旺角天台酒吧餐廳“Reflect”，望住旺角夜景飲酒食飯好chill！主打墨西哥菜，為迎接準備嘅母親節，最近新出1.5kg-1.8kg超大份美國斧頭扒！(需提早2-3 天預訂) ，方便一家大細過來慶祝。
呢度嘅戶外位大到可以包場開party或舉辦輕婚禮，仲有好多梳化位坐得舒服。
“Reflect”位於12樓，一出𨋢就有個靚靚鏡面牆呼應店名Reflect(反射)。呢度由10年經驗墨西哥大廚主理，創作多款party vibe墨西哥菜。想食個精緻晚餐；又或坐戶外邊飲邊食都得。
新推美國斧頭扒足足1.5kg-1.8kg，切開仲係好粉嫩!! 好鍾意上枱嗰陣已經切好晒，可以飲吓酒又拮件牛扒食，每件都好厚肉juicy㗎。(需提早2-3 天預訂)
沙律 | Burrata
白雪雪嘅Burrata有明星芝士之稱，切開瞬間流出奶香芝士真係好療癒。將綿密芝士撈勻沙律菜、車厘茄、鮮羅勒，口感清爽柔軟好吸引!!
沙律 | Rocket Tomato Salad
另外一款沙律主角就係番茄!! 燒原個番茄加上火箭菜、松子、巴馬臣芝士，酸甜清新仲好有營養。
薄餅 | Seafood Pizza
自家製墨西哥辣椒醬，就係呢個薄餅嘅靈魂！辛辣濃郁，新鮮海鮮都唔少㗎，真係食到啖啖八爪魚、蜆肉等，嗰種彈牙口感同一般雪藏海鮮完全唔同。
分享 | Beef Tartare
“Reflect”有好多啱飲酒嘅小食，好似呢道牛肉他他就係cocktail party見到都會想食，就算女生直接用手拎起食都好優雅。脆脆法包多士加埋精製牛肉他他、巴馬臣芝士，又脆又軟綿綿。
意粉 | Scallop Linguine
好鍾意“Reflcet”咩都有得食，就算一班人飯局都唔使煩。呢道意粉嘅帶子真係好搶眼!! 扁意粉又掛滿自家製海膽汁，雙重鮮味勁吸引。
主菜 | Enchilada
Enchilada係地道墨西哥料理，墨西哥粟米皮包住雞/牛肉餡料，入面仲有2種芝士、生菜、番茄、豆蓉，最後淋上墨西哥三色醬烘焗至金黃酥脆，啖啖邪惡拉絲又惹味。
主菜 | Pork Loin Chop
加拿大保濕豬鞍出名軟嫩濕潤，食之前用刀一切到底嘅手感就知幾嫩喇。食落豬味濃零羶味，配埋烤焗甜薯、特色阿根廷香草醬，有種溫軟甜蜜感覺，約會晚餐必食。
甜品 | Chocolate Tart
呢度嘅自家製甜品即叫即製，好似呢款流心朱古力撻上枱嗰陣仲好熱㗎。切開流出濃濃朱古力漿好有儀式感，配埋士多啤梨雪糕解膩啱啱好。
甜品 | Apple Crumble Tart
另一款自家製甜品就有蘋果金寶撻，香甜蘋果肉同脆脆已經有雙重口感，今次放埋入撻皮仲多咗種鬆脆感好正。
【旺角飲酒熱點】最新推出自家品牌希臘紅/白酒
“Reflect”有個大天台坐得舒服，真係未試過望住旺角夜空飲酒呀。最近佢哋仲新推希臘提子釀造嘅3款紅/白酒，酒身比較dry並富獨特提子香。
好啱配主菜飲，唔會遮咗牛扒、海鮮味，又可以平衡整體口感，可以提升成個用餐體驗。
飲酒食生蠔優惠！
凡惠顧任何酒類1支，即享$48/6隻生蠔。 |
法國生蠔新鮮肥美，好夾乾爽嘅“Reflect”希臘提子釀造白酒。
一班人share可以嗌芝士火腿拼盤，有康提芝士、意大利巴馬火腿、黑胡椒腸。
仲有一系列炸物!! Q彈控必愛炸魷魚圈；極級拉絲嘅酥炸馬蘇里拉芝士棒(配蒜蓉蛋黃醬)，同埋飲酒食唔停口嘅拉絲芝士松露薯條。
除咗紅/白酒、啤酒外，駐場調酒師設計咗多款IGable雞尾酒。好似泡泡煙嘅Fruity Garden(水果花園)、超夢幻還原阿拉丁神燈嘅Aladin(阿拉丁)都好驚喜。
Fruity Garden(水果花園)好唯美，一戳開透明泡泡即彌漫仙氣，一定要準備影story呀。Fruity Garden有多種口味選擇—士多啤梨／黑莓／芒果，再混合伏特加、橙、菠蘿、桃子調製。
Aladin(阿拉丁)
完美還原阿拉丁神燈，入面係Rum、椰子、菠蘿、柑橘調配嘅神秘藍色酒，斟酒嗰刻好夢幻!!
Pirates Daily(海盜日常)
電影世界中，海盜都會豪邁拎住木桶大啖大啖飲酒，而家都可以試吓呢種暢快感覺喇。木桶杯入面係Dark Rum、花生、堅果、奶油、柑橘調配雞尾酒，獨特果仁味幾驚喜。
Xipe Totec
充滿神秘氣氛嘅Xipe Totec，以杜松子酒、茉莉花茶、梨、薑組成，完美結合柔和香辛味道。
Espíritu
好少見用Espresso咖啡整嘅雞尾酒，仲係撞上Jack Daniels威士忌、橙汁、菠蘿汁。強烈威士忌酒味中，隱約滲出咖啡味幾驚喜。
REFLECT Restaurant & Bar
地址: 旺角西洋菜南街74-84號旺角城市中心12樓
電話: 94029697
FACEBOOK: https://www.facebook.com/reflect.hk
DM/WhatsApp 94029697 For Reservation