日本街頭嘅居酒屋，每到冬天都好熱鬧～大家一齊飲酒暢談勁好氣氛，估唔到香港都搵到呢種日本店感覺。尖沙咀 “SAKEH”門口係和式小橋庭園，用餐區則畫滿浮世繪壁畫，好有古色古香嘅日本感覺。
呢度主打高質日式串燒，由多年經驗師傅主理。除咗有多款新品串燒—日本厚燒油揚、大漠燒羊皮等，今年秋冬限定更引入日本人都好鍾意嘅牛腸鍋、鹿兒島A5和牛壽喜燒。
串燒鍋物最重要係食材，師傅每日由日本引入新鮮食材到港，原始味好香濃，唔使額外蘸醬已經好好食。不過每個座位都準備咗麵豉醬同岩鹽畀你按喜好使用㗎。
【秋冬期間限定】
牛腸鍋
日本九州人特別鍾意食牛腸鍋，當地牛腸鍋小店多如繁星，每家煮法都各有特色。“SAKEH” 師傳就揀選無咁肥嘅牛腸入饌，並事先以蝦味噌醃製，食落微微鹹香又軟滑。
牛腸鍋有牛腸是常識吧，但無諗過有埋好少見嘅「沙瓜」，其實就係牛嘅第4個胃。平時食嘅牛肚有草肚、金錢肚同牛柏葉，其實係牛第1、2、3個胃。沙瓜就係第4個胃，體積最細所以好稀有，身價更顯矜貴。沙瓜彈牙又完全唔腥，同牛腸一齊滾起熱辣辣食好惹味。
鹿兒島A5和牛壽喜燒(5片)
鹿兒島A5和牛份量好多，每片都幾厚切同大塊㗎。將牛肉輕輕係壽喜燒湯汁入面灼熱，和牛油香會慢慢滲出嚟，而且好有咬口肉感。
【串燒新品】
日本厚燒油揚
極級厚油揚燒到好乾身脆口，咬開入面好似蜂巢咁幾酥脆，愈咬愈重豆味，亦有唔少人稱為日本響鈴㗎。
大漠燒羊皮
師傅話鍾意食羊嘅人，一定大愛呢道羊皮串燒。以新彊燒法灑上香料、孜然，微辣香口。入口羶味幾強，同時會湧出肉味。外層燒得好乾脆，食落又有種煙煙韌韌口感，羊皮既油脂香氣加香料味，轟炸味蕾。
芫茜皮蛋豚肉卷
相信芫茜控都好鍾意嗰種獨特草香，今次可以試埋日本芫茜香味，加埋皮蛋、豚肉一齊食，單睇好似毫無關聯嘅3種食材，其實只取芫茜頭段幼嫩部份，加埋皮蛋口感軟滑。
廣島蠔串燒
師傅特別引入較大隻嘅廣島蠔～而且燒蠔好講究火喉控制，要猛火將生蠔迅速燒熟，先可以keep到蠔汁㗎。
【秋冬限定新清酒】
呢度會不定期引入新清酒，今次呢幾款清酒都係秋冬季先有。因為當中有「冷卸酒」，釀酒過程係隨四季變更。春夏釀酒後，待秋冬時室內外溫差減少就直接推出，趁秋冬嚟試吓喇。
多款秋冬限定清酒。
另一款「生酛」清酒，係日本最傳統、最古老釀造方式，需要長時間以人手不斷攪動製作酵母，現存只有10%酒藏會用呢種方法，係好罕見既清酒。
「生酛」清酒係日本最傳統做法。
新清酒一覽！
- 七田 七割五分雄町 純米冷卸酒 - 七田 七割五分愛山 純米冷卸酒 - 梵 純米吟釀 冷卸酒 - 南部美人 純米吟釀 冷卸酒 - 泉橋 秋蜻蜓 雄町 純米生酛 - 泉橋 秋蜻蜓 山田錦 純米生酛 |
和式小橋庭園好典雅。
(左)VIP房掛滿傳統油傘係打卡熱點、(右)店內以木系、浮世繪畫點綴。
SAKEH
地址: 尖沙咀天文臺圍5-9號寶軒酒店地下及1樓
電話: 37099251