情人節想2個人靜靜地、遠離鬧市浪漫吓，東涌係唔錯嘅選擇。呢間異國風情餐廳由真．黎巴嫩人主理，堅持採用外國食材，品嚐食材原始味道。店內特設炭爐燒製海鮮、肉串勁有地道風味。
異國風環境曾入圍國際餐飲設計大賽。
情人節6道菜套餐｜唯美花花料理
“Maison Du Mezze”以籐吊燈、乾草點綴，充滿輕鬆度假氣氛，啱晒情侶想舒服拍拖又唔會太拘謹。今年推出情人節套餐注入花花元素，無論沙律定主菜擺盤都好吸引。
大時大節食悶咗西餐，不如試吓有記憶點嘅異國美食！
情人節6道菜套餐Menu。
【精緻小點】
塔布勒沙律 Tabouleh Kraides
“Amuse-bouche”法文意思係「給嘴巴的娛樂」，畀大廚有空間喺菜式中發揮小創意，同時令食客進入正餐前感受到廚師嘅烹調技巧。黎巴嫩地道小食Kibbeh，係用布格麥、香料搓成波波油炸，口感硬脆，做到好似撻皮咁，中間加入塔布勒沙律+Q彈鮮蝦，層次同口感都好豐富。
【餐湯】
黎巴嫩扁豆檸檬湯 Saltaoon Adas Bil Hamod
廣東人嘅經典熱湯有老火湯，而黎巴嫩嘅正宗湯品就有佢！扁豆湯本身有濃厚底蘊，加埋鮮甜蟹肉、富獨特香氣嘅檸檬草同瑞士甜菜，整體層次level up!!
【沙律】
羊奶乳酪沙律 Fetamato
坊間嘅沙律一般都係用芝士，呢度配合異國特色，特別加入香氣十足嘅羊奶乳酪，粒粒包裹住中東薩塔香料（土耳其百里香+香草），配火箭菜同番茄，組合又幾夾喎～
【前菜】
發酵香腸伴朝鮮薊 Sojuq Artichok
香港少有餐廳設炭爐，呢款黎巴嫩地道小食以自家調配香料醃製香腸，再炭烤到外層焦脆，咬落中間仲有肉汁𠻹!! 朝鮮薊帶微微海苔香，伴碟配肉食好啱解膩。
【主菜2選1】
海鮮盛宴 Seafood Trabolsieh
如果係高質海鮮，真係唔使多餘調味料都已經好好食。今次黎巴嫩風味揉合多款海鮮，包括蜆、鮮蝦、章魚等，蘸埋濃厚芝麻醬一齊食好惹味，體驗到大海同香料嘅化學反應啊!!
炭烤羊扒配葡萄葉捲飯 Costeleta Vine Leaves
中東料理好多時會以羊做主角，炭烤過嘅羊扒香噴噴～切開中間係粉嫩肉心，散發住陣陣炭香味，入口軟腍又唔羶。另有地中海料理經常出現嘅葡萄葉捲飯，新鮮葡萄葉包住米飯、香料同香草等食材，香氣清幽開胃，好少地方食到咁嘅配搭。
【甜品】
杜拜朱古力 Dubai Chocolate
食到啦！食到啦！近期全城至Hit嘅杜拜朱古力喺呢度都食到，甜品造型好似一個小花盆咁，頂部有脆卜卜酥皮絲+濃郁開心果，絕對係口感擔當！底層就係牛奶朱古力內藏煙韌牛軋糖，唔同層次嘅甜度夾埋一齊又幾深刻～
Maison Du Mezze
地址: 東涌怡東路9號灣景薈地下G10號舖
電話: 23300131