，仲可以另加本地龍蝦仔㗎。
【牛控必食】
呢度有牛味濃嘅本地牛；又有軟嫩嘅安格斯牛，當然都有打邊爐經典－美國肥牛啦。除咗有齊多款牛選擇，最特別係店家創作嘅乾辣椒雞蛋手切牛肉，紅卜卜登場幾驚喜。
安格斯牛小排
牛小排油花分佈平均、肉質鮮嫩，好啱打邊爐。
乾辣椒雞蛋手切牛肉
「十下火鍋」將肉味濃嘅本地手切牛肉灑滿辣椒，食之前戳開蛋黃撈勻，滾一滾就食得。外層嘅蛋漿特別嫩，牛肉又辣辣哋幾過癮。
【童年回憶】
「十下火鍋」唔止環境有回憶殺，連嘢食都勾起好多回憶啊。
鹹蛋撈飯
細細個一定食過嘅鹹蛋撈飯，呢度都係人手將鹹蛋拆肉撈落炒飯，估唔到嚟打邊爐都食得返個味。聽講好多熟客都鍾意嗌呢個撈飯，一邊打邊爐、一邊食啖飯幾過癮。
如果鍾意鹹蛋撈飯咁一碗碗上，即刻食得唔使等，仲有滑嫩嘅麻辣鴨血㗎。
老少平安
細個打邊爐無而家咁豐富，長輩都鍾意落啲豆腐、鯪魚肉。呢度就將呢兩樣食材加埋一齊，食落有鯪魚肉嘅彈牙口感，後續又啲豆味。
醬爆瀨尿牛丸
正所謂「爭咩吖，兩樣溝埋做瀨尿牛丸吖笨」，今次真係將瀨尿蝦溝埋牛丸，咬開入面係爆汁登場嘅瀨尿蝦肉，終於食到經典電影場景嘅真實味道啦。
【高質自家製】
十下三寶滑
呢度有幾款創作手打滑，選擇困難why no both? 可以直接嗌十下三寶滑，有齊髮菜蠔豉牛筋滑、鹹蛋黃墨魚滑、蝦籽蝦乾鮮蝦滑。估唔到細個成日食嘅髮菜蠔豉，打入牛筋滑又幾夾，仲食到髮菜口感幾正。
而鹹蛋黃墨魚滑就霸氣十足，鹹蛋黃味存在感強，鹹鹹香香+彈牙口感幾正。蝦籽蝦乾鮮蝦滑就將幾種蝦食材打至起膠，蝦味十足是常識吧。
蟹肉蟹粉餃
另一人氣自家製有蟹肉蟹粉餃，蟹味double濃郁。每日人手包製，夠晒爆餡鮮味。
【飲飽食醉】
打邊爐點少得飲酒，除咗有啤酒、紅白酒揀，仲有近年爆紅嘅香港製原漿啤酒。天然成分以傳統方法發酵28日，做出獨特口感之餘，又保留天然酵母嘅酵厚麥味同清爽口感。
十下火鍋
地址: 銅鑼灣登龍街28號永光中心2樓
電話: 35204111
