【清酒Pairing】居酒屋Tasting Menu第2位半價+8大得獎清酒

中環蘭桂芳除咗聚集唔少港人同遊客，當然都搵到高質餐廳!! 坐擁開揚景觀嘅日式居酒屋餐廳 “Kyoto Joe” ，係香港少有推出日式素食嘅餐廳，好似佢哋嘅任點晚餐喺素食關注組好高討論度㗎。今次第2位半價優惠嘅嚐味盛宴，就可以試埋佢哋嘅新鮮魚料理、雞肉燒物等。平時約素食或追求健康嘅朋友食飯，又多個選擇啦。

裝潢受京都伏見區 (Fushimi-ku) 稻荷大社嘅千本鳥居啟發，以奪目紅色為主調。好似身處日本，但同時飽覽中環核心商業區嘅高樓景色。

【召喚愛酒之人】

“Kyoto Joe” 最新引入8枝獲獎清酒，每款風味嘅辨識度高、入口香甘醇，愛酒之人必試啊。

“Kyoto Joe” 供應8款獲獎清酒。

一系列榮獲金、銀、銅獎嘅清酒當中，開飯仔重點推介同今次Tasting Menu好夾嘅其中4款清酒。分別有金獎「南部美人純米大吟釀山田錦心白」同「作雅乃智中取純米大吟釀」，前者突顯到原料米「山田錦」特有嘅圓潤順滑口感；後者充滿華麗水果香氣，入口柔順、味道平衡。

南部美人純米大吟釀山田錦心白 ($590)

作雅乃智中取純米大吟釀 ($680)

另兩款推介就係銀獎「天壽鳥海山生酛仕込純米酒」，以傳統生酛酒母釀造，旨口芳醇。雖然酒精濃度有15%但好易入口。至於銅獎「梵Gold 純米大吟釀」酸度適中、酒質圓潤，即使係入門級淺嚐都無問題。

天壽鳥海山生酛仕込純米酒 ($420)

梵Gold 純米大吟釀 ($540)

【第二位半價優惠】強力推介8道菜Tasting Menu

“Kyoto Joe” 分別推出「5道菜嚐味盛宴」($630/位) 同埋「8道菜嚐味盛宴」($980/位) 。兩個Tasting Menu都做緊第二位半價優惠，用超抵價錢食盡精緻日式料理。兩個Tasting Menu唔知點揀好，私心推薦「8道菜嚐味盛宴」最豐富！有齊開胃菜(先付)、前菜(鮮付)、刺身(向付)、燒物、唐揚炸物、汁燒料理、湯桶、甜品。

開胃菜先上一道清新嘅日本熊本縣水果番茄，大廚先將番茄果肉混合青瓜，炮製成清甜嘅和風汁，再放上啖啖蟹肉同魚子醬，為你展開菜單序幕。