想喺香港一嚐正宗意大利菜，位於中環嘅手工薄餅店“Abbraccio”就係由外籍大廚主理。仲可以喺空中天台用餐區，坐住籘椅梳化眺望紅磚大館好好feel；而室內就有滲光酒櫃同大玻璃見到成個整薄餅過程㗎。
空中天台用餐區俯瞰中環市觀景都好有feel。
室內有一整排梳化卡位，座位寬敞舒適。
餐廳牆身放滿酒品陳列櫃，一睇就知係微醺好地方。
“Abbraccio”唔單只係一間手工薄餅店，仲有多達40款正宗意大利料理，供應頭盤、沙律、肉食、海鮮、意粉同甜品，選擇好豐富㗎～浪漫啲想撐枱腳嘅話，亦可以order晚市套餐𠻹!!
原條香草烤鱸魚Branzino al Cartoccio ($398)
華人飲食文化有唔少魚料理，而意大利人都一樣，擅於用香草烤魚。好似呢道海鱸魚，就加咗迷迭香同其他香料，充分鎖住魚嘅鮮味，啖啖肥美魚肉!! 配埋番茄、檸檬、白酒、鮮牛至簡單調味，好啱帶家中長老們一齊食啊～
藍青口配哥斯牛油Cozze alla N’duja butter ($328)
海鮮控必點青口!! 藍青口本身特別重海水味，加少少鮮檸檬同香芹提味已經好好食。食嗰陣用自製意大利牛油烤麵包吸滿醬汁，真係汁都撈埋。
生蠔Oysters ($298/半打；$498/一打)
呢度嘅生蠔都係每日新鮮即送，客人order再現場去殼，保證食到最原汁原味狀態～最特別係可以按個人喜好選擇生食、焗或烤，仲有6種醬汁揀：傳統醋汁、辣醬、gremolata、香蒜醬、大蒜、辣椒、檸檬汁，真係好貼心。
如果客人仲想食得再別緻一啲，可以向侍應要求在生蠔上加上煙魚子醬及金箔。(如上圖)
烤雞肝Fegatini Di Pollo ($208)
以意大利做法炮製雞肝真係好少食到，呢度將雞肝烤到金黃焦脆，入面就keep到好綿滑，食落仲有陣陣炭香風味𠻹～
自家製安格斯牛丸意大利麵Polpettoni Pasta ($208)
一場嚟到點可以唔食意粉啊？用安格斯打出嚟嘅肉丸超級有份量，配經典意大利番茄醬同灑上巴馬臣芝士，食落牛味好濃郁又唔乾。而且意粉煙煙韌韌，軟硬度啱啱好。
三文魚意大利飯Risotto Alla Milanese ($218)
除咗意粉，當然仲有Risotto啦～粒粒分明嘅番紅花燴飯索飽香濃醬汁，每一口都好夠味又唔重膩感。焗三文魚嘅魚紋分佈均勻，一刀切開見到中間粉嫩魚肉，入口好鮮甜仲帶少少Q彈感，好似即釣即煮咁新鮮啊。
蘑菇意大利飯Funghi Risotto ($218)
“Abbraccio”會用牛肝菌肉湯同白葡萄酒烹煮意大利飯，飯粒特別飽滿。加上牛肝菌、波多貝羅portobello、白蘑菇、黑松露等配料，最重要有燒塔萊吉奧奶酪(Torched taleggio cheese)，多咗一份奶油香氣！
四式芝士Quattro Formaggi ($218)
呢度有多款手工薄餅口味選擇，並用特製石窯爐烤焗薄餅，450°C高溫將批底焗到外脆內輕韌。四式芝士集齊4款濃度同鹹香有致嘅芝士：拿鐵+戈貢佐拉+阿西雅格+24個月格拉納帕達諾芝士，邪惡拉絲好吸引啊!!
Abbraccio
地址: 中環雲咸街75-77號嘉兆商業大廈5樓
電話: 26333878