一風堂 (朗豪坊) (已結業)

minipapa途經朗豪坊，想起好耐都無食過拉麵，打算去味千食返碗。但因為太耐無嚟，味千已經變咗博多一風堂，好在都係食同類嘅日式嘢，有拉麵有飯。見門口做緊宣傳係哩個魚介醬油豚骨拉麵，橫掂未試過哩間，一於食推介。嘢食未嚟飲返杯茶。佢哩度提供嘅茶係凍嘅，但可以要求佢俾杯熱水你。等咗15分鐘，拉麵送到。店員姐姐溫馨提示附上嘅柚子醬可以一齊落入碗湯麵度。我用筷子夾咗少少柚子醬試味，澀澀哋味道麻麻，諗住落入湯度應該有化學作用，但都唔敢落太多，只落咗三分之一。未落柚子醬時飲咗啖湯，濃郁嘅豬骨湯味，仲有好多蔥花增加湯嘅香味同口感，經典嘅味道。檯上仲提供芽菜，我一向食粉麵唔鍾意放芽菜，但佢嘅芽菜帶俾我好大驚喜，好香麻油味，食落爽口仲帶微微香辣味，我落完兩柱，食到一半又再落多兩柱，真係好惹味！加分！蛋係流心嘅，豚肉唔會太厚，半肥瘦食落都幾滑，火候適中，經典的豬骨豚肉拉麵，滿意。但柚子醬minipapa真唔係太食得慣，雖然只落三分一，但味道都有啲搶，下次唔會落柚子醬，原味更啱我口味。