好多人話香港咩都有得食，你又試過晒咁多菜系未先? 中環就有間黎巴嫩菜“Shahrazad Lebanese”，係真·黎巴嫩人開!! 環境仲佈置到好似阿拉丁宮殿咁。如果唔知啱唔啱食，可以試咗佢哋嘅Lunch Menu午市套餐先，有餐湯、沙律、主菜/黎巴嫩卷、甜品。價錢依主菜決定，最平$100起，絕對係入門體驗價啊!!
店內寶藍色牆壁、鏤空雕花窗飾，儼如身處阿拉丁世界。
半戶外座位係超人氣打卡位，望住紅磚古蹟「大館」飲酒勁Chill。
【沙律6選1】
地道黎巴嫩菜有好多蔬菜、豆類、香草入饌，今次午市套餐嘅沙律前菜序幕就有6款揀，好似有羽衣甘藍嘅Tabouleh沙律、淋上椰棗糖蜜嘅烤澳洲茄子、經典酥炸鷹嘴豆餅Falafel等等，選擇幾多。
呢款黎巴嫩經典沙律主要有羽衣甘藍、番茄、小麥，豐富配料交織出口感層次，加埋檸檬汁清新爽口。
同樣係當地經典小食，薯仔粒炸到金黃酥脆，混合埋烤孜然、大蒜等香料，幾有風味。
【主菜6選1】
切爾克斯雞(Circassian Chicken)
源自土耳其嘅傳統菜式，將雞髀用麵包糠、核桃、肉桂醬煮出濃郁香醇味道，用嚟撈飯一流呀。
魚肉球(Minced Fish Balls)
平時中菜成日食到嘅魚肉球，嚟到黎巴嫩大廚手上會加入紅辣醬、混合辣椒，呢種香辣多汁食法幾有新鮮感。
烤雞肉串 (Shish Tawook)
食黎巴嫩菜真係唔少得肉串系列！“Shahrazad Lebanese”廚房仲有真·炭爐，所以呢度嘅炭燒肉串特別惹味㗎。
呢款烤雞肉串會預先用多款香料醃製，再用烤爐燒到表面微焦，入面又鎖到肉汁幾正。
黎巴嫩燒烤(Shahrazad Mashawy)
肉控一定要揀呢款黎巴嫩燒烤，一次過試勻阿拉伯式烤肉，有烤羊肉串、雞肉串、土耳其烤肉條㗎。
【黎巴嫩卷】
雞肉卷(Chicken Roll)/羊肉條卷(Kofta Roll)/羊肉卷(Lamb Roll)
雖然Menu係寫Sandwich，但唔係平時食開嘅三文治，其實更似我哋認知嘅肉卷，有雞肉、羊肉條、羊肉揀。
餅皮薄得嚟唔會好乾，內餡真係爆滿烤肉，加埋啲蔬菜、蒜蓉醬幾開胃。伴碟就有黎巴嫩炸薯仔粒、沙律咁，選擇困難唔知食咩好嘅話，揀呢款肉卷一定會啱食!!
午市套餐菜單
Shahrazad Lebanese Dining Lounge & Bar
地址: 中環雲咸街75-77號嘉兆商業大廈2樓
電話: 23300242