荳品店承載唔少人嘅童年回憶，但百年老字號越嚟越少。眼見香港嘅獨特手藝逐漸消失，老闆索性喺旺角登打士街開設「豆公館」，每日新鮮製造傳統荳品—豆腐花、原味豆漿、一口魚肉煎豆腐等，同時推出輕甜微鹹辣嘅招牌麻婆豆腐花，一反豆腐花固有印象，玩味甚濃。
每日新鮮製造傳統荳品，保留香港逐漸消失嘅獨特手藝。
招牌麻婆豆腐花。豆腐花唔會太甜，反而鹹辣味幾突出過癮。
招牌麻婆腐皮蛋餅。老闆特意飛到台灣改良蛋餅，現全店蛋餅都好似手抓餅咁酥脆。
同場有多款蛋餅，入門口味必食肉鬆蛋餅。
老闆以木系色調、經典格仔地磚重現舊香港風格，一碗一碟均親自挑選。
開業數月，豆腐花系列、豆漿蛋餅系列、炒麵系列都陸續推出新口味。當中一定要試人氣開心果新品—開心果豆腐花、開心果蛋餅，果仁味濃郁，仲要激多開心果碎碎!!
近年開心果人氣爆升，而家連豆腐花、蛋餅都有得食喇。
超多開心果粒，加埋滑嘟嘟豆腐花撞出雙重口感。
開心果蛋餅。開心果粒粒多到實現開心果自由啊，配埋朱古力醬好特別。
豆腐花系列中，除咗一直大人氣嘅薑汁豆腐花、杞子元肉紅棗黑糖豆腐花等滋補口味，更創作紫薯紅棗雪耳豆腐花、泰茶麥芽桃膠豆腐花、麥芽黑糖桃膠花生豆腐花等。而且推出更多香港人comfort food—鐵板蛋煎腸粉、豉油王炒米粉、麻辣鹹牛肉芝士刈包等。想當正餐又得，行過食碗豆腐花過吓掃街癮又得。
薑汁豆腐花。開店以嚟一直大受歡迎，豆腐花加咗薑汁、薑片，薑味強勁好啱冬天食。
「豆公館」以無限創作力，推出多款新口味豆腐花。
(左) 泰茶麥芽桃膠豆腐花。有泰茶獨特茶香，加埋桃膠好養顏。
(中) 紫薯紅棗雪耳豆腐花。香甜紫薯，同滋補紅棗雪耳好夾。
(右) 麥芽黑糖桃膠花生豆腐花。濃厚甘甜，又有粒粒香脆花生。
陸續引入更多香港人comfort food，可當正餐又或掃街過口癮。
(左下至上) 鐵板蛋煎腸粉、吞拿魚芝士多、鹹牛肉芝士蛋餅。
(右) 麻辣鹹牛肉芝士刈包。
平時去旺角掃街要邊企邊食，「豆公館」就有寬敞座位可以坐低慢慢食。唔止方便大家掃街，原來都係老闆初心之一，希望保留以前街坊街里行入小店食碗豆腐花、傾吓閒偈嘅地道文化。呢個心意於「豆公館」優惠更略知一二。小店特意為熟客、街坊同返工人士推出熟客9折優惠、鄰里全年88折、65歲老人家8折，希望為旺角社區略盡綿力。
「豆公館」優惠！
1) 熟客9折優惠 首次惠顧客人付款時，可向店員索取優惠券拍攝(圖片可分享予親友)。只要於下次惠顧出示圖片，即享9折
2) 鄰里優惠 全年88折 附近旺角商舖返工人士，出示名片/有效員工證/舖頭名片，即享全年88折
3) 老人家8折優惠 65歲以上，出示身份證明文件即享8折 |
以前$20食早餐嘅日子，大家仲記唔記得? 「豆公館」唔止保留舊時味道，連價錢都回帶啊!! 每日朝早8am-11:30am都有「$20蚊早餐」，老乾媽炒麵、豉油皇炒麵、老乾媽炒米粉、炒米粉、柴魚花生粥只係$20，仲跟配原味豆漿 或 無糖淡豆腐1杯，完全係佛心價錢。
其實呢度嘅早餐、全日單點都好抵食，全店食品都係$50以下。而且開到夜晚11點，無論你喺附近返夜班定喺旺角玩夜咗，都有間宵夜舖醫肚。
「$20蚊早餐」帶大家返去$20食早餐嘅日子，完全佛心價錢。
老乾媽炒麵。辣迷一定鍾意，鑊氣炒麵掛滿辣椒醬，加埋爽脆蔬菜絲好有口感。
特盛豉油王炒米粉。只要+$10就有特盛double分量，超飽。
每日新鮮製作豆漿，全日有多款選擇。
(左起) 黑芝麻豆漿、杞子元肉紅棗黑糖豆漿、杏仁豆漿
豆公館
地址: 旺角登打士街43號地舖