慶祝聖誕咁大件事，一定要去高CP值、環境美食都超班嘅靚靚餐廳！
位於尖沙咀鬧市頂樓嘅“KABOOM”，儼如尖沙咀空中花園。餐廳酒吧佔地兩層，下層室內空間天花鋪滿長竹枝、懸掛藤燈，好似置身純樸海邊酒吧咁，賣點之一嘅落地玻璃可以飽覽維港靚景～
頂樓嘅戶外空間則放滿陽草傘、寬敞藤椅，配上芬蘭木材塑造滿滿外國氣氛，遠離繁囂。開揚環境更可欣賞維港海景，室內室外都係一流嘅all-in-one casual dining好地方，好啱bookmark定慶祝特別節日！
【聖誕5道菜晚餐】擺盤+味道好驚喜！
Christmas嚟”KABOOM”可以一邊飽覽醉人維港夜景、一邊食盡5道菜晚餐：餐湯、3選1前菜、4選1主菜、甜品同埋節慶雞尾酒，由頭食到尾都好滿足。
【餐湯】
Lobster Coconut Bisque | 龍蝦椰子濃湯
呢度有酒店級主廚設計一系列fusion料理。先有濃厚龍蝦湯展開序幕，特別加入椰子令味道更加清新香甜，同一般飲到嘅龍蝦濃湯會帶點不同～
【前菜3選1】
Pan fried Foie Gras | 香煎鵝肝
大時大節想食得豐富啲，一定唔少得鵝肝啊。烤鵝肝入口即化，放喺烤軟麵包上面再加酸酸甜甜蘇梅醬、香烤榛子果仁碎一齊食好有層次。
SOUS VIDE Lobster | 真空低溫烹調龍蝦
真空低溫煮法會令龍蝦產生美拉德反應(Maillard Reaction)，令肉質帶複雜嘅香氣味道。加埋龍蝦啫喱、魚子醬、高湯同埋清甜蘿蔔，呢個組合好食到難以抗拒啊！
Beef Carpaccio | 生牛肉片
經典冷盤之選有生牛肉片，以綠咖喱同香醋珍珠點綴，增添鮮味之餘仲可以帶出淡淡牛香。連埋橄欖油、清爽洋蔥同巴馬臣芝士一齊食，味道好夾。
【主菜4選1】
Carabinero Red Shrimp and Abalone Risotto With Sea Urchin Sauce | 西班牙紅蝦鮑魚燴海膽醬意大利飯
盛載滿滿高質海鮮嘅意大利飯，用咗大隻彈牙西班牙紅蝦+日式做法鮑魚，配搭相當奢華!! 西班牙紅蝦既蝦膏建議兩種食法, 直接食用或者將蝦膏加到意大利飯內同時每粒飯吸滿濃郁海膽醬，食完有種幸福感。
Pan Fried Alaska Black Cod Fish | 香煎阿拉斯加黑鱈魚
阿拉斯加黑鱈魚以緊緻細膩嘅白色肉質而聞名，無小刺做到啖啖肉嘅口感。配上香滑薯蓉同叻沙梅乾醬調味，香口唔會好乾。
Stone Grilled Australian Gundagai Lamb Racks | 石烤澳洲剛達蓋羊架
東南亞風情主菜有呢款石烤羊架，羊肉唔羶好軟腍。醬汁以咖哩配酸奶為基底，蘸住食味道相互平衡，突出到羊肉香氣。主廚加入一個小心思，伴有今期流行嘅開心果櫛瓜醬，同羊肉都好match！
Australian M6 Black Opal Wagyu Ribeye Steak | 澳洲M6 Black Opal和牛肉眼扒 (+$158)
Black Opal和牛由穀飼養殖約380日以確保油香同肉味既平衡，同時充滿奶油香氣。加上肉眼部位嫩滑多肉汁，就咁以基本調味已經好好食！配菜出奇地係泰式風情，時蔬佐以泰式辣醬，微辣香勁幾開胃，同油脂豐富嘅牛扒相輔相乘。
【甜品】
Gingerbread Man | 薑餅人蛋糕
傳統聖誕節唔少得薑餅人，”KABOOM”嘅薑餅人化身成牛奶朱古力慕絲，中間有薑味吉士+朱古力海綿蛋糕，豐富三重層次，作為甜品太過份喇!!! 隔籬仲有迷你聖誕樹造型嘅蛋白餅，可愛的骰。
【雞尾酒】
Festive Cocktail | 節慶雞尾酒
飲返杯造型感滿分嘅雞尾酒完結整個聖誕旅程，過個深刻嘅聖誕夜～～
KABOOM
地址: 尖沙咀北京道12A號太子集團中心20樓
電話: 37088114