想喺旺角搵個唞氣空間唔易，就算露天餐廳都畀密集樓景圍住晒。呢2個月新開嘅“REFLECT Restaurant & Bar”終於打破悶局，有個極開揚天台Chill坐梳化飲酒食嘢；室內仲大玩夢幻鏡像反射，嚟緊哈佬喂飯局又多個選擇。
“REFLECT”大玩鏡象反射。
開揚天台有好多梳化位，包場開party、輕婚禮都好啱㗎。
限定Halloween Cocktail，哈佬喂飯局必飲。
10年墨西哥菜大廚 一享Party Vibe料理
唔只環境啱慢食飲酒，“REFLECT”更特別請嚟10年經驗墨西哥大廚，主理好有Party Vibe嘅墨西哥菜。經典嘅Quesadilla墨西哥餡餅、Beef Fajitas烤牛肉莎莎大份豐富，好啱一班人share；同場亦有墨x西fusion菜，Margherita Pizza瑪格麗特薄餅更將批底變成Tortilla墨西哥粟米餅皮，好鬆脆驚喜。
最難得係香港都飲到墨西哥風味Cocktail，最深刻係出名勁辣嘅墨西哥辣椒Jalapen聯乘墨西哥人最愛嘅Tequila，酸、辛、甜喺口中多重變化。
【地道墨西哥菜】
Quesadilla墨西哥餡餅
其實墨西哥菜好健康，好似呢個經典墨西哥餡餅，餅皮係用粟米製作，有種獨特穀物香。餡料就有2款芝士，一咬落去即爆出軟綿綿拉絲芝士。餡餅上淋滿酸忌廉、自家製牛油果醬同莎莎醬，勁有層次。
邪惡拉絲墨西哥餡餅，每啖都多醬+濃郁芝士好有幸福感。
Beef Fajitas烤牛肉莎莎
呢道熱辣辣鐵板牛肉，同Warm Tortilla餅皮分開呈上，自己郁手包到爆晒餡都得。紐西蘭西冷牛肉用咗波椒、洋蔥、白酒炒香，並一反傳統額外加入秘製茄醬、芝士，令呢道傳統菜式更有風味。
3款醬汁都畀得好多，絕對可以瘋狂蘸醬食。個人特別鍾意新鮮製作嘅牛油果醬，口感綿密Creamy；莎莎醬就有新鮮番茄、洋蔥，清新微酸好開胃。
自由包餡蘸醬嘅烤牛肉莎莎，惹味又好玩。
【墨x西Fusion料理】
Grilled Cuttlefish燒墨魚鬚
燒墨魚同飲酒真係好夾，大廚仲用咗新鮮墨魚鬚即叫即燒，再灑上秘製香料。微辣Q彈，真係會一食上癮。
新鮮墨魚鬚即叫即燒，微辣Q彈好啱飲酒。
Margherita Pizza瑪格麗特薄餅
Party vibe真係唔少得Pizza，加咗墨西哥元素嘅話就更有驚喜。批底用咗2層Tortilla墨西哥餅皮製作，比一般Pizza更鬆脆。上面就鋪滿新鮮車厘茄、羅勒同邪惡拉絲Mozzarella Cheese。
瑪格麗特薄餅批底，用雙層Tortilla墨西哥餅皮製作好鬆脆。
Beef Cheek Ragu紅酒燴澳洲和牛牛臉頰
澳洲和牛臉頰以紅酒燴煮4小時，和牛軟腍又吸滿醇厚醬汁。食嗰陣肉香更會喺口中慢慢擴散，真係有種齒頰留香感覺。記住將手工扭捲粉撈滿醬汁，全部都係和牛精華嚟㗎。
紅酒汁燴煮澳洲和牛臉頰4小時，入味軟腍。
Lamb Striploin新西蘭草飼羊西冷
好有驚喜嘅外脆內嫩羊西冷，羊扒上面鋪滿Parmasan Cheese脆片焗製，新鮮出爐會有層鹹香芝士脆片，將羊扒做出雙重口感。配菜花椰菜Puree更淋上松露燒汁，味道賣相都好精緻。
羊西冷鋪滿Parmasan Cheese脆片焗製，外脆內嫩。
Homemade Nougat Glacé法式鳥結糖冰糕
呢度有好多手工甜品，會不定期推出朱古力心太軟、手工Tiramisu等甜品外，長駐甜品嘅法式鳥結糖冰糕係必食㗎！因為製作需時、講究手藝，好少餐廳願意花時間焗製。
甜品師傅會先用橙酒Grand Marnier浸泡杏脯、提子乾，加入烤杏仁片後煮成鳥結糖狀態。最後要打勻忌廉蛋白，先做出綿滑軟糯口感。好鍾意佢哋為香港人度身製作嘅減甜版本，連埋滑膩蜜糖一齊食，甜度啱啱好。
極花時間製作嘅手工法國甜品，好少地方有得食。
【墨西哥風味Cocktail】
呢度自家設計嘅Cocktail好有心思，加咗好多新元素調製，點諗到出名辣嘅墨西哥辣椒Jalapeño都可以用嚟調酒?
Fuego Agrio
調酒師將墨西哥辣椒Jalapeño浸入糖漿平衡辣度，辣中帶甜。再以青檸、蛋白調製出酸、辛、甜嘅獨特Cocktail。
一定要試吓用墨西哥辣椒Jalapeño調製嘅Cocktail。
Green Island
Cocktail基調係提子釀造嘅白蘭地Pisco，獨特香味更被喻為香水白蘭地。調酒師再額外加入香印提子，配以冷泡茉莉花茶，入口先有提子果香，後續再滲出淡淡清爽茶味。
Nama Sabi
少見雞尾酒以Wasabi為靈感，再以薄荷浸泡琴酒提升清爽香味，配埋蜜糖柚子檸檬撞出酸甜清涼感。
(左)Green Island、(右)Nama Sabi
REFLECT Restaurant & Bar
地址: 旺角西洋菜南街74-84號旺角城市中心12樓
電話: 94029697
FACEBOOK: https://www.facebook.com/reflect.hk
DM/WhatsApp 94029697 For Reservation