香江花月 (百誠大廈)

營業中

休息中

之前同班friend行佐敦，附近餐廳都幾多，但唔想食好大眾化既茶餐廳或者連鎖野，不覺意見到個招牌寫住香江花月，都幾有詩情畫意，就一於試下呢間野如何。原來係間火鍋店，但都提供類似酒樓既點心，不過有D點心名真係取得幾得意。環境設計係復古懷舊風，但睇落其實唔會殘舊反而好高檔次。我地胃口一般般，所以淨係叫坐幾份野食。雪山叉燒包表面甜甜地但內裡鹹味，而且皮唔厚，餡算多，味道唔錯。鮮茄百花鰻魚盞其實有蝦有茄子有鰻魚，肉質好結實，啖啖都feel到肉，覺得幾抵食，所以我地又嗌多一份。蝦餃外表好靚，五顏六色，即刻影相先！裡面既蝦其實都足料，好飽滿。我地都叫左一份牛肉炒飯，大家一起分住食，份量都好夠，除左有牛肉碎，仲有青椒、紅椒等配料，好夠味。其實仲有送是日例湯，係烏雞茸菇湯，超好飲！而且塊烏雞肉好滑好好食，菇菌易入口軟嫩，湯亦都唔會好鹹，絕對一流。

係網上都見到唔少人話環境舒服之餘，嘢食仲好好食，難得夾埋老公一齊放假，決定兩個人舒舒服服去咗佐敦嘆茶。一去到就俾佢地嘅環境吸引咗，係門口已經大大架人力車等緊我入面仲有留聲機、舊式電話，夠哂古色古香。兩個人食四款點心、小食，夠哂足料唔洗擔心唔夠食。雜醬煎鳳爪有好香陳皮味，有鳳爪之餘仲有花生係底俾大家食。雪山叉燒包大大個，有機豆漿鮮竹卷夠香夠滑，鍾意仲可以飲埋佢個豆漿~孜然銀魚仔一啲都唔細條，炸得香脆，加埋孜然粉更加惹味。佢地仲有好多特色點心、小食，碟碟都足料之餘，賣相都好精緻。如果平日有時間真係可以約多幾個朋友一齊嚟嘆番一盅兩件！

前排見「香江花月」食評唔錯，裝修環境走懷舊老香港格調，今日「偷得浮生半日閒」就帶同爸爸媽媽同老婆4個人去食個Lunch Tea。入到去喺遠處有一架非常搶眼嘅「小販檔」搶晒我哋4個人嘅視線。老人家差啲唔記得嘟「安心」就急住走埋去影相話要打卡Send俾親朋戚友喎。職員好好人見我兩老係架「小販檔」到影相勁開心，就安排我地座係「小販檔」隔離個6人位。4人座6人位當然闊落舒服。其實啲位真係好大，就算6個人坐一啲都唔逼。我地就叫咗個商務套餐(4人用)再散叫咗啲點心。落完單之後爸爸就想去洗手間，去咗大約兩分鐘佢就走返出黎叫晒我地入去去洗手間嘅走廊到。原來牆上面掛有好多舊報紙。全部年紀都大過我好多……爸爸由去厠所到出返嚟都不停講「舊史」……開心到呢。點心非常精緻，睇得出點心師傅嘅用心，蝦餃扎實大粒，蝦肉新鮮彈牙。米網腸，雪山叉燒包都好好味。最出色喺個「是日燉湯」今日我地飲嘅係鹿茸菌鳥雞湯。職員話燉湯每日買料新鮮煲，日日唔同，啱唔啱飲就睇彩數。埋單4個人平均百幾蚊，真係抵到爛。坐得舒服老人家又開心。臨走職員話原來晚市係做特色打邊爐。下次就同老婆兩人拍拖試下先。

前排同friend一起去呢間環境超靚既懷舊茶樓食野，覺得真係好高質！首先講下環境，古色古風，有舊時代的建築風格，例如座椅同餐具等等，而且仲有舊式撥號盤電話，氣氛營造得幾好。食物有好多款，食物名都好有創意，而且又好味。例如雪山叉燒包，其實係把墨西哥包同叉燒包合併，而且叉燒係真材實料唔係外面一般既叉燒餡，份量都足夠。芥末八爪魚份量OK，但勝在入味，八爪魚嫩滑有彈性，芥末味唔會過重，除左芥末味仲有辣味，而辣味會持續一段時間，真係好夠味！鮮茄百花鰻魚盞同鰻魚燒賣好似樣，兩者都會有一塊鰻魚，而前者會用茄子包住肉身，裡面還有少少西芹；而後者則是傳統燒賣皮，但兩者都好足料，裡面既蝦好飽滿肉質緊實。而且最令我驚訝係廁所都可以設計得好精緻，好配合懷舊主題～