越萊 (福榮街)

用咗多年嘅電腦卒之打柴，所以，走落深水埗「高登」砌番部迷你電腦，反正都喺用嗰幾樣基本嘢，唔需要砌到好勁。預一個鐘返嚟推機就得喇，所以，就趁有一個鐘嘅空檔，周圍搵地方食個下午茶兼掗吓時間。最後，嚟到「Pho Bo」，原來有個細細隻字嘅中文名「越萊」，幫襯原因喺晌門口睇啲介紹牌時，啲下午茶餐都幾抵食。走進鋪內，裝修簡約，一室湖水藍襯淺色木系枱櫈，最新色啲喺天花嘅吊燈燈罩。因為小弟前後都去過兩次越南，對越南都有少許認識，如果無錯嘅話，燈罩嘅外型喺以前越漁民網魚嘅工具，實際嘅形狀就更大、更長。估唔到都幾多人，而且，啲枱櫈都拍得幾密，近乎一張接一張，枱與枱中間黐塊薄薄哋嘅膠板，亦唔算大塊，都喺防疫上做做樣。所以，佢叫我一個人坐牆邊面壁位，但會搭坐另一個客晌隔離，我都喺話等一等張獨立二人枱吧，反正今次我有嘅喺時間。雖然話喺下午茶時段，一樣仲供應緊午餐，兩者供應時間都去到6:00pm。故此，選擇上都幾花多眼亂。不過，由於入嚟前已選定某啲下午茶套餐，所以，煩少啲。原先諗住要「越南法式豬肝醬三文治」，但無貨，繼而改試「越萊過三關」，只需集中諗吓配咩小食，要檬粉定湯河。越萊過三關 $36雖然喺幾十蚊貨，但製作都好有誠意，除咗金邊粉、小食拼盤，就連魚露、金不換、芽菜、青檸……等等都跟足提供埋，唔會話收得平，就「求求其其」。餐牌中嘅雞絲芽車快沙律原以為喺一份份咁上，其實，喺夾埋咗越萊精選拼盤一碟過，怪不之得睇起嚟個拼盤超豐富咁樣。但好老實，用料無欺場，菜絲夾脆，除雞絲，仲有啲魚仔乾，整體酸香清爽。而拼盤，就有炸春卷、蒜香牛油雞翼、燒帶子明蝦涼拌茄子，各有特色，唔會喺啲普通嘢。味道亦好唔錯，春卷炸得甘香脆口，雞翼好有蒜香味，帶子亦大大粒，茄子軟滑，幾款嘢都夠晒味，唔需要點任何醬汁:)。招牌牛骨湯檬粉雖然因下午茶餐而俾嘅喺迷你份量，其實，實際都有唔少，最重點喺個湯真喺好得，清得嚟好香，檬粉亦好滑溜。熱柑桔蜜天氣寒寒哋，就唔改照跟餐飲熱柑桔蜜，否則，可以加$2轉其他熱飲，加$3就轉凍飲，加$8就轉特飲。柑桔蜜入口頗滋潤，而散發出濃濃嘅柑桔清甜味，飲到尾，就見到杯底有好多柑桔肉，果然好堅，喺唔用現成糖漿。初頭諗住食完再坐吓，等到有機攞，不過，眼見不斷有新客，所以，都唔好意思打躉打得太耐，就晌深水埗一帶周圍兜吓。…查看更多

知道呢間食肆開張咗好耐，今日終於過咗黎食門口見到呢個牌吸引咗我一入到去唔駛量體溫覺得好奇怪，原來係喺收銀附近用掌心度，好方便坐低拎起張餐單，係以平時食車仔麵嘅形式去點餐叫咗個生牛肉配金邊粉，搭牛骨湯試一試粉同湯都有三款，餸有勁多選擇（唔記得影低）本身叫粉麵會送一杯熱柑桔蜜，所以我無另外加錢轉餐飲加$10有個小食，我揀咗牛油雞翼呢到裝潢比較簡單，張枱有個盤仔用黎放食物上去隔離有個調味料架，再加上現時必備嘅消毒搓手液添過咗一陣嘢食就送到，第一次見啲配料分開上：芽菜＋九層塔、辣椒＋青檸咁樣我覺得幾好，好似我呢啲唔鐘意食碗都係芽菜嘅人，可以自己決定落唔落第一時間當然係試咗個湯先啦，香濃清甜，飲完之後唔口乾入面仲有幾舊蘿蔔，無渣又甜，正呀食到一半雞翼都黎啦一睇就知係即叫即炸，熱辣辣皮炸脆，味道唔算太濃，配埋個麵食好夾熱柑桔蜜唔會太甜，張單有埋人均消費，多朋友一齊食嘅仲唔駛自己撳計數機添…查看更多

本身行去郵局嗰邊買嘢，行經福榮街，一望頭幾間舖，就見到有間新開張嘅餐廳，個招牌叫「Pho Bo」，所以即刻知道係越南餐廳🇻🇳。可能係新開嘅關係，門口有位哥仔好落力同好有禮貌咁拉客。由於唔使等位，所以我同同事一於入去試下。下午一點鐘，餐廳坐滿哂，我哋只能夠坐吧枱，都坐得舒服嘅！但餐廳好似無開冷氣咁，加上出面落雨，令我成餐都覺得好熱好熱、好焗好焗🥵，食到流哂汗，好似喺胡志明街頭食緊Pho咁...。餐廳無特別做午餐，因為大部份粉麵本身已經包熱飲。單餸越南粉每碗$34起，一啲都唔貴！感覺有啲似越式車仔麵。另外，仲有好多小食選擇，平均都係$2x有交易👍。我要咗招牌牛骨湯生牛肉檬粉($34)，老實講份量就比較少，我病緊所以呢個檬粉量都勉強夠食。如果加底要$16，都幾貴下🙈！至於🐮🦴牛骨湯，味道都OK，唔會太味精；我比較欣賞係佢會附送兩嚿蘿蔔，都幾入味。另外，生牛肉份量屬正常，未算太細片、碎濕濕，味道可以。我同事就要咗招牌牛骨湯牛腩片金邊粉($34)，我試咗牛腩片，感覺好似比生牛肉多，味道都幾好。題外話，每碗粉都會跟九層搭、生芽菜、辣椒粒同青檸，比客人自行調味；🍋青檸畀足大大嚿，唔會唔夠喉，正。另外，我哋加咗一份香脆炸蝦餅🍤(2件)($22)，嚟到我一望就知係入貨的、唔係自家製，因為我食過好多次依隻圈型嘅炸蝦餅。不過最緊要係好食，呢隻夠厚肉同彈牙😋。同事就享用咗$18午市優惠，要咗越萊小食拼盤，呢個即係餐牌原價$25嘅精選拼盤。當中包括燒帶子明蝦涼伴茄子、蒜香牛油雞翼同炸春卷，每樣各一件，十分豐富。但嚟到見到就覺得炸得比較油😅，驚驚；不過真係幾大件，而且一次過有幾樣款式係吸引嘅。餐飲方面，熱飲唔使加錢，仲有得揀菜蜜同🍊柑桔蜜添。我要咗後者，清清地、唔太甜，唔錯🤤。餐廳吧枱有個掛釣可以掛袋，好方便😂。總括嚟講，依間新開嘅越南餐廳性價比真係好高，一碗粉加多樣小食都只係$5x，味道亦都算過得去啦！唯一頂唔順係餐廳冷氣不足，希望下次再去依個問題會改善咗啦😊。…查看更多