馬祖台灣養生湯麵館 (和安里)

營業中

休息中

早兩日去開中環，又突然間好想食米線，就比我search到依間養生麵😋睇個名都即刻覺得食完個人好養生!當日店內只開下層，座位around 10-12個🤔星期六兩點去到要等幾張枱先有得食🥲！店員服務唔錯又快手，所以order完好快有得食！蟲草花藥膳農場雞米線（HK$67)藥膳湯底好足料，應該落咗好多紅棗，成個湯好甜，好飲！蟲草多，雞又大大件，依碗好抵食😍！藥膳養生湯台灣直送澎湖特A級花枝丸拼白菜豬肉餃米線（HK$65)個名勁長🤣湯底同上面嗰碗一樣，但依碗散發出嘅紅棗味極強烈😍好正😂白菜餃皮厚咗少少，但粒特A級花枝丸真係不得了，咬落去會有一條條墨魚，好彈牙🤩！推介依粒花枝丸！大家可以order一碗5粒（HK$48)鹵水雞翼5隻(HK$39) 應該浸咗好耐鹵水汁😂好入味，雞肉比較散，但味道唔錯的！自家制桂花烏龍冷泡茶🫖（HK$16)味道應該會想像到，係淡淡嘅桂花香味加好清嘅烏龍茶！荔枝烏龍(HK$10) 係罐裝飲品，好有荔枝玉露嘅感覺，荔枝味強烈，反而烏龍茶味就唔特出，好飲👍🏻

馬祖之前已經食過幾次，份量足，抵食又好味，外賣自取仲有9折優惠，預計夜晚OT到好夜，食飽先有氣力做野，就同同事外賣個馬祖晚餐，食完繼續戰鬥。馬祖主打藥膳湯麵，有辣有唔辣，唔同配料配搭出約廿款唔同湯麵，全部幾十蚊有交易，另外亦有多款小食同唔同嘅罐/枝裝飲品，人均一百蚊唔洗已經食到飽。香辣藥膳牛肉湯手工麵($77) - 湯麵非常足料，大大個外賣碗都裝到滿晒，除左麵多，上面啲配料一樣咁多，外賣湯麵湯底同麵係分開裝，唔怕返到去啲麵索晒啲湯。牛肉湯有得揀大中小辣，我揀左中辣，辣得惹味又唔會太辛苦，湯底仲有少少肉碎。牛肉有四大舊，每一舊都好鬆麵又唔會痴牙。另外仲有兩大舊蘿蔔，好腍冇渣，索晒啲辣湯好正。麵底可以揀手工麵/米線/白飯，因為見有啲麵款手工麵要另外加錢，而我哩款係唔洗加錢，所以揀左手工麵，麵量好多，唔會太腍帶少少彈口。蟲草花藥膳農場雞米線($67) - 農場雞米線同樣足料，大大個外賣碗裝滿晒拎起都幾墜手。藥膳湯底好重藥材味，入面仲有紅棗、雲耳同蟲草花。雞件有四五舊，舊舊都大大件啖啖肉，肉質亦唔會太鞋。米線好滑口感好Q彈。滷水雞翼($28/3隻) - 雞翼好腍，滷得入味但又唔會太鹹。麻辣白菜

今日星期六難得有假放，决定同朋友出街，去中環舊區行下影下相輕鬆一下。行行下見到有間台灣養生湯麵館，望望餐牌好似都幾吸引，於是乎就決定入去坐低，食返個休閒午餐🥣。湯麵館主打養生湯同埋藥膳，大部份餐都可以配手打麵、米線同埋飯仲有各款不同小食。朋友同我就一人叫左一個湯米線。朋友食藥膳養生湯農場雞米線，飲罐裝檸檬茶。本人就食藥膳古早牛肉湯米線，飲荔枝烏龍茶，另外我地仲叫左個滷水雞翼（五隻）。上餐速度都相當快，可能鋪頭當時客人唔算多。食物賣相相當唔錯，無論雞肉或者牛肉都大大嚿,對於食肉獸黎講相當吸引，但湯底方面望落就比較油。而味道方面呢，湯底味道偏鹹，同望落一樣比較油膩，藥材味亦都唔算突出，以主打藥膳來講比較遜色。米線方面相當彈牙，係本人鍾意嘅口感。雞肉食落口亦都比較滑，而牛肉就係普遍台灣滷水牛肉味，滷得入味肉質腍滑唔會打渣。最令人喜出望外嘅就係個小食-滷水雞翼，入味之餘雞肉嫩滑，非常好食。價錢方面以鋪頭係中環呢個地理位置來講都唔算貴，加埋都係食咗$199。但舖頭位置唔算寬躺，坐滿人客都係20位左右。座位尚算舒適，都適合情侶或者三五知己吹吹水。總括黎講，都算係食咗個愉快午餐！！😁😁

呢間台灣養生湯麵一定要係食佢個湯底，因為佢真係真材實料煲一個藥膳湯底出黎，湯底清得黎又好夠味。每一碗湯你都飲得出冇味精，但又好夠清甜，滿滿嘅桂圓、紅棗味，配麵食吸湯汁真係好味。我地叫左一個藥膳麻油雞米線、一碗藥膳古早牛肉湯配手工麵、一碗上湯浸時蔬同三隻雞翼。首先，麻油雞米線一上黎已經好香麻油味，雞肉好滑，食個時令人聯想起北菇蒸雞，但一定好食過北菇蒸雞。藥膳牛肉麵嘅麵底係手工麵，唔同米線，佢粗身D 又彈牙D，好有咬口，亦都好掛湯，食得出係新鮮嘅麵，推薦！牛肉有4-5大塊，應該係用牛肋條位置，好軟好入味，仲有兩舊大白蘿蔔，又係好入味！呢碗真係有驚喜，湯底濃郁得黎又清甜。另外兩個小食水準都唔錯，雞翼甜甜地亦唔會過老，OK；上湯浸時蔬用唐生茶，湯底又係佢地嘅藥膳湯，浸菜係好配搭。份量方面，碗麵60-70蚊佢真係比足料你，碗大之餘湯同麵嘅份量都好夠，可能男仔都未必食得哂！最後，雖然店面小小，但店員服務好好，會主動上前幫你落單等等，食物質素有驚喜地好，真心推薦佢地嘅湯麵！