譚仔三哥米線 (西洋菜南街)

營業中

休息中

上完堂之後，由太子行過黎呢間譚仔都唔使太耐。而且夜晚十點幾，人流都唔算太多。可以食餐過癮既米線。因為唔知咩原因，想入黎食碗麻辣米線先返歸。麻辣米線依舊要大辣，不過料就有小小變。都係要雞肉，因為呢度既雞算幾好食。食落唔會鞋口，而且份量都幾多。另外，我既新係腩肉。因為肥瘦適中，食落好有口感。而米線都唔錯，個麻辣湯當然食得好過癮啦。凍奶茶佢既茶味好重，而且落既奶係幾特別。聽閒係落左豆奶，所以又香又滑，值得一讚。都係三十幾蚊一餐，間中過下麻辣癮。絕對係唔錯既選擇。

旺角做完野，見有時間就黎呢度食米線啦。只不過下午四點幾，所以間舖都唔算太多人。坐得都幾舒服既，比起lunch好坐好多。麻辣米線唔知點解，食黎食去都只係想食雞肉同牛肉既米線。湯底當然係特辣啦。個湯底都係咁正，飲完幾啖個口即刻痹哂。果然係噴火麻辣米線。配料都幾新鮮，份量又多。凍奶茶茶底好靚，佢地又唔會落得太多奶。所以杯奶茶好飲同好好味。點可能無下次呢，雖然價錢係加緊。不過我暫時未搵到比佢好食既米線。

放左學，都唔知點解會去左呢度食午餐。一去到門口，就見到好多人度等。好彩，我都係等左五分鐘就入得去啦。麻辣米線依然咁好食，最鍾意食到麻痹既湯底，辣得黎又有味既。雞肉唔鞋既，好滑。而牛肉都唔錯既。米線就好爽口。不過我都係最鍾意個湯底。凍奶茶細杯左啦，但奶同茶既份量都係咁夾。雖然旺角分店都係咁多人，但效率都唔錯既。另外，食麻辣米線唔想食到唇邊紅哂，只要唔好俾湯底接觸到唇邊就可以啦。

今日放學過呢度KO左個lunch，我都係叫番牛肉、雞肉特辣全走。飲品當然係凍奶茶啦，一入到去有位坐，雖則係路口位，但午餐時間就無所謂既。米線一望到個湯底，即刻流哂口水。湯底依然咁好飲，雖然真係辣到噴火，但真係好值得食架。D料又無小到，雞肉同牛肉既份量都好多，食完之後真係幾飽架。凍奶茶都係咁好飲，不過我唔記得叫小冰，下次一定要叫番唔好咁多冰呀。雖然今餐好好食，但我都係喜歡南京街果間，因為坐得舒服一點。